WUWÖT 40 - PIPÏLIA

¹ Kïlenchï ECHOTYON Musa,

² “Itarang Ema nyo mi ECHOTYON* ompö asispa tagh arawa tagh.

³ Aitö ori Santuku Muma* nyo mi kirurut aikartegha ananka.

⁴ Aitö mesa ori aitötyï kari kïtïpï nyo karam nko ketay kikönoghöy kitömöw aikanagh kitömöwe.

⁵ Itö ato kïpelo köröstin nyo kikigha koltin ompö tawu Santuku Muma aikartegha ananka kuketo Ema.

⁶ Itö ato kïpelo amöros nyo kïpelöy, ompö tawu kuka Ema

⁷ aitö otupö nyo mi pögh kwenu Ema nko ato kïpelo amöros.

⁸ Itö kasaruto Ema kuwit aikartegha ananka kuke.

⁹ “Icheng mwagh nyo tïlil aiyil Ema nko tïkwïn löwïr cho mi ori atökïtïlilitu.

¹⁰ Iyilenyi tïkwïl ato kïpelo amöros nyo pö kitötogh nyo kïpelöy nko karichi löwïr, atökïtïlilit tya.

¹¹ Iyilenyi tïkwïl lenyoni otupö nko kötönke.

¹² “Aimïtï Aron nko werkachi kïpka kuka Ema aimwat chane

¹³ ailokyï Aron sïrochay pö tïsintön aiyil atökïpöghisyeghwanïn le tïsin.

¹⁴ Imïtï werkachi tïkwïl ailokyï sïro

¹⁵ aiyil chane le ato kiyilanyi papongwa atökïpöghisyeghwanïn le tïsï. Ighöy chane kiyilatanoni kïlïkwï tïsï cho pö kokay ompö pïnwöyikwa löwïr.”

¹⁶ Kwigh Musa löwïr lenyini kimwa ECHOTYON.

¹⁷ Kïlenyona kikïtek Ema nyo mi ECHOTYON asispa tagh nyo pö arawa tagh nyo pö könyi odeny.

¹⁸ Kïpor Musa akwighchï Emanay keti kötönkot akutö pchörine akutarang.

¹⁹ Kuyen Musa Emanay parak akïtas anka, lenyini kimwochï ECHOTYON nyinte.

²⁰ Atolapay kïcheng koghichay pö kirurut akutö Santuku Muma akulut keti kaymorischay mi Santukï akutö köröwonte,

²¹ akwip Santuku kutang Ema akïtotö ananka Santuku Muma, lenyini kimwochï ECHOTYON nyinte.

²² Kutö mese Ema okumpö löt, sanypa ananka.

²³ Akutö makatyan parak nyo kïropchini ECHOTYON, lenyini kimwochï ECHOTYON nyinte.

²⁴ Kutö ketay kikönoghöy kitömöwo Ema, kïtopön mesa ompö okumpö tagh.

²⁵ Akutam kitömöwe ompö tawu ECHOTYON, lenyini kimwochï ECHOTYON nyinte.

²⁶ Kutö ato kïpelo amöros nyay pö koltin Ema nyo mi ECHOTYON tawu ananka,

²⁷ akïpela mankoy cho ngutoy cho onyïn parak, lenyini kimwochï ECHOTYON nyinte.

²⁸ Akïkartegha ananka kuka Ema nyo mi ECHOTYON.

²⁹ Akutö ato kïpelo amöros nyo kïpelöy kuka Ema nyo mi ECHOTYON akutötö ropöwon nyo kïpelöy nko nyo pö pagh, lenyini kimwochï ECHOTYON nyinte.

³⁰ Kutö otupö kwenu Ema nyo mi ECHOTYON nko ato kïpelo amöros, akutö pögh

³¹ cho kiwuno Musa nko Aron nko werkachi morikwa nko kelyekwa,

³² otini kïlïtöy Ema nyo mi ECHOTYON nko otini kirich ato kïpelo amöros, lenyini kimwochï ECHOTYON nyinte.

³³ Kïtek Musa kasaru kuwit Ema nko ato kïpelo amöros, akïkartegha ananka kuke, kuwany nyu nyinte ighisye.

Polta nyo mi paraku Ema nyo mi ECHOTYON

³⁴ Kulum polta Ema akïnyïghï ororyo ECHOTYON ori,

³⁵ ntömökumïnye Musa kïlït ori, ompöwölo kilum polta kïtuwit.

³⁶ Kiwï pipö Israel kunayta otini kinget polta,

³⁷ wölo ato mangetnye polta kïwö, kïmöwuwöcha chane ntökïtenö asisini kinget polta.

³⁸ Kimito polta paraku Emanoni ato le pöghet akimito ma ato le oghö ompö rutoghtöngwa kïmïkul.