YOANA 13 - PIPÏLIA

¹ Otini kitomönye kwitïta asis nyo wow nyo pö Ichon pö Pasaka* akinkït Yeso lö kikwitïta sayenyi nyo ngeto nyinte ngwïnyinete atökïwö wölini mi Kwanta. Kökicham nyinte osis lapay pich cho le chechi cho mi ngwïnyinete, kicham chane nyoman ntökwit söröm.

² Kökikutö nyu Onyötö Yudas Iskariote Wero Simon, machat nyo wïchtoy Yeso otini kimi Yeso kwomöy omisyo nangat nko kinetankachi.

³ Kinkït Yeso lö kikikutö Paponyi tïkwïn löwïr morichi akinkït lö kingwïna nyinte wölo mi Tororöt akïwetöy ngat wölini mi Tororöt.

⁴ Kïlenyona kïngeta Yeso omisyonay akutö yona sïrokachi akïkörmön ananka.

⁵ Atolapay kuyin pögh otupö akutor kuwun kelyeko kinetankachi akïmisa anankanoni kikörmönö kegh.

⁶ Otini kitïta wölo mi Simon Petro kïlenchï Petro, “Imökenyi wune kelyechan so, Echotyon?”

⁷ Kuyokyï Yeso lö, “Möpköchininyinye kïgh nyo oghan otï le ye, wölo tenkïtunenyi ato le soya.”

⁸ Kïlenchï Petro, “Mewunenyinye kelyechan kokay.” Kuyokyï Yeso nyinte lö, “Kwato mowunönye kelyeku kïmelö telïkunenyi kinetanenyan ngat.”

⁹ Kuyokyï Simon Petro lö, “Echotyon, mwatante amelö kelyön opïn wölo morïn nko mötït tïkwïl!”

¹⁰ Kïlenchï Yeso, “Chi anka tïkwïl nyo kakuwun kegh, kïmökïmökönye kuwunöy kegh ngat, kïpoto kelyechi, ompöwölo wunote nyinte. Ochikwa tïlilöch, wölo melö akwa löwïr.”

¹¹ (Kikikunkïtï Yeso chichoni wïchtoy nyinte nka nyoni kilö, “Ochikwa tïlilöch, wölo melö akwa löwïr.”)

¹² Otini kiwany kuwun kelyekwa, kulach Yeso sïrokachi akïmïla ataye kötöpo le mesa. Kïtep chane lö, “Köpköchokwa kini kaghwakwa nya?

¹³ Okurenanïkwa konetin nko Echotyon akïmïchinokwa okuranïn lenyoni, ompöwölo ochan.

¹⁴ Kwato ochan Echotyon, achï konetin, akwanyï kowunwokwa kelyön ye, kïmïchinokwa tïkwïl owunchinö kegh kelyön.

¹⁵ Ompöwölo koporwokwa körkeyïn nyo orïpöy atagha kïyoni kaghwakwa.

¹⁶ Omwowokwa nyoman lö, möminye sekeyontö nyo wow kïsir echotyontenyi, amöwownye nyo kïyontoy kïsir chichini kayonta nyinte.

¹⁷ Kwato konkïtukwa ngalechoni, ochikwa soyönote ato arïpakwa!

¹⁸ “Melö ongölonan ompö akwa löwïr, onkïtön pïchoni kakïlan, wölo itïtoy lö, man ngala Kikirut cho lentöy, ‘Kiwaghaka kïporyeghenanïn nyini kyomisïyan tïkwïl.’

¹⁹ Kanyaghan omwowokwa ye kïtomö kwighisyö ngalechoni, töto itïta amukakwa nyu aghan lö, ‘Ochan nyinte.’

²⁰ Omwowokwa nyoman lö, chi anka tïkwïl nyo toköy chi kïtïkon nyo oyontonan, kïtokanïn tïkwïl akwanka tïkwïl nyo tokanïn, kïtoköy nyinte nyini kiyokwanïn.”

Kangor Yeso lö kïwïchtoy nyinte

²¹ Otini kiwany Yeso kïmwa ngalechoni, kïsïch nyarïl ompö mïkulöwunyi. Kïmwa kïlöpo lö, “Omwowokwa nyoman lö wïchtonanïn chi akong ompö akwa.”

²² Kuros kegh kinetankachi akï wöngisyö akimenkïtcha lö eki ngo nyini kingölono nyinte.

²³ Kimpuröy kamasu Yeso kinetanenyi akong nyo kichömöy Yeso nyoman.

²⁴ Kïlenyona kughïtö morïn Simon Petro akïtep lö, “Tepune lö ngo nyini ngölono nyinte.”

²⁵ Kunayta kinetananoni kïrich Yeso lasiny akïtep lö, “Ngo nyinte nya Echotyon?”

²⁶ Kuyokyï Yeso lö, “Chichoni otöninan pïtöno makatyan nyo onönokonan tïwan, nyinte nyoni.” Kïlenyona kïcheng pïtöno makatyan akunönochö tïwan akutö Yudas, wero Simon Iskariote.

²⁷ Otini kicheng Yudas pïtönononi, kïlït Onyötö nyinte. Kïlenchï Yeso Yudas, “Igha lawel kini imököy ighe.”

²⁸ Kimöminye chi nyo le ompö akonga ompö pïchoni kitïpisot mesa kwomisïyi nko Yeso nyo kinkït lö ompö ne tökïmwochï Yeso nyinte lenyoni.

²⁹ Akwompöwölo ki Yudas nyo kiripöy mïleto ropïyen, kïlö kinetankachi walaka töptoy kömwochï Yeso nyinte kïwö kwal tïkwïn cho kakïmöcho omisyo Pasaka anta katep ana nyinte kutö kïgh pich cho le mey.

³⁰ Kïtak nyu Yudas pïtönonay pö makatyan akïwö sany lawel. Akökituwit atoni.

Kirurut nyo rel

³¹ Otini kökikïwechï kegh Yudas, kïlö Yeso, “Kakitöror ye nyu Wero Chi aketöror Tororöt tïkwïl ompö nyinte.

³² Kïkany kakengongunö töroryo Tororöt orito Werïnyi, kuporu nyu Tororöt töroryeto Werïnyi ompö orinyi kegh akwighöy lenyoni lawel.

³³ Monechu cho mïnkech, melö tökïkogh ato omitan nko akwa. Oyöranïkwa wölo akïle wölanye kyomwochan kintöghoghi pipö Yaudi lö, ‘Mopetekwanye wölini owetan.’

³⁴ Okonokwa kirurut nyo rel lö, achama kegh kïle wölini kyachamtakwa acham kegh akwane.

³⁵ Ato achamakwa kegh akwane, kunkïtu nyu pich tïkwïl lö ochikwa kinetankachan.”

Kangor Yeso lö tiyot Petro nyinte

³⁶ Kïtep Simon Petro nyinte lö, “Iwetenyi onö nya, Echotyon?” Kuyokyï Yeso nyinte lö, “Memukenyinye rïpanïn otï le ye wölini owetan, wölo terïpkaninyi asistanka.”

³⁷ Kïtep Petro lö, “Echotyon, ompö ne tömomukan orïpinyi otï le ye? Omitan kïpsach amegh nko nyi!”

³⁸ Kïlenchï Yeso Petro, “Omwowunyi nyoman lö itiyonaninyi kïnyïl sömök kïtomö kïwach kïrpö kokoroch.”