2 Corintios 1 - Nuevo Testamento Uwotjüja

Teäwinü̧ wȩnȩ

¹ Ttü pauru, apóto jü̧nä̧ Jesucrito ȩmi̧nä̧ku̧, Dio-rü pä̧wä̧rü̧jo̧mȩnä̧ ja̧'wa̧ta̧nü̧ cha̧wa̧ru̧wa̧ chi̧jä̧wa̧ Timoteo-ku te'äwätüjä̧, Dio-rü esetätü Corinto ütawiyänä̧ kkä̧tü̧rü̧'i̧nä̧ ja̧'wa̧ta̧nü̧ Acaya rȩjȩnä̧ kka̧kuä̧tü̧rü̧'i̧nä̧ o'katoi'ünä̧rü̧.

² Ukuturumä̧ Tü̧ä̧nä̧wa̧ Dio, Tu̧ru̧wa̧ Jesucrito iyinü, eseäkuäwä'i̧nä̧, wȩnȩ juiyünä̧ kkä̧kuä̧wä̧'i̧nä̧ ku̧ju̧nä̧rä̧tu̧kua̧ pä'ätüjä̧.

Pauru Dio-rü esewinü̧ wȩnȩ

³ Tu̧ru̧wa̧ Jesucrito Jä'orü Dio-rü, rettü ppädäkuäwä kku̧nä̧rü̧rü̧, a̧'u̧ ttuttu jȩpü̧ ikuäwä kku̧nä̧rü̧rü̧, Tü̧ä̧nä̧wa̧ Dio-rü tesewa pä'ütä ja̧'a̧.

⁴ Jua̧u̧tä̧tä̧ ja̧'a̧ ujutu usurä tȩmä̧wo̧mȩnä̧'i̧nä̧ ppä'ädümä̧, ujuturu ppädä'ijüta'anü̧ usurä ȩmä̧wä̧tü̧rü̧ ppätäda pä'ü.

⁵ Jesucrito usurä ȩmä̧wi̧nü̧ta'anü̧ ujutu'i̧nä̧ usurä ȩmä̧wä̧tü̧jä̧; ja̧'wa̧ta̧nü̧ Jesucrito-nä̧tä̧ ja̧'a̧ a̧'u̧ ttutä'ijü aditü ikua'amä̧.

⁶ Ja̧'wa̧nü̧ ja̧'a̧ttü̧, ujutu usurä tȩmä̧u̧mä̧, a̧'u̧ ttukuätuku jȩä̧cha̧ pä'ü ja̧'a̧ ja̧'wa̧ta̧nü̧ surojüttü ku̧ji̧pä̧tu̧kua̧ pä'ü; ja̧'wa̧nü̧ ja̧'a̧nä̧ Dio-tä ja̧'a̧ ja̧'wa̧nü̧ ukutu a̧'u̧ ttukuätukua'a ppätädünä̧ jȩpü̧mä̧; ja̧'wa̧ta̧nü̧ ukuturu'i̧nä̧ usurä kuȩmä̧wä̧tu̧kua̧'a̧nä̧ kua̧mi̧ 'kikuächi'ätükunä̧ pä̧dä̧kuä̧u̧jä̧.

⁷ Ja̧'wa̧nü̧ ja̧'a̧ttü̧, ukuturumä̧ jueünä̧tä̧ tesetünä̧ jä̧u̧jä̧, jua'amä̧ ujututäku yo̧mȩtȩnä̧ usurä kuȩmä̧wä̧tu̧ku̧ta̧'a̧nü̧, jua̧u̧ a̧'u̧ ttukuätuku'i̧nä̧ jȩpü̧ i̧kuä̧kuä̧u̧jä̧ pä'ü.

⁸ Isopäi'ünä̧ chawaruwä chi̧jä̧wa̧tü̧, Asia-ttü usurä temä̧wi̧nü̧mä̧ ku̧wo̧juä̧tu̧kua̧ pä'ätüjä̧; täkü tujuru jä̧ji̧'i̧nä̧ jui'ätütä päti'ünä̧, a̧'kua̧ro̧ko̧tü̧jä̧kü̧ pätünä̧ päi'ünä̧ usurä ȩmä̧wi̧nä̧tü̧jä̧.

⁹ Täkü tote'ächa pä'ütä jȩpü̧ kku̧nä̧wo̧tü̧jä̧kü̧ pätünä̧ päi'ünä̧ winä̧tü̧jä̧, jua'amä̧ ujututä ta̧mü̧nä̧ pa̧ja̧tü̧ ta̧'kua̧ tu̧wȩnä̧rä̧kuä̧u̧ juiya pä'ü ji̧na̧'a̧, Dio, wa'arettü tto'ädürütä ta̧'kua̧ tu̧wȩnä̧ra̧ pä'ü.

¹⁰ Jua̧u̧tä̧tä̧ ja̧'a̧ ra̧wä̧pi̧jü̧ttü̧ rä'epü ikuinü̧mä̧, rä'epü ikumä̧, ja̧'wa̧ta̧nü̧ 'kuäopünä̧tä̧ ra̧wä̧pi̧jü̧ttü̧ rä'epü i̧kuä̧kua̧mä̧;

¹¹ ujuturu, Dio-rü ukuoku ppä'ädätukuitü. Isopäi'ünä̧ rekuätü Dio-rü kukuokuätukuttümä̧, rekuätü Dio-rü ukuoku tteseäkuäwäkuä̧u̧jä̧ ja̧'wa̧ta̧nü̧ Dio-rü ttesewäkuotü adiu ppäda'attü.

Pauru, Corinto-ra̧'a̧ i̧'cho̧kü̧ ji̧nü̧

¹² Isopäi'ünä̧ ujutumä̧ ukuo te'äkuäu eseäkuäwätüjä̧, pi̧jä̧ ttü̧ja̧ ttä'ka jo̧mȩttü̧ amükuädü totomȩnä̧ wȩnȩ jui̧yä̧u̧ ja̧'wa̧ta̧nü̧ ukutu kuä'katukuttü'i̧nä̧ surojü juiyomȩnä̧, jueünä̧tä̧ Dio päü'a̧kuä̧ jȩti̧na̧'a̧ttü̧, pi̧jä̧ ttü̧ja̧ ttu̧wo̧juo̧mȩnä̧mä̧kü̧; ujututä tu̧wo̧juo̧ko̧mȩnä̧ Dio ppädomemȩnä̧tä̧ jȩti̧na̧'a̧ttü̧.

¹³ Ukuturu wȩyu̧tu̧ wetomȩnä̧mä̧, kukuokuätuku juiyü'anü̧ jü̧mä̧, ku̧wo̧jui̧pä̧tu̧ku̧ juiyü'anü̧ jü̧mä̧ we'okotüjä̧; päjuriyänä̧mä̧ ttu̧wo̧jui̧pä̧kuo̧tü̧ pä'ü tta̧'ä̧rü̧sä̧;

¹⁴ Jitä ku̧wo̧jui̧pä̧tu̧kuo̧kü̧mä̧. Tu̧ru̧wa̧ Jesucrito ppa̧wä̧cho̧mȩnä̧ ujuturu kueseäkuäwäkuotüjä̧; ujuturu, pärokua'aku teseäkuäwuöta'anü̧.

¹⁵ Pa̧'a̧nü̧ amükuädü, ä̧kuo̧mȩnä̧mä̧, ukuturu dodächächa pä'inü̧sä̧, yȩnȩta̧'a̧nü̧'i̧nä̧ kueseäkuäwätukua pä'ü,

¹⁶ juorü kkä̧nü̧mä̧, Macedonia rȩjȩra̧'a̧ i̧wo̧po̧'ü̧ i̧wi̧pü̧'ka̧, ukutu ku̧jä̧tu̧kuo̧mȩnä̧ pä'äjita'anü̧ 'kuädopa pä'ü, Judea rȩjȩra̧'a̧ chi̧'cho̧mȩmä̧ ukututä ppäkuädätukuattü pä'ü.

¹⁷ ¿Ja̧'wa̧nü̧ ja̧'a̧ttü̧, pi̧yȩ jȩcha̧ pä'ü chamükuädomȩnä̧mä̧, adiu amükuädoka'a jȩpä̧ji̧ päkuätukua'a tä̧jí̧? ¿Kkorotü o'katoi'ünä̧ jȩttä̧'i̧jü̧'a̧kuä̧, A̧ pä'ipü̧'ka̧, juȩnȩ o'komȩnä̧, täkü päda pä'ü? ¡Ja̧'wa̧nü̧mä̧kü̧!

¹⁸ Ja̧'wa̧nü̧ ja̧'a̧nä̧, Dio-mä̧ jueünä̧tä̧ wa̧ ja̧'a̧ttü̧, ukuturumä̧ todärenä̧mä̧ ukuokuokotüjä̧.

¹⁹ Isopäi'ünä̧, Dio I̧tti̧ Jesucrito, Silvano-ku̧'i̧nä̧, Timoteo-ku̧'i̧nä̧ ujutu, ukuturu jitäwinä̧ku̧mä̧, todärenä̧mä̧ ji'äwokü pinü̧, Ya'utekutä «A̧» pä'inü̧.

²⁰ Ja̧'wa̧nü̧ ja̧'a̧ttü̧, o'kajuiyünä̧tä̧ Dio chi̧yä̧kua̧sä̧ päinü̧mä̧ ja̧'wa̧nü̧tä̧ 'kuäopa'a, chunä̧tä̧mä̧, ja̧'wa̧nü̧ ja̧'a̧ttü̧ Dio-rü tesewomȩnä̧, Crito-nä̧mä̧ «Amȩ́» pä'ätüjä̧.

²¹ Ja̧'wa̧nü̧ ja̧'a̧ttü̧ Dio-mä̧ Crito-nä̧tä̧ ujuturu'i̧nä̧, ukuturu'i̧nä̧ ji̧nä̧ yotüte jü̧nä̧ juo'epü, 'kȩ'ȩpü̧ u̧ju̧nä̧u̧jä̧, Chutätä ȩmi̧nä̧u̧jä̧

²² ja̧'wa̧ta̧nü̧ Jua̧u̧tä̧tä̧, sello-nä̧ jȩpü̧ u̧ju̧ni̧nä̧u̧jä̧, Chutä isotü ta pä'ümä̧: Ja̧'wa̧nü̧ jȩpü̧mä̧ Epíritu Sa̧tu̧rü̧ iyinä̧u̧jä̧ ta̧mi̧ iso'kinä̧.

²³ Ja̧'wa̧nü̧ ja̧'a̧nä̧, ji̧nä̧ Corinto ütawiyära̧'a̧mä̧ do'ächü ichokü pinü̧sä̧ ukuturu ukuotü, ¡wä̧i̧nä̧ Dio-mä̧ cha̧'kua̧rü̧ ȩmü̧ ikuäkusä!, yapare jidäuttümä̧.

²⁴ Ukutu kua̧'kua̧ ku̧wȩnä̧rä̧tu̧ku̧nä̧ wetamä̧ pätoka'anä̧, yabonü̧ kuesewätukunä̧ ppätäda pä'ätüjä̧, täkü 'kiyünä̧ kua̧'kua̧ wȩnä̧rü̧ ku̧jä̧tu̧kua̧'a̧ topü.