YOANA 1 - PIPÏLIA

Kiwaghaka Ngölyon kïlïkwï chi

¹ Otini le towunöto yïm nko ngwïny, kï kimi Ngölyon, akimito Ngölyontononi nko Tororöt, aki Tororöt Ngölyontononi.

² Kimi Ngölyontononi nko Tororöt kïngeta towunöt.

³ Kikigh tïkwïn löwïr kuwerï nyinte akï ntömö nyinte tömöminye kïgh nyo kikigh nyo kitökighöy.

⁴ Kimi söpon nyinte aki löpoyïn pö pich söpononi.

⁵ Lïwchini löpoyïnoni tuwïn amemukönye tuwïn kumisöy löpoyïnoni.

⁶ Kiyonï Tororöt chi nyo kikuro Yoana

⁷ nyo kingwïn kïsöwintönchï löpoyïnoni atökumï pich kïter akughan.

⁸ Melö ki löpoyïntö nyinte, wölo kingwïn kïsöwintönchï löpoyïnoni.

⁹ Löpoyïntö nyinte kegh nyoni kingwïnöy ngwïny kulïwchini pich lapay.

¹⁰ Kimi Ngölyontononi ngwïny akigh Tororöt ngwïny kuwerï nyinte, wölo mayangnye pipö ngwïny nyinte.

¹¹ Kingwïn korenyi, wölo kimötaknye pikachi.

¹² Wölo pich löwïr cho kïtak akughan nyinte, kwigh chane kïlïkwï monïngo Tororöt.

¹³ Malïkwïnye chane monïngo Tororöt ompö owesyo ptangengmöt, anta ompö machata por anta ompö chomnyo chi, wölo ompö owesyo Tororöt.

¹⁴ Kiwaghaka Ngölyontononi kïlïkwï ptangengmöt akïmang kwenuncha, chi nyo nyïghitate pöropchö nko man. Kesïwecha ororyenyi, ororyö nyo kitö Kwanta Werïnyi nyo le akonga onkït.

¹⁵ Kisöwintönchï Yoana nyinte ompö kiteghat lö, “Anyï chichay kyomwowokwa ngalechi, atanya kyamwaghan lö, ‘Pïnï yi chi nyo wow tya kïtïlanïn, ompöwölo kimito nyinte kïtomö keyïyanïn!’ ”

¹⁶ Ompö sïkönöteto pöropchenyi, kikekonecha perur nyo mewonyotnye.

¹⁷ Kikonï Tororöt kirurut kuwerï Musa, wölo kikonï pöropchö nko man kuwerï Yeso Kristo.*

¹⁸ Möminye chi nyo kikïsïwa Tororöt kokay. Wölo kikuporwecha nyinte Werïnyi nyo le akonga nyo ghömote nko Kwanta.

Amtaghpa Yoana Kipatisanin

¹⁹ Kïyonta pipö Yaudi cho echön cho kimi Yerusalem tïsï nko pipö Lawi kïpa wölo mi Yoana atökïtep lö, “Ichinyi ngo nya?”

²⁰ Melö kitagh Yoana kuyokyï chane, wölo kilö, “Mochanye Kristo.”

²¹ Kïtep pïchay lö, “Ichinyi nyu ngo? Ichinyi so Eliya?” Kuyokyï Yoana lö, “Ewo, mochanye.” Kïtep pïchay lö, “Ichinyi so werkoyontonay kïmitecha kekönöy?” Kuyokyï lö, “Ewo.”

²² Kïlenchï pïchay, “Mwowecha nyu lö ichï ngo tökepecha kemwochinö pïchini köyonwecha. Ilentenyi ochï ngo nyinte nya?”

²³ Kuyokyï Yoana chane lö, “Ochan chichanya kimwa werkoyon Isaya ngalechi lö, ‘Kakïlïma kuti chi surkwen nyo lentöy, agha ara Echotyon, oghïtenö ortïnechi.’ ”

²⁴ Kïtep pïchay kiyonï Parisaytin* lö,

²⁵ “Kwato mechinyinye Kristo anta Eliya anta werkoyontonay kikönecha, kï kölö ne nyu tepötisönenyi pich?”

²⁶ Kuyokyï Yoana chane lö, “Opötisönan ompö pögh, wölo mi kwenunkwa chi nyo monkïtökwanye.

²⁷ Rïpkanïn nyinte, wölo mömïchinanïnye ompö atyak kweghkachi.”

²⁸ Kighisyeghö ngalechoni wölini le Petaniya, lalwa Yordan antakwagh, wölo kipötisöno Yoana pich.

Wawa Kecha Tororöt

²⁹ Kisïwa Yoana Yeso asista nyo kirïpöy kungwïnöy wölini kimi nyinte, kïmwochï pich lö, “Anyï Wawa Kecha Tororöt nyo ipöy ngokï ngwïny!

