2 Tesalonicenses 2 - Nuevo Testamento Uwotjüja

Tu̧ru̧wa̧ i̧chä̧kuȩ tü'kü u̧wo̧juȩti̧pi̧nü̧ wȩnȩ

¹ Chi̧jä̧wa̧tü̧, jä̧tȩpä̧u̧jä̧ ukuturumä̧ Tu̧ru̧wa̧ Jesucrito i̧chä̧kuȩmä̧ ja̧'wa̧ta̧nü̧ chutäku ji̧nä̧ yo̧mȩtȩ päti̧'ä̧kuȩmä̧

² kuamükuädätukumä̧ 'kuäunä̧tä̧mä̧ ku'ärowächätukuä, ya̧tȩ yapare jiäwa'anä̧mä̧ ja̧'a̧tä̧mä̧ to'kuäkuäwätukuä, epíritu jiäwäjäkusä, ja̧'wa̧ta̧nü̧ juätümä̧ pa̧'a̧nü̧ jittäwäjäkusä päüttü'i̧nä̧ ja̧'wa̧ta̧nü̧ pauru wȩyu̧tu̧ we'äji pättüttü'i̧nä̧.

³ Ya̧tȩ'i̧nä̧ üyaparewa'anä̧mä̧ kuiyäwätukuä; ji̧yȩnü̧ mo̧ro̧ jä̧kua̧'a̧ ä'kanä̧mä̧ Dio aboiyotümä̧ chutä Dio-ku ttürowäwäkuotü ja̧'wa̧ta̧nü̧ ttü̧ja̧sa̧ suronä̧ jȩpä̧'i̧jü̧mä̧ jua̧u̧nü̧ i̧jȩkuä̧chä̧kua̧, toe'ächa pä'ü pätetü kku̧nä̧wa̧mä̧.

⁴ Jua̧u̧ ttü̧ja̧sa̧mä̧ o'kajuiyünä̧ Dio jäwämä̧, ja̧'wa̧ta̧nü̧ chutä Dio-ku ji̧nä̧ ji̧yȩtȩ wotürümä̧ to'ija̧'a̧ku̧tä̧ wa̧. Ja̧'wa̧ta̧nü̧ Dio ojusodenä̧ do'ächi'ü chutä uruwo kku̧nä̧u̧ ja̧'wa̧ta̧nü̧ ttütäsä Dio-mä̧ pä'ü ji̧ä̧wä̧kua̧.

⁵ Amükuädätukui pi̧yȩ tü'kümä̧ täkü jidäwinä̧u̧jä̧, ukututäku chü̧jä̧i̧.

⁶ Ja̧'wa̧ta̧nü̧ ukutumä̧ wo̧juä̧tü̧jä̧ ttü̧ja̧sa̧rü̧ tto̧ȩpä̧rü̧mä̧, ji̧yȩnü̧ mo̧ro̧ i̧jȩkuä̧chü̧ juiya pä'ümä̧.

⁷ Isopäi'ünä̧ yä̧wä̧i̧nä̧ surojü amükuädü u̧ju̧ni̧nü̧mä̧ täkü 'kuäopa'a; ji̧yȩtȩtä̧ juiya'a ttü̧ja̧rü̧ tto̧ȩpä̧rü̧ juorü pporädü ttikua pä'ütä.

⁸ Ja̧'wa̧nü̧ päi'omȩnä̧ ttü̧ja̧sa̧ surojütä jȩä̧kuä̧wä̧ i̧sa̧mä̧ i̧jȩkuä̧chä̧kua̧, jua̧u̧rü̧mä̧ Tu̧ru̧wa̧mä̧ Jesú-mä̧ si'epü i̧kuä̧kua̧ änä̧ a̧mi̧yuppa ppü'ü ja̧'wa̧ta̧nü̧ ujuruku uruwoku ppa̧wä̧cho̧mȩnä̧mä̧ jua̧u̧ ttü̧ja̧sa̧ uruwomä̧ 'choipä̧kua̧;

⁹ Jua̧u̧ ttü̧ja̧sa̧ surojütä jȩä̧kuä̧wä̧ i̧sa̧mä̧ Satanás-tä̧ ppädäkuäwänä̧ i̧chä̧kua̧; rü̧ȩnä̧ ujuruku i̧rȩbȩwä̧kua̧ ja̧'wa̧ta̧nü̧ señales-ku, jȩtto̧kü̧ juei jä̧'i̧jü̧ yaparetü jȩä̧kua̧.

