WUWÖT 38 - PIPÏLIA

¹ Kïtek ato kïpelo amöros akïkany kïngata miten odeny koghïntanyi nko töpesïntanyi akïngata mita akonga kutok.

² Kutö kuy angwan luchtine kwangwan, akïnömöy kegh tïkwïl akïmala taghoy.

³ Kwigh karïn löwïr cho pö ato kïpelo amöros: tören cho toköy aren nko kichikeni ngayam nko tïwanay nko sartin nko nököghon, kigha karichoni löwïr taghoy.

⁴ Kwighchï wölo lïtöy arenï nyo pö kari taghoy, akutö söremwok pö okumpö ngwïny, ntökwit kwenu ato kïpelo amöros.

⁵ Kwigh kaymoris angwan akutö luchtine kwangwan.

⁶ Kwigh pölöwo tilok akïmala taghoy.

⁷ Kutö pölöwechay kïsïtïtoy kïlït kaymoris cho mi woptin odeny nyo pö ato kïpelo amöros. Kwigha ato kïpelo amöros santukï nyo pö ket.

Ighata otupo tay

⁸ Kwigh otupo tay nko kelyechi ompö kiyeni kor cho kipöghisïyi ompö kuka Ema nyo mi ECHOTYON.*

Kasar nyo pö Ema nyo mi ECHOTYON

⁹ Kïkar kasar nyo pö Ema nyo mi ECHOTYON ompö okumpö tagh nyo pö kasaru, kimito sïra katani nyo karam nyo kikïpirir kïlïkwï koghïntanyi miten tömönut angwan

¹⁰ nko pchörinekwa kïlïkwï tömönut odeny cho pö taghoy, wölo akodetiskö nko lïkipkö kïpö silpa.

¹¹ Karkegh koghïntanyi ompö okumpö löt.

¹² Kimito ompö okumpö ta sïra nyo le miten 22 koghïntanyi nko pchörin taman nko pïrïmpotikwa nko akodetiskö nko lïkipkö kï pö silpa.

¹³ Kïlïkwï töpesïnto kasaru ompö kongasis miten 22.

¹⁴ Kilïkwï sïre nyo pö wop akonga ompö kuke miten mut nko odeny nko pchörin sömök nko pïrïmpotikwa.

¹⁵ Kilenye nyoni ompö woptö anka nyo pö kukat.

¹⁶ Kikitö anankispa katani kasarunoni.

¹⁷ Kwigha pïrïmpoti pchörin taghoy akwigha akodetiskö nko lïkipkö nko köröweko pchörin silpa. Akunyoryeghö keti silpa pchörineko kasar.

¹⁸ Mi sïra kuketo kasaru ananka katani nyo kikïsïl nyo orus nko nyo lata akwa lamay nko nyo pïrir nyo pö puto kech. Kïlïkwï koghïntanyi miten mut nko angwan kïlïkwï miten odeny kutoch karkegh nko anankispa kasaru.

¹⁹ Kitïng pchörin angwan nko pïrïmpoti taghoy. Kikigha silpa akodetiskökwa nko kitöröwekwa nko lïkipkökwa.

²⁰ Kikigha taghoy nömöw löwïr cho pö Emanoni nko cho pö kasaru.

Karïn cho kïpöghisyegho ompö Ema nyo mi ECHOTYON

²¹ Chï kï karïn cho pö Ema nyo mi ECHOTYON wölo kikïrorchini kirurut taman. Kimwa Musa kekir, kukir pipö Lawi cho kintöghoghchini Itamar wero Aron nyo kile tïsin.

²² Kwigh Pesalel wero Uri wero Ur nyo pö ara Yuda löwïr cho kimwochï ECHOTYON Musa.

²³ Kimito nyinte nko Olyap wero Aisamak nyo pö ara Dan, ki tekin nyinte akï kikirinto koghïn akï nöpinto tasim cho orusöch nko cho lata akwa lamay nko cho pïröch nko cho pö puto kech cho kikïsïl.

²⁴ Koltin löwïr cho kikïpöghisyegho ompö Ema nyo mi ECHOTYON kï, ki kilen 1,000 kïrïp kegh nko olyot nyo pö osiswechoni.

²⁵ Silpa cho kipkana söpïch cho kikiyit kï, ki kilen 3,430, kïrïp kegh nko olyot nyo pö osiswechoni.

²⁶ Kikonï chi anka tïkwïl surï cho pö kiyitöto kegh. Pich löwïr cho kikiyit cho kitïng könyis tömönut odeny kutok, kï ki mïrön 603,550.

²⁷ Kikïteka pïrïmpoti Emanoni nko ananke kilen 3,400 cho pö silpa, pïrïm akonga kilen 34.

²⁸ Kwigh Pesalel lïkip nko akodetis cho pö pchörin nko köröwo pchörin ompö kilen tömönut sömök cho pö silpa cho kingötï.

²⁹ Kikïkonï kilen 2,425 cho pö taghoy.

³⁰ Kigha karichï löwïr pïrïmpot cho pö kuka Ema nyo mi ECHOTYON nko ato kïpelo amöros nko wölo lïtöy arenï

³¹ nko pïrïmpoti kasar nko cho pö kuke nko nömöw cho pö Ema nyo mi ECHOTYON nko kasaru