YEREMIA 52 - PIPÏLIA

Rulöto Yerusalem

¹ Kitor Sedekia kïpayta Yuda nko Yerusalem ato kitïng könyis 21 akï könyiswechi löwïr cho kipayta kï taman nko akonga. Kikïkuro kame Amutal akï chepö Yeremia nyo kimöngöy kanasyanta Lipna.

² Ghach ngala cho kigh pöytoghin Sedekia ompö tawu ECHOTYON, karkegh nko cho kigh pöytoghin Yeoyakim.

³ Kinörekyï nyu tya ECHOTYON pipö Yerusalem nko Yuda ntökïtenö kutulö chane tawunyi. Melö kirïp Sedekia le wölo kimöktoy Nepukadnesa, pöytoghinto Papilon.

⁴ Kïlenyona, kïsetï Nepukadnesa pöytoghinto Papilon nko lïkenyi akïporyeghö Yerusalem ompö asispa taman nyo pö arawa taman nyo pö könyi mut nko angwan nyo pö paytaghpa Sedekia.

⁵ Kïlenyona kikirik kanasyante ntökwit könyi taman nko akonga nyo pö paytaghpa Sedekia.

⁶ Kïkany kwit asispa mut nko angwan nyo pö arawa angwan, ato kighetï kömöy kanasyanta Yerusalem ompöwölo kiwonyö omisyö,

⁷ kupun pipö Yerusalem nayatu kanasyan akupultoy kïlït sany akuwer kwenu nïyet odeny akuchumchï para pöytoghin akïpa okumpö koro Arapa. Ataye kokay kirik pipö Papilonia kanasyanta Yerusalem ompö wop tïkwïl. Kipa nyu pipö Israel lenyoni akughegh okumpö lalwa Yordan.

⁸ Kïrïp chane lïko Papilonia ntökïnömchï Sedekia ompölyonto Yeriko, wölo kïtoyö lïkenyi akïpïstö nyinte.

⁹ Kenam nyu Sedekia akepchï pöytoghinto Papilon nyo kimi kanasyanta Ripla ompö koro Amat. Atolapay kurwokyï pöytoghinto Papilon Sedekia

¹⁰ ompö wölini le Ripla akïmwa ketïgh monïngo Sedekia kurosu kwanta. Kitïgh tïkwïl pöytoghinto Papilon yetïntino Yuda löwïr.

¹¹ Söromunyi kïködöt konyi Sedekia akïrata sïrïmtin akwip koro Papilon akïtorchï chela. Kitöpö nyu Sedekia chela ntökïtenö kïma.

Kinyarata Kö pö Tororöt*

¹² Ompö asispa taman nyo pö arawa mut nyo pö könyi 19 nyo pö paytaghpa Nepukadnesa, pöytoghinto Papilon kingwïn akïlït Yerusalem Nepusaradan nyo kile kirurin akï yetïn pö ripi pöytoghinto Papilon.

¹³ Atolapay kïpela ma Kö pö Tororöt nko kö pö pöytoghin nko korïn löwïr ompö Yerusalem. Kimöminye kö nyo wow nyo kingötï makïpel.

¹⁴ Kirultö tïkwïl Nepusaradan nko lïko Papilonia nïyet pö kanasyanta Yerusalem löwïr,

¹⁵ atolapay kïrang le ratan kïpa Papilon pich cho kingötï kanasyan nko cho kichamta kegh kïnam lïko Papilon. Kirang tïkwïl pich cho le tekï.

¹⁶ Wölo kïpïsï pich cho le mey tya kïngötï atö kukaman sapipun akïngor paren.

¹⁷ Kipespes pipö Papilonia pchörin cho kikïteka taghoy nko töro tay nyo wow nyo kimi Kö pö Tororöt atolapay kwip taghokö löwïr Papilon.

¹⁸ Kip tïkwïl tören nko karayen nko kötöw cho kïköto aren ompö Kö pö Tororöt.

¹⁹ Kip tïkwïl Nepusaradan pakulin nko otupöyi ngutoy cho onyïn nko kikönoghi tatïn nko pakulin cho kïpiytegho kip tïpö koltin le koltin, kwip tïpö silpa le silpa.

²⁰ Ki nyïkisöch nyoman taghoy cho kiteka köny pöytoghin Solomon pchörinechay le odeny nko körkeyïntino eghin cho le taman nko odeny cho kimi tör nyo wow nko kikönoghi tatïn.

²¹ Ki miten mut nko sömök koghïn nyo pö pchori akonga akï tïrusïntanyi kï miten mut nko ropo kuwit akï sentimiten mut nko sömök ompö nyïkirïn ompöwölo ki soghyö ori.

²² Kïkany ompö möt pö pchörinechoni kimi karïna tay nyo le miten odeny nko sentimiten tömönut odeny ompö koghïn akï nyo kikïsïlö taghoy körkeyïn pö makomanka kuwit kamas.

²³ Kikïsïlö körkeyïn pö makomanka cho le 96 ompö kamas wölo ki 100 löwïr.

Kakïrang pipö Yuda Papilon

²⁴ Atolapay kumït Nepusaradan, yetïn pö ripi pöytoghin Seraya nyo kile yetïn pö tïsï nko rïpintenyi Sepania nko ripï sömök cho ghyongo kuka Kö pö Tororöt.

²⁵ Kimïta kanasyan tïkwïl kintöghoghinto lïk nko kiruri pöytoghin cho le mut nko odeny akumït tïkwïl rïpinto yetïn pö lïk nyo kile kirurinto yetïntanyi nko pich walaka cho le 60 cho ororöch.

²⁶ Kimïtyï Nepusaradan pïchoni pöytoghinto Papilon ompö kanasyanta Ripla.

²⁷ Atolapay kïmuny akïtïgh pïchoni pöytoghinto Papilon ompö kanasyanta Ripla nyo kimi koro Amat. Kïlenyona kikïrang pipö Yuda kïpa pïnotnön. Achï kiyitöto pich cho kirang Nepukadnesa le ratan osiswo paytaghtanyi.

²⁸ Pipö Yaudi 3,023 ompö könyi mut nko odeny,

²⁹ nko 832 cho kiranga Yerusalem ompö könyi 18.

³⁰ Kïkany ompö könyi 23 nyo pö paytaghtanyi, kïrang Nepusaradan, yetïn pö ripichi pipö Yaudi 745. Kïlenyona kilïkwï pïchoni löwïr kikïrang 4,600.

³¹ Otini kinam Epilmerodak paytaghpa Papilon, kusyonchï Yeoyakin, pöytoghinto Yuda ntökutyokunö chela. Asisoni kikityokwï Yeoyakin kï asispa 25 nyo pö arawa taman nko odeny nyo pö konyi 37 kïngata kemït pöytoghin Yeoyakin le ratan kïwö Papilon.

³² Kighchï pöytoghin Epilmoredaki Yeoyakin nyo karam, akïkonyït kïtïl pöytoghi walaka cho kimi pïnotnön nko nyinte koro Papilon.

³³ Kïlenyona kikïchömchï Yeoyakin kïngwïsta sïro pö chela akechömchï kwomisyö ompö mesa pöytoghin.

³⁴ Atolapay kïropchï Yeoyakin pöytoghinto Papilon ropïyen atokumï kïyörchï kegh möchutkachi cho pö osis tïkwïl ntökïtenö kuwonyö osiswechi.