2 Tesalonicenses 1 - Nuevo Testamento Uwotjüja

Teäwinü̧ wȩnȩ

¹ Ttü Pauru, Silvano-ku, ja̧'wa̧ta̧nü̧ Timoteo-ku ukuturu te'äwätüjä̧ Tesalónica ütawiyättü Igresia jü̧nä̧ wotürü, Dio-ttü'i̧nä̧ Tu̧ru̧wa̧ Jesucrito-ttü'i̧nä̧ todepätürü.

² Tä'o Dio-rü'i̧nä̧ Tu̧ru̧wa̧ Jesucrito-rü'i̧nä̧ jä'epätüjä̧ mippoünä̧ iyäwä ja̧'wa̧ta̧nü̧ unichä̧rü̧ kkä̧kuä̧wä̧ ttiyätukuaku pä'ü.

Suronä̧ jȩpä̧tü̧rü̧ Jesucrito ichomȩnä̧ Dio-mä̧ ro̧ȩpä̧kua̧

³ Chi̧jä̧wa̧tü̧, 'kuäopünä̧tä̧ Dio-rümä̧ teseu'anü̧ ja̧'a̧, ukutunä̧mä̧; isopäi'ünä̧ kua̧'kua̧ ku̧wȩnä̧rä̧tu̧ku̧mä̧ yabokutä rü̧ä̧cha̧'a̧ ja̧'wa̧ta̧nü̧ ujutu ya̧ku̧nä̧ kkorotürü teseäkuäumä̧ yabokutä rü̧ä̧cha̧'a̧.

⁴ Ja̧'wa̧nü̧ ja̧'a̧ttü̧ ukutu kutü'kütukumä̧ Dio-rü esetinä̧tü̧rü̧mä̧ eseunu̧ ji'äwätüjä̧ kua̧mi̧ 'ki'ächi'ü kua̧'kua̧ wȩnä̧rü̧ ku̧ja̧kuä̧tu̧ku̧ wȩnȩtä̧ i̧jȩpä̧tü̧jä̧ kua̧mi̧ 'ki'ächi'ü kua̧'kua̧ wȩnä̧rü̧ ku̧ja̧kuä̧tu̧ku̧tä̧ suronä̧ jȩtta̧ pä'ü tta̧mü̧kuäda'anä̧'i̧nä̧, usurä kuȩmä̧wä̧tu̧kua̧'a̧nä̧'i̧nä̧.

⁵ Pi̧yȩmä̧ i̧jȩkuä̧cha̧'a̧, Dio-mä̧ isopäi'ünä̧tä̧ surojümä̧ jui̧'a̧ pä'ü, ru̧wa̧ Dio weomȩ dottächü'anü̧ wotürü pä̧kua̧mä̧ jua̧u̧tä̧ ja̧'a̧ jua̧u̧ jäwänä̧ jitä usurä ȩmä̧wä̧tü̧.

⁶ Ja̧'wa̧ta̧nü̧ Dio-mä̧ surojümä̧ jui̧'a̧ ja̧'a̧ttü̧ ukuturu usurä kuȩmä̧wä̧tu̧ku̧nä̧ jȩpä̧tü̧rü̧mä̧ ro̧ȩpä̧kua̧,

⁷ ja̧'wa̧ta̧nü̧ ukutu usurä ȩmä̧wä̧tü̧rü̧mä̧ ujutu 'kuä'ächi'ü tü̧'ȩjä̧ma̧ pä'ü iyinü̧ta̧'a̧nü̧ jȩä̧kuä̧u̧jä̧. Tu̧ru̧wa̧ Jesú mo̧ro̧jä̧ra̧'a̧ttü̧ ichomȩnä̧, okurä 'kä̧tȩnä̧ umüwäyotü á̧gȩrȩ-ku̧.

⁸ Ro̧ȩpa̧ pä'ü i̧chä̧kua̧, Dio-rü ttu̧wo̧jui̧pa̧ pä'okotürü, ja̧'wa̧ta̧nü̧ ukuotokotürü adiwäjuei wȩnȩ Tu̧ru̧wa̧ Jesucrito ütü'kü.

⁹ Pitürümä̧ ro̧ȩpä̧kua̧ si'epü i̧kuä̧kuä̧u̧ 'kuäopünä̧tä̧ totteächünä̧, pitümä̧ otó abo do'opü i̧kuä̧kuä̧u̧ Tu̧ru̧wa̧ ü̧jo̧mettü̧mä̧, uruwo kko̧mȩttü̧'i̧nä̧, ujuru kko̧mȩttü̧'i̧nä̧,

¹⁰ Ji̧yȩnü̧ mo̧ro̧ Tu̧ru̧wa̧ ichü mo̧ro̧ umüwäyotü pojopü ȩmi̧nä̧u̧ surojü jui'ätü eseäkuäu ukuo tettäwarü pä'ü. Isopäi'ünä̧ ukutu'i̧nä̧ juätü jü̧ta̧'a̧nü̧ pojopü ȩmi̧nä̧u̧jä̧ esetinä̧tü̧jä̧ adiwäjuei jareü wȩnȩ ujutu jitäwomȩnä̧.

¹¹ Ja̧'wa̧nü̧ ja̧'a̧ttü̧ ukutunä̧mä̧ 'kuäopünä̧ Dio-rümä̧ ukuokuätüjä̧, Dio-rümä̧ jä'epätüjä̧ umüwäyotü jü̧nä̧ pojopü ȩma̧tü̧ pä'ü pä̧wä̧rü̧jü̧ toä'ija'attü̧mä̧ ja̧'wa̧ta̧nü̧ ujurunä̧tä̧ ppädätukuaku pä'ü adiwäjuei ukuturu pä̧wä̧rü̧jü̧mä̧, ja̧'wa̧ta̧nü̧ kuaditäwätuku kua̧'kua̧ wȩnä̧rü̧nü̧ jȩ'kui̧nä̧tu̧ku̧mä̧.

¹² Ja̧'wa̧nü̧ ja̧'a̧ttü̧, Tu̧ru̧wa̧ Jesú i̧mi̧mä̧ ukututtütä ukuomä̧ kkä̧kua̧'a̧, ja̧'wa̧ta̧nü̧ pärokua'aku ukutumä̧ kukuo kkä̧kua̧'a̧ chuttutä Dio-ttü ja̧'wa̧ta̧nü̧ Tu̧ru̧wa̧ Jesucrito rȩrü̧jü̧ toinü̧'a̧kuä̧.