YOEL 3 - PIPÏLIA

¹ Mwoghöy Tororöt lö, “Oyokyinan Yerusalem nko Yuda ororyenyi nyo pögh tagh pöghetunoni pö osiswechoni.

² Oghömïtan pipö punton löwïr aronkyan mpöghoghyo Yeosyapat arwokyan chane ompö wöloni, akwompö parakuto piköchan Israel cho kitoytoyö chane kïghömï koros akïngötörchï kegh korenyan.

³ Akwam mogh kïchagh piköchan, akutötö worö tökïwala chepkartayan, akwalta työ tökïnyorï dipay* cho gheghöy.

⁴ “Ochikwa ngo ompö ani nya Tiro nko Sidon nko koroswo Pilistia? Ayo mi kïgh nyo omökekwa oghokwanïn? Nyo ato mi kïgh nyo oyokwanïkwa, ayokwokwa nyu lawel kïrïp kegh nko wölo lata ighisyewutkökwa.

⁵ Ompöwölo kyoritökwa silpenichan nko koltinechan orityikwa sïkönötenyan korikwo pö saghat.

⁶ Kyopökwa pipö Yuda nko Yerusalem oltochï pipö Krik anategha kïlowöchitunö korengwa.

⁷ Oyokunan chane kïpkana koroswechoni kyolchikwa, ayokwokwa apele ompö kïgh löwïr nyo kyoghchikwa chane.

⁸ Onkoghchinan werkökwa nko tipikwa werpö Yuda kwalta kwoltochï Sapea, kor nyo low nyoman. Mwoghöy ECHOTYON.

⁹ “Amwatïtena kïghömi pipö punton Aghama lïk lö, ‘Achera nyökon. Akanya kïrikwï mïrön pö lïk lapay, akanya kïpka kïkïtïngö tagh.

¹⁰ Atanga köpompöyikwo kïlïkwï chokon, atang orököntinekwo kïlïkwï ngötwö. Nya kïcher kegh tïkwïl chi nyo nyakor kïmwa lö, “Ochan tïkwïl nyakan.”

¹¹ Apkana okelunö akwa tïkwïl pipö punton cho kyamang kuwit osupchinö kegh mpöghogh.’ ” Tyorunö nyökonko lïkengu, we ECHOTYON!

¹² “Nya kuywal kegh puntonï akïpka mpöghoghyo Yeosyapat. Ompöwölo atoni ato otöponan orwokyini punton löwïr cho kimang kuwit.

¹³ Ay achenga rotwo kasa, kirïr pagh. Ape atïkatena kinyïghï rökor wölo kïpïro dipay kikutïtoy tökolwö ay lecha choni ngokikwa chang tya.”

¹⁴ Söpïchis nko söpïchis cho mi mpöghogh nyo kïmuto ngal. Ay, kikïlekïtit asispa ECHOTYON, ompö mpöghogh nyo kïmuto ngal.

¹⁵ Wengöy asis nko arawa kïtuwöchitu, akumis löpoyïn pö kokel.

Soyönöy Tororöt pikachi

¹⁶ Akïtïlö ECHOTYON Sayon* akïngalan nyoman kelïma Yerusalem kutimtimö yïmö nko ngwïny.

¹⁷ “Onkïtunekwa nyu lö ochan ECHOTYON Tororötïnkwa nyo omöngöy Sayon kutïngtönyan nyo tïlil. Akïtïlilitu Yerusalem amökïtïkönye pïnotyontö orinyi ngat.

¹⁸ “Akwompö asisoni yinuno kutïnkot dipay cho kirïr, kuyinuna ronkotïn chö, akuyintoy lalwatïna Yuda lapay, akïghyögho kompa pögh Kö pö ECHOTYON Tororöt.

¹⁹ “Kighöy Misri kïlïkwï kïratyan akegh Edom kïlïkwï köpöryon nyo kimïl ompöwölo kipokyï pipö Yuda kïporyeghö akïmïltegha pich kisön ompö korengwa cho puryö lelut.

²⁰ Wölo lïku Yuda möngot kokay akïlïkwï Yerusalem möngo lenyoni kurel pïnwöy lapay.

²¹ Otökan kisön pö pipö Yuda amopïstenanye pich cho tïng lelut kïchïwïtyö ompöwölo omöngan ECHOTYON Sayon.”