YOSWÖ 8 - PIPÏLIA

¹ Kïmwochï ECHOTYON Yoswö lö, “Mewagh anta meghïn mu, mïta pipö lïk apusta Ai, kotönön moriku pöytoghinto Ai nko pikachi nko kanasyantenyi nko korenyi.

² Ighchï Ai nko pöytoghintenyi le wölo kidenyi Yeriko nko pöytoghintenyi. Wölo lïku pöröwekwa twachi nko tïkuchi. Itö nyu pich kulep akupokyï kanasyan ompö wölo le löt.”

³ Kïwö Yoswö nko pipö lïk löwïr kïpusta Ai akïkïl Yoswö pipö lïk 30,000 cho le nyökon akïyonta kïpa oghö.

⁴ Kïmwochï lö, “Opetekwa osyepsïyi. Ompö kanasyan wölo le löt amölowöchitu, wölo otïpï kïpsach.

⁵ Angwïnan nko piköchan löwïr kerich kanasyan akï nyini kölïtu kupokï le atanya, keryecha ompö tawungwa.

⁶ Yonecha nyu chane ntökïtenö kïlowöchitunö kanasyan, ompöwölo lentöy chane, ‘Karyaghenecha le atanya.’ Kïlenyona kïpïsinecha kïyonecha.

⁷ Atolapay angetakwa nyu ompö kisyepöt anam kanasyante, ompöwölo töni ECHOTYON Tororötïnkwa morikwa.

⁸ Akï nyini kanamakwa kanasyante ape, kïrïp kegh nko ngölyonto ECHOTYON nyo kimwowokwa. Orip nyu ngalechï lasiny.”

⁹ Kïyonta Yoswö chane, kïpa nyu kïtïpï kwenu Petel nko Ai, okumpö ta ompö Ai akusyepisyö, wölo kitöpö Yoswö oghononi nko pich.

¹⁰ Kïnget Yoswö tökwoghö akïghamït pipö lïk atolapay kïpusta nyinte nko poyi Israel kuntöghogha pich kïpa Ai.

¹¹ Kipusta nyu pich löwïr cho pö lïk nko nyinte akïpa kïrich kanasyan akïtek möngot okumpö ewu löt ompö Ai akimi mpöghoghyö kwenungwa nko Ai.

¹² Kïyonta pich cho ngata nyïngwïn mut, kusyepisyö ompö kwenu Petel nko Ai okumpö ta.

¹³ Atolapay kutö pich nyu löwïr kïtöpï kanasyan okumpö löt nko pikökwa cho kisyepisïyi cho kimi okumpö ta, wölo kïrï Yoswö mpöghoghyonay oghononi.

¹⁴ Otini kisïwa pöytoghinto Ai nko pikachi pipö Yoswö kïnap kegh lawel kïpa kïporyö nko pipö Israel ngat ompö mpöghoghyo Arapa, amelö kinkït lö kimi pich cho kisyepo nyinte kanasyan löt.

¹⁵ Kwigh kegh Yoswö nko pikachi löwïr le pich cho kakerïnta akïryagh kutang wölo le surkwen.

¹⁶ Kekur nyu pich löwïr cho kimi kanasyan kïpka kïyon chane, kïlenyona otini kimi kïyonotoy Yoswö, kïlöwöchitu ompö kanasyan.

¹⁷ Amelö kingötï chi ompö Ai nyo kimöwönye kïyonota pipö Israel, kipïstö nyu kanasyante kïyatate akïyonota chane.

¹⁸ Atolapay kïlenchï ECHOTYON Yoswö, “Ghïtenö ngotïngu kïparta Ai, ompöwölo otöninan moriku kanasyantanoni.” Kughïtö nyu Yoswö ngotïnyi kïparta Ai.

¹⁹ Nyini keghïtö nyinte ewunyi kïnget pïchay lawel kesyepisïyi kïryagh akïlït kanasyantanay, kïnam akïpel panini.

²⁰ Nyini kilö pipö Ai kirosï löt, kïsïwa lö poto ighöt nyo kighönö kanasyan kwit yïm, mökïnyorïcha wölo chïwïto ompöwölo keyokï mötöwöy pipö Israel akïporyeghö chane.

²¹ Otini nyu kisïwa Yoswö nko pikachi lö, kinam pïchay kanasyan kesyepisïyi akïsïwa igho kanasyantanay kiwö yïm, kuyoda kegh kïpar pïchay pö Ai.

²² Kipka chay kömi kanasyan kutöngwï wölo mi pipö Ai akerikyï nyu kwen. Kipkana walaka onkunï kïpkana walaka onkuninö, kïpar pipö Israel chane lömïs, möminye ompö akong nyo kisöp anta chïwït,

²³ kïpoto pöytoghinto Ai. Kinam chane nyinte kïsatate akumït wölo mi Yoswö.

²⁴ Otini kiwang pipö Israel kïpar pipö Ai löwïr ompö surkwen wölay köyonchï chane, kïmïlisyö nyu pipö Israel löwïr Ai akïpar cho kingötï.

²⁵ Kiwonyö pipö Ai löwïr cho le nyïngwïn taman nko odeny, mïrön nko kor.

²⁶ Melö kinyakïm Yoswö ewunyi nyo kisyolöy ngotïnyi ntökïtenö kepar pïchay löwïr kimöngöy Ai.

²⁷ Kïcheng pipö Israel tïch nko tïku walaka kilïkwï pöröw, kïrïp kegh nko ngölyonto ECHOTYON nyo kimwochï Yoswö.

²⁸ Atolapay kïpel Yoswö kanasyanta Ai kïlïkwï kïratyan nko ye.

²⁹ Kuwusö Yoswö pöytoghinto Ai ket, ntökwimön. Otini kiröytö asis kïmwatïta Yoswö ketyorï portanyi. Akewirchï ara kanasyan aketïkimchï koghïn cho echön cho tökïmi nko ye.

Kakisomön kirurut ompö kutïng pö Epal

³⁰ Atolapay kïtekyï Yoswö ECHOTYON Tororöt pö Israel ato kïpelo amöros ompö kutïng pö Epal,

³¹ Le wölo kimwochï Musa mötworinto ECHOTYON pipö Israel. Kikikir ompö kirurut pö Musa lö, “Kikïtek ato kïpelo amöros ompö koghïn cho melö kikipata karïn.” Kutötö ompö atoni amöros kïpelöy nko amörostin cho kïpelöy cho pö pöghisyö.

³² Kukirchï Yoswö koghichoni kirurut pö Musa ompö tawu pipö Israel.

³³ Atolapay kughyö pipö Israel löwïr nko pich cho le to nko poyikwa nko yetïntinekwa nko kirwokikwa ompö onkunï nko onkuninö kïmi kwenungwa Santuku Muma* ECHOTYON nko pipö Lawi cho le tïsï cho kisïtöy. Kipörtoy walaka kutïng pö Kerisim, kïpörtoy walaka kutïng pö Epal, lenyini kimwa Musa mötworinto ECHOTYON lö, kïnyoghöy kesoyönöy pipö Israel.

³⁴ Atolapay kusomön Yoswö ngal löwïr cho pö kirurut, kisoyönut nko chïput le otini kikikir ompö kitapu Kirurut.*

³⁵ Melö mi ngölyon ompö ngal löwïr cho kimwa Musa nyo melö kisomön Yoswö ompö tawu tuyot kïmïkul, kïmi korï nko monïng nko pïnot cho kimang kwenungwa.