³⁰ Chichete nyanye kyomwowokwa ngalechi lö, ‘Rïpkanïn chi akong nyo wow tya kïtïlanïn, ompöwölo kimito nyinte kïtomö keyïyanïn!’

³¹ Kimonkïtönye ante nyinte lö eki ngo, wölo kangwïnan apatisana pich pögh, atömanyïn kïrumteghö nyinte pipö Israel.”

³² Akïsöwintön Yoana lö, “Kyasïwan Mïkulögh kirökunö yïm le chepïrïm akïtöpö parakunyi.

³³ Kimonkïtönye nyinte, wölo kökimwowanïn nyinte nyini kiyonwanïn apatisana pich pögh lö, ‘Isïwiyenyi chi nyo rökyini Mïkulögh akïtöpö parakunyi, chichoni nyo pötisöno pich Mïkulögh nyo Tïlil.’

³⁴ Kasïwan asöwintönan lö, nyinte kï Wero Tororöt.”

Kinetanpa Yeso cho pö tagh

³⁵ Kimi ngat Yoana asisto odeny nko kinetankachi cho le odeny atoni,

³⁶ kïsïwa Yeso kïwestotoy kïlö, “Anyï Wawa Kecha Tororöt.”

³⁷ Kïlïm kinetanchay pö Yoana le odeny otini kimwoghöy nyinte lenyoni, kïpa chane akïrïp Yeso.

³⁸ Kiwaghaka Yeso akïsïwa lö mi chane kïrïpöy nyinte, kïtep lö, “Omörekwa ne nya?” Kuyokyï chane lö, “Imöngenyi onö nya, Rapi?” (Ato kïwaghach ngölyontononi kelentöy, “Konetin.”)

³⁹ Kïlenchï, “Apkana asïwena.” Kïpa chane nko nyinte akïsïwa wölini kimöngöy, kïtïpï nko nyinte asisoni kwimön. (Ki mönon wölo ngata satïn taman.)

⁴⁰ Ki Andrea nyo tupchö nko Simon Petro nyoni kile akonga ompö pïchoni le odeny kilïmöy ngalechoni pö Yoana, kïrïp chane Yeso.

⁴¹ Kïnyorï tagh Andrea werïngwa Simon, kïlenchï, “Kikenyorucha Masiya.”* (Ompö kayne anka kï Kristo.)

⁴² Atolapay kumït Simon wölo mi Yeso. Kuros Yeso nyinte akïlenchï, “Ichinyi Simon, wero Yoana. Kïkuroninyi ye Kepa.” (Karkegh kaynanoni nko Petro nyo ato kïwaghach kï “Ghat.”)

Kuröy Yeso Pilipo nko Natanael

⁴³ Kïmach Yeso asisto odeny kïwö kutang Kalilaya. Kïtuyö Yeso nko Pilipo, akïlenchï, “Rïpkanïn!”

⁴⁴ (Ki chi pö Petsayda Pilipo kanasyan nyo kimöngöy ompö Andrea nko Petro.)

⁴⁵ Kïtuyö Pilipo nko Natanael akïlenchï, “Kakïtuyecha nko chichay kikir Musa ngalechi ompö kitapu Kirurut* akï nyinte nyaye kikir werkoy ngalechi. Yeso nyinte, nyaye le wero Yosep nyo möngöy Nasaret.”

⁴⁶ Kïtep Natanael lö, “Muköy so kïgh nyo karam kungwïno Nasaret?” Kuyokyï Pilipo lö, “Nyonö rosa.”

⁴⁷ Otini kisïwa Yeso Natanael kungwïnchini nyinte, kïlö ompö, “Rose köny! Anyï chi pö Israel nyo pö man nyo möminye lïsata orinyi!”

⁴⁸ Kïtep Natanael nyinte lö, “Kenkïtwaninyi lö ne nya?” Kuyokyï Yeso lö, “Kökyasïwïnyi atoni kemitenyi mpure moköngwoninö ghït kïtomö kïkurïnyi Pilipo.”

⁴⁹ Kuyokyï Natanael lö, “Konetin, ichinyi Wero Tororöt! Ichinyi pöytoghinto Israel!”

⁵⁰ Kïlenchï Yeso, “Keghananyi so pat ompöwölo kolan kasïwïnyi mpure moköngwö ghït? Tesïwïyenyi tïku walaka cho echön kïsir choni.”

⁵¹ Atolapay kïlenchï pïchay, “Omwowokwa nyoman lö, osïwïyekwa kïyoto yïmö akïpusöy malaykeni Tororöt akïrökyini Wero Chi.”