1 Timoteo 1 - Nuevo Testamento Uwotjüja

Pauru teäwinü̧ wȩnȩ

¹ Jesucrito u̧mü̧wä̧ya̧ Apóto Pauru-mä̧, Tü̧ä̧nä̧wa̧ Dio surojüttü tü̧ji̧pü̧nä̧ jȩpü̧ weäwänä̧ weinä̧ku̧ ja̧'wa̧ta̧nü̧ Jesucrito tta̧tä̧rä̧ku̧nä̧,

² Isopäi'ünä̧ tta̧'kua̧ wȩnä̧rä̧kuä̧wä̧ i̧tti̧ Timoteo-rü te'äu. Tä'o Dio-tä ja̧'wa̧ta̧nü̧ Tu̧ru̧wa̧ Jesucrito-tä, mippoünä̧ iyäwämä̧, re kkä̧kuä̧wä̧mä̧, wȩnȩ juiyünä̧ kkä̧kuä̧wä̧nä̧ iyätukuakujä̧.

To'i ja̧'a̧ku̧ ttu̧wo̧juȩtü̧ ji'äwinü̧

³ Macedonia rȩjȩra̧'a̧ 'chä̧nü̧ kkä̧nü̧ jidäwinü̧ta'anü̧, ukumä̧ Éfeso ütawiyänä̧tä̧ kkä̧wi̧, yapare wȩnȩ ttü̧wo̧juȩta̧'a̧ku̧,

⁴ täbokü wȩnȩ, tä̧do̧tü̧ mi̧nä̧ ttü̧ja̧kui̧nü̧ wȩnȩ'i̧nä̧, yotukunä̧ yapare wȩnȩ ttu̧wo̧juȩtü̧ juiyünä̧ jikuäwäkua'anü̧. Ja̧u̧mä̧ pä'ä'chäkuäu kkä̧kuä̧wä̧ra̧'a̧tä̧ oipü, ja̧'wa̧ta̧nü̧ Dio amükuädinü̧nä̧, tta̧'kua̧ wȩnä̧rü̧ kkä̧kuä̧wä̧ ttu̧wo̧jui̧pa̧ pä'ümä̧ ppädokü.

⁵ Ja̧'wa̧ta̧nü̧ pi̧yȩ weäwä wȩnȩttü̧ i̧rȩbȩwa̧ päümä̧, tta̧mi̧so'ki surojü juiyo'kittü kkorotünü̧ku̧ eseäkuäwä'i̧nä̧, adiwomȩnä̧ amükuädäkuäwä'i̧nä̧, isopäi'ünä̧ tta̧'kua̧ wȩnä̧rä̧kuä̧wä̧'i̧nä̧ räopa pä'ü ja̧'a̧.

⁶ Yotukunä̧mä̧ pi̧yȩ wȩnȩttü̧ 'kȩ'i̧pä̧chü̧, mikuäwokünä̧tä̧ pä'ä'chäkuäu to'e'ächinä̧tü̧.

⁷ Dio weü wȩnȩ wo̧juȩkuä̧ isotü ttü̧ja̧kua̧ pätta'anä̧, jitütä tta̧mü̧nä̧ ttukuoku'i̧nä̧, ttu̧wo̧juȩtü̧'i̧nä̧ isopäi'ünä̧ jü̧nä̧mä̧ wo̧jui̧'o̧ko̧tü̧.

⁸ Ja̧'wa̧nü̧ ja̧'a̧nä̧ weäwä wȩnȩmä̧, adiwäjuei ja̧'a̧ tti̧rȩbȩwa̧ pä'ü amükuädü ttu̧ju̧ni̧nü̧'a̧kuä̧ jȩtto̧mȩnä̧tä̧ pä'ümä̧ wo̧juä̧tü̧jä̧.

⁹ Weäwä wȩnȩmä̧ ji̧yȩtȩ'i̧nä̧ adiu jȩpä̧tü̧rü̧mä̧ iyäwoka'a pä'ü ttamükuäda pä'ü ja̧'a̧. Ja̧'wa̧nü̧ ja̧ju̧ jueimä̧ pä̧i̧kuä̧tu̧rü̧tä̧, ukuotokotürütä, suropätürütä ja̧'wa̧ta̧nü̧ surojü jȩpä̧tü̧rü̧tä̧, Dio-rü'i̧nä̧, ttesetü'i̧nä̧ ukuotokotürütä, ttä'orü ja̧ pä'ü'i̧nä̧, tta̧ju̧ru̧ ja̧ pä'ü'i̧nä̧ kuä'ü ikuätürütä, ttü̧ja̧rü̧ kuäwä isotürümä̧ o'katoi'ünä̧rü̧tä̧ iyäwä ja̧'a̧.

