YEREMIA 30 - PIPÏLIA

Ayomistino Tororöt ompö pikachi

^1-2 Kilenchanïn ECHOTYON, Tororöt pö Israel, “Kirchinö kitapï ngalechï löwïr komwowunyi,

³ ompöwölo itu osiswö cho oyokyinan piköchan Israel nko Yuda tïkukwa. Oyokunan chane kïmïlisyö kor nyo kyotönön papotïnekwa akïchengöy ngat kïlïkwï nyingwa.” Mwoghöy ECHOTYON.

⁴ Achï ngal cho kingalan ECHOTYON paraku pipö Israel nko Yuda.

⁵ “Kamwaghan ante ECHOTYON lö, Kakïlïm rira nyo pö otyogh rira nyo pö mïghö amelö nyo pö kalya.

⁶ Atepe kegh köny tökïpköchok ngala. Ayo, ngo nyo kisïwa chi nyo le mïrön kïlusïyi akïyï monïng? Kwompö ne nyu tosïwïyan mïrön anka tïkwïl kïpïröy kegh mu le korka nyo kïghöy? Akwompö ne tökworusöchitu chane tökechwö?

⁷ Purörö! Wechï asis nyoni nyo gha! Möminye anka nyo kimustoy nyoni. Asis pö sönönöt ompö pipö Yakopo wölo kïrkegh nye so, kïsöru nyinte kïchïwït asisoni.”

⁸ Kamwaghan ante ECHOTYON Kimuktoghin lö, “Ato itï asisoni, ongwïnan otörotöröy michokin cho kikïrötyï katwayi piköchan. Kïngeta atoni nyu melö tökeghokwa ngat alïkuna mötwori pich cho monkïtökwanye.

⁹ Opöghisyewanïkwa ani nyo ochï ECHOTYON Tororötïnkwa nko chi pö ara Daudi nyo okïlwokwa kïlïkwï pöytoghin.

¹⁰ “Mewöghisyö we Yakopo, amemïgh we Israel. Ompöwölo osörunyi mitenö kor nyo low. Oyokunan moneku kïpkana koro pïnotnön imïlonenyi, aimöngisyö ompö kalya. Amöminye chi nyo muköy kwotyegheninyi.

¹¹ Ompöwölo omitan nko nyi, tosörunyi. Owonyan lökïr koros löwïr cho kyotoytoychekwa. Momungïnyinye tya ntewonyö wölo inyorunenyi kïnye sitöt nyo mïchinote.” Mwoghöy ECHOTYON.

¹² Lenchini ECHOTYON pikachi, “Mösöpsocha moyokökwa amörökönye sakïtyanta.

¹³ Puryö chi nyo sïngo chopatenkwa Puryö sakïtyan nyo pö moyokökwa Nyo mosöpchokwanye.

¹⁴ Kiwutyeghinyi chamanköku melö tökïyonginyi. Komunginyi le chi nyo mungöy punyontenyi. Komunginyi nyo puryö kisyonchin ompöwölo wow lelutyengu tya akïchang ngokiku nyoman.

¹⁵ Kerir kwïle ompö moyengu Ilentenyi so wonyot kichïrtangu? Komunginyi lenyoni ompöwölo wow ghöyitengu akïchang ngokiku.

¹⁶ Wölo ye nyu, kinyörilöy kong anka tïkwïl nyo nyörilinyi kong kïrongöy punköku löwïr kïpa pönotnön Chona chopinyi kong, ochopan kong chane Chona mi kipsach kulepinyi olepan chane tïkwïl.

¹⁷ “Ongörokinyi sïkö ngat kisön cho karamach ongwïnan osopöy moyoköku. Ompöwölo kïmïninyi punköku kïlentöy, ‘Sayon* nyo puryö nyo yongöy.’ ” Mwoghöy ECHOTYON.

¹⁸ Lentöy ECHOTYON, “Oyokunan piköchan kïpka korengwa. Osyonchinan möngot anka tïkwïl nyo le nyingwa, kïteköy ngat kanasyanta Yerusalem, ketekyini pöryontenyi nyo kikunyara. Kïteköy tïkwïl kö pö pöytoghin otini kimi tagh.

¹⁹ Kïlïmöy pich cho möngöy orito kanasyantanoni cho tumöy tumwöyi kiyokyinogh pö sörö Akelïmöy tïkwïl kutïwa pich cho mi kïturonsot. Operuran chane kïtösisyö amelö ngörïngitu oghan chane kekonyït puryö chi nyo sösöy chane.

²⁰ Oyokyinan piköchan owesyö le nyo kipö tagh Ochïchiman chane kughyongsyö ompö tawunyan omungan anka tïkwïl nyo chopokwa kong.

^21-22 Ngwïno pöytoghintengwa kwenungwa akungwïno kintöghoghintengwa kwenungwa. Muköy pöytoghintengwa nyoni kïrikanïn otini kokurön lö nyonö ompöwölo ngo chi nyo lentöy orikanïn ompö owesyenyi kegh?” Mwoghöy ECHOTYON.

^23-24 Arosa nyu nörekyo ECHOTYON! Köchögh le chepkiriri nyo mamïnïng! Keghumotö le pïchpïch ompö paraku mötöwo mwokïyis. Amösisönye ntökïpïntö kerötenyi. Pköchinokwa lasiny ngalechete ompö osis cho tökïpkonöy.