¹⁰ Ja̧'wa̧ta̧nü̧ surojümä̧ o'kajuiyünä̧tä̧ jȩä̧kua̧ ro̧ȩkuä̧ra̧'a̧ tti̧'chä̧kuo̧tü̧rü̧ üyaparewa pä'ümä̧, Isopäi'ünä̧ juätümä̧ ra̧wäpi̧jü̧ttü̧ ttü̧ji̧pa̧ pä'ümä̧ isopäi'ünä̧ wȩnȩmä̧ ttesewoka'a ja̧'wa̧ta̧nü̧ tteseta pättoka'a ji̧na̧'a̧ttü̧.

¹¹ Ja̧'wa̧nü̧ ja̧'a̧ttü̧, Dio-mä̧ ja̧'a̧tä̧ topü jua̧u̧ ttü̧ja̧sa̧ yapareäkuäwä i̧sa̧ ja̧'wa̧ta̧nü̧ suronä̧ jȩä̧kuä̧wä̧ i̧sa̧ ukuturu üyaparewa'anä̧, yapare wȩnȩ kuesetätukua pä'ü.

¹² Dio-mä̧ ro̧ȩpä̧kua̧ o'katoi'ünä̧rü̧ isopäi'ünä̧ wȩnȩ tteseta pä'okotü pinä̧tü̧rü̧mä̧ ja̧'wa̧ta̧nü̧ surojütä jȩpü̧ ttü̧ja̧kuo̧mȩnä̧ tta̧'kua̧ a̧di̧wä̧u̧ru̧mä̧.

Jesucrito-rü esetätü ttü̧jü̧ wȩnȩ

¹³ Ja̧'wa̧nü̧ ja̧'a̧nä̧ ujutumä̧ 'kuäopünä̧tä̧ Dio-rü teseu'anü̧ ja̧'a̧ ukuturumä̧, Tu̧ru̧wa̧nä̧ tü̧jä̧wa̧tü̧ rȩpȩtä̧u̧jä̧, isopäi'ünä̧ Dio-mä̧ pojopü ȩmi̧nä̧u̧ kuätukua'attü, ra̧wä̧pi̧jü̧ttü̧ kki̧'ä̧kuä̧wä̧ ä̧kuo̧mȩnä̧ kuȩmä̧tu̧kua̧ pä'ü, Epíritu Sa̧tu̧nä̧tä̧ surojü juikuätukunä̧ ppädäkuäwä i̧sa̧nä̧tä̧ ja̧'wa̧ta̧nü̧ isopäi'ünä̧ wȩnȩ kuesetinä̧tu̧ku̧nä̧.

¹⁴ Pi̧yȩ amükuädü Dio-mä̧ woinä̧u̧jä̧, adiwäjuei jareü wȩnȩ jitäwa'a ä̧ju̧ku̧: Tu̧ru̧wa̧ Jesucrito uruwo jäwä kuȩmä̧tu̧kua̧ pä'ü.

¹⁵ Ja̧'wa̧nü̧ ja̧'a̧ttü̧, chi̧jä̧wa̧tü̧, yabokutä Dio-rü kua̧'kua̧ wȩnä̧rü̧ tätukui ja̧'wa̧ta̧nü̧ ku̧ni̧chi'ätukuä ukuturutä tu̧wo̧juȩti̧nü̧mä̧ ja̧'wa̧ta̧nü̧ wȩyu̧kuojänä̧ wȩyu̧tu̧ wetinümä̧.

¹⁶ Tä'o Dio-mä̧ adiwä i̧sa̧; ja̧'wa̧nü̧ ja̧'a̧ttü̧ ujuturumä̧ eseunu̧ repe'ü ja̧'wa̧ta̧nü̧ a̧'u̧ri̧jo̧mȩnä̧ tta̧'kua̧ ȩmä̧wä̧ beipächokü, ja̧'wa̧ta̧nü̧ ra̧wä̧pi̧jü̧ttü̧ tü̧ji̧pä̧kuȩ jueünä̧ wo̧juä̧wä̧'i̧nä̧ iyinä̧u̧jä̧. Jä'o Dio-rü'i̧nä̧ tu̧ru̧wa̧ Jesucrito'i̧nä̧ jä'epüsä,

¹⁷ 'kuäkuächi'ätuku juiyünä̧ kujurutuku ttiyätukuaku pä'ü 'kuäopünä̧ adiwäjueitä kukuokuätukuä ja̧'wa̧ta̧nü̧ adiwäjueitä jȩ'kuä̧tu̧kua̧.