YAKOPO 4 - PIPÏLIA

¹ Ekï pkono onö köny poryewut nko syölutchï mi kwenunkwa? Möpkonocha so pïrchinoghtinekwa cho ghach cho poryot ompö orinkwa chik?

² Opïrchinekwa tïkwïn wölo mosïkekwanye, kïlïku nyo kopörisyökwa. Opïrchinekwa osïke tïkwïn, wölo mosïkekwanye, kïlïku nyo kasyalakwa, aporyö. Mosïkekwanye kïgh ompöwölo mosomekwanye Tororöt kïyoni.

³ Amosïkekwanye ompöwölo osomekwa ompö machat nyo gha, anyï osomekwa atopöghisyeghenö ompö pïrchintinekwo.

⁴ Ne pikö chï meghönote! Monkïtökwanye so lö kenam kongot nko ngwïny, kï kakïlïkwï pung pö Tororöt? Anka tïkwïl nyo mököy kïnömöy kongot nko ngwïny, kï kegh kegh punyonto Tororöt.

⁵ Molenchï kegh mwoghöy Kikirut ngala kwïle atay lentöy, “Pïrchinecha akwomöy nyonyintön mïkulögh nyo ketö Tororöt orincha.”

⁶ Wölo wow tya pöropchö nyo konu Tororöt, kïle wölay mwoghöy Kikirut lö, “Reyöy Tororöt pich cho le menot, wölo töni pöropchö pich cho tölose.”

⁷ Kïlenyona nyu, otönö kegh kelyo Tororöt, atagh Onyöt, atökurïpenok.

⁸ Arika wölo mi Tororöt atökïrikakwa nyinte. Owunö ewunekwo akwa mwokïyischï! Amwata mïkuliskökwo, akwa lïsichï!

⁹ Osönönchenö, alokyö. Nya kïwaghaka rorötengwo kïlïkwï lok akïwaghaka ngörekyengwo kïlïkwï nyarïl nyo wow.

¹⁰ Arïnga kegh ompö tawu Echotyon atökïsyolok nyinte parak.

Merwokyï tupchengu

¹¹ Tupchenichu, mangalana kegh nyo gha akwane. Chi anka tïkwïl nyo ngölono nyo gha anta rwokyï tupchenyi kingölono nyinte nyo gha anta akurwokyï Kikirut. Ato irwokyinyi kirurut, kïmelö kötelïkunanyi chi nyo rïpöy kirurut, wölo kelïkunyi chi nyo rwokyini kirurutchoni.

¹² Tororöt onkït nyo konu akurwokyï kirurut. Nyinte onkït nyo muköy kïsöru akuwur pich. Wölo ichinyi ngo terwokyinenyi chitö anaka?

Mokwol kegh

¹³ Oterwante chona omwoghöy lö, “Kïrutocha asisete anta asïyech kepetöy kanasyan nyo syom aketïpï wöloni akegh pasyara ompö köny kïmïkul, atökesïkö ropïyen cho chang.”

¹⁴ Omwoghekwa lenyoni amonkïtökwanye wölo lïku söpontönkwa asïyech. Alatekwa kapuret pat nyo kïsïwïyi nyo tangogh akwotini lawel kupot.

¹⁵ Kömïchinokwa amwagha lö, “Ato machata Echotyon, kïkonecha söpon asïyech kemuka kegha kïyï kïyinö.”

¹⁶ Wölo ye konisonchekwa amen akï menöt nyo lata nyoni kï gha.

¹⁷ Kïlenyonanyu, chi nyo nkït kïgh nyo karam nyo mïchini keghöy amökwighnye, kï kegh ngokï nyinte.