WUWÖT 39 - PIPÏLIA

¹ Kinap chane sïro cho pïröch ompö tasim cho orusöch nko cho lata akwa lamay nko cho pïröch. Kilach tïsï sïrochoni otini kïpöghisïyi ompö Wölay Tïlil. Kinöpchï chane Aron sïro cho tïlilöch, lenyini kimwochï ECHOTYON Musa.

² Kïnap chane epod* nyo pö tasim ompö koltin nko cho orusöch nko cho lata akwa lamay nko cho pïröch nko sïra katani nyo kikïnap nyo karam.

³ Kitang koltin kïtöpesöchitu akïrar kïtöntönitu, atö kegh tasim cho orusöch nko cho lata akwa lamay nko cho pïröch nko sïra katani nyo karam.

⁴ Kïnöpchï epod kalachis odeny cho lumöy löyos cho kinam kegh söremwokökwa, atökenyoryö tïkwïl.

⁵ Nko angwa mu nyo kikïnap nyo karam nyo kïrotïtoy nyo kikituyö nko epod akïkarkegh tïku cho kikigha, lenyini kimwochï ECHOTYON Musa.

⁶ Kwigh koghïn odeny cho nyörilöch akïtötyï koltin akukirchï kaynötut pö werpö Yakopo.

⁷ Kïtötyï koghichoni paraku kalachanay pö epod, atökïlïkwï koghi kinonut ompö ortïna Israel, lenyini kimwochï ECHOTYON Musa.

Kenap sïra takat

⁸ Kïnap sïra takat le ighisyö epod akïkarkegh tïku cho kikigha.

⁹ Kongityot woptine kwangwan akikïnyakïm kïnyïl odeny, sentimiten 22 koghïntö nko töpesïntö.

¹⁰ Kïtat tötut angwan cho pö koghïn, tötut nyo pö tagh kï: sardiyo nko topas nko karpunkïl.

¹¹ Nyo pö odeny kï: emerald nko sapire nko dayemon.

¹² Nyo pö sömök kï: chasinto nko akate nko ametist.

¹³ Nyo pö angwan kï: peril nko oniks nko chaspa. Kikitö koghichoni kughyongö koltin cho kikïtök.

¹⁴ Koghichoni kï taman nko odeny kïrïp kegh nko kaynötut pö werpö Yakopo, kagh akonga ompö kayna chi akonga, ompö ortïn taman nko odeny.

¹⁵ Kïnöpchï sïra takat sïrïmtin cho kikïnanagh le pörköy cho pö koltin cho pïchighöch.

¹⁶ Kwigh chane tötut pö koltin odeny cho kinam kegh nko kaymoris odeny cho pö koltin akutö kaymorischoni söremwok odeny nyo pö sïra takat,

¹⁷ akutö pörköyichay le odeny kikïnanagh ori kaymorischay.

¹⁸ Kinyoryö söremwokö kwodeny ompö pörköyichay nko koltinechay kikïtök akunyoryö ompö okumpö tagh nko kalachanay pö löyos pö epod.

¹⁹ Kwigh chane kaymoris odeny cho pö koltin, akïnöpchï söremwok odeny cho pö sïra takat ompö sörömunyi nyo mi okumpö epod ori.

²⁰ Kwigh kaymoris cho pö koltin akutö sïrochay le odeny pö epod okumpö ngwïny wölo le tagh, ato lekïto rötutyenyi paraku angwa nyo pö epod nyo kikïnap nyo karam.

²¹ Kïrata chane tasim nyo orus sïra takat kïnam kegh kaymoriskachi nko cho pö epod atökïtöpö paraku angwanay pö epod kikïnap nyo karam, atömöchagh kegh sïranay pö takat nko epod. Lenyini kimwochï ECHOTYON Musa.

Napata sïrokö walaka cho pö tïsï

²² Kinap sïra epod nyo orus.

²³ Tïngeto wölo lïtöy möt ompö kwen nyo kikinipnip kuwitwit le punpun nyo pö kalacha, atömöpala.

^24-26 Kïnöpchï sïre okumpö kel makumanka* cho orusöch nko cho lata akwa lamay nko cho pïröch kuwitwit nko kwïrkwïris pö koltin cho mi kwen. Akutö kwïrkwïryon nyo pö koltin nko kukughö. Lenyini kimwochï ECHOTYON Musa.

²⁷ Kïnöpchï Aron nko werkachi sïra katani nyo karam

²⁸ nko sïra katani nyo karam nyo kïröto möt nko kopiyö nyo kikïnap nyo karam nko sïrwali nyo pö katani nyo karam

²⁹ nko angwa katani nyo kikïnanagh nyo orus nko nyo lata akwa lamay nko nyo pïrir akesïl. Lenyini kimwochï ECHOTYON Musa.

³⁰ Kutang aparparatpa koltin cho pïchighöch akukir parakunyi lö, “Tïlil ompö ECHOTYON.”

³¹ Akïrötyï aparparatnoni anankanay pö möt ompö okumpö tokoch pörköyö nyo orus. Lenyini kimwochï ECHOTYON Musa.

Kiwangata ighisyö

³² Kewany ighisyö löwïr nyo pö Ema nyo mi ECHOTYON* akwigh pipö Israel lenyini kimwochï ECHOTYON Musa.

³³ Kïsïtï chane Emanay wölo mi Musa nko karichi löwïr nko akodetiska nko pölöwechi nko pïrompurkö nko pchörinechi nko pïrïmpotkachi.

³⁴ Köröwonte nyo tapïlïl nyo pïrir nyo pö sïro pö mökol nko ananka nyo kikïtotö kot ori

³⁵ nko Santuku Muma* nyo mi koghi kirurut nko pölöwechi nko köröwonte

³⁶ nko mesa nko karichi löwïr nko makatyan nyo kipöy tawu Echotyon

³⁷ nko ket nyo kikönoghöy kitömöwo nyo pö koltin cho pïchighöch nko kitömöwechi nko karichi nko mwagh nyo kinoghöy

³⁸ nko ato kïpelo amöros nyo pö koltin nko mwagh nyo kiyiltoy nko mankoy cho kïpelöy cho ngutoy cho onyïn nko ananka nyo pö kuka Ema

³⁹ nko ato kïpelo amöros nyo pö tay nko wölo lïtöy arenï nyo pö tay nko pölöwe nko kari löwïr nko otupe nko kelyechi

⁴⁰ nko anankis cho körtoy kasaruto kot nko pchörinechi nko pïrïmpoti nko ananka nyo körtoy kuke nyo pö sany nko pörköyi nko nömöwe nko kari löwïr cho kipöghisyegho ompö Ema nyo mi ECHOTYON

⁴¹ nko sïro cho pö tïsï cho kikïnap nyo karam cho kipöghisyegho Aron ompö Atay Tïlil nko cho pö werkachi.

⁴² Kigh pipö Israel ighisye löwïr lenyini kimwochï ECHOTYON Musa.

⁴³ Kïsïwa Musa lö kikwigh chane ighisye lenyini kimwa ECHOTYON, kusoyön Musa chane.