¹⁰ Ja̧'wa̧ta̧nü̧ irekua wokojuku kkirekuo woküku jȩpä̧'chä̧tü̧rü̧'i̧nä̧, u̧mä̧tü̧ ttawaruwä u̧mä̧tu̧ku̧ jȩpä̧'chä̧tü̧rü̧'i̧nä̧, ttü̧ja̧rü̧ nä̧u̧kuä̧rä̧tü̧rü̧'i̧nä̧, yaparewätürü'i̧nä̧, ja̧'wa̧ta̧nü̧ kkorojueinä̧ i̧mi̧nä̧ wȩnȩtü̧ ttesetünä̧ jȩpä̧'chä̧tü̧rü̧'i̧nä̧ ja̧'wa̧ta̧nü̧ adiwäjuei wȩnȩ ttu̧wo̧juȩtü̧ to'ija̧'a̧ku̧ wo̧juȩtä̧tü̧rü̧'i̧nä̧.

¹¹ Pi̧yȩ ja̧'a̧ Dio eseäkuäwä kku̧nä̧rü̧ adiwäjuei wȩnȩ chu̧wo̧juȩta̧ pä'ü ttürü weinü̧mä̧.

Pauru-rü Dio rȩrü̧jü̧ toinü̧ wȩnȩ

¹² Chujuru iyinü̧ chu̧ru̧wa̧ Jesucrito-rü eseusä, jua'amä̧ aditäwänä̧ chadita pä'ü a̧'kua̧ i̧wȩnä̧ri̧no̧mȩttü̧,

¹³ ä'kojimä̧ churutä to'ija̧'a̧ku̧ suronä̧ ppädä'chia'anä̧, suronä̧ amükuädü chusina'a̧nä̧, ja̧'wa̧ta̧nü̧ suronä̧ wochina̧'a̧nä̧, Dio-mä̧ rȩrü̧jü̧ toinä̧ku̧sä̧, jua'amä̧ Dio-rü esetü jui'ü, jȩchü̧mä̧ chieruwa'attü̧.

¹⁴ Ja̧'wa̧nü̧ ja̧'a̧ttü̧ Dio-mä̧ rü̧ä̧nä̧ repe'ümä̧ suronä̧ jȩchä̧'i̧jü̧'i̧nä̧ jȩpü̧ iku, Jesucrito-nä̧tä̧ tta̧'kua̧ wȩnä̧rä̧kuä̧wä̧'i̧nä̧ eseu repeäkuäwä'i̧nä̧ iyinä̧ku̧sä̧.

¹⁵ Pi̧yȩmä̧ isopäi'ünä̧tä̧ ja̧'a̧ttü̧ o'katoi'ünä̧tä̧ kuesetätukua'anü̧ ja̧'a̧: Jesucrito-mä̧ pi̧jä̧ra̧'a̧ ichinü̧ suronä̧ jȩpä̧tü̧rü̧ ttü̧ji̧pü̧nä̧ ppä'ädü, juätüttü ya̧tȩ ä̧kuo̧mȩnä̧ suronä̧ jȩpi̧nü̧mä̧, ttü ja̧'a̧.

¹⁶ Ja̧'wa̧nü̧ jȩchi̧na̧'a̧nä̧'i̧nä̧ Dio-mä̧ rȩrü̧jü̧ toinä̧ku̧sä̧, Jesucrito a̧mi̧ 'ki'ächi'ünü̧ o'kajuiyünä̧ ttünä̧ i̧jȩpa̧ pä'ümä̧. Ja̧'wa̧nü̧tä̧ ttü jȩchü̧ta̧'a̧nü̧ jȩpü̧ esetätümä̧ kkä̧kuä̧wä̧ i'ko ttu̧ju̧nä̧ra̧ pä'ütä ichinü̧sä̧.

¹⁷ ¡'Kuäopünä̧tä̧ kkü̧ Ru̧wa̧rü̧, topäkuäwokü ya̧tȩtä̧ Dio-rü ukuotü tesewätukua! Amȩ́.

¹⁸ Chi̧tti̧, Timoteo, pi̧yȩ wedäkujä̧ kurä adiwäjuei kurowäwa pä'ü kua̧'kua̧ wȩnä̧rü̧ kkä̧nü̧, adiwomȩnä̧ amükuädü, 'kuäopä̧kuȩ wȩnȩ uku kutü'kü jittäwinü̧'a̧kuä̧.

¹⁹ Yotukunä̧mä̧ tta̧mü̧kuädü pä̧wä̧rü̧ja̧'a̧ku̧ jȩpü̧ tta̧'kua̧ wȩnä̧rä̧kuä̧wä̧mä̧ to'e'ächinä̧tü̧.

²⁰ Pi̧yȩmä̧ Himeneo-rü'i̧nä̧, Alejandro-rü'i̧nä̧ 'kuäopinü̧, juätümä̧ Satanás-rü̧ iyü chi̧kui̧nä̧u̧ Dio-rümä̧ to'ija̧'a̧ku̧mä̧ pä'ä'chäkuäwokü pä'ü ttu̧wo̧jui̧pä̧kua̧'a̧nü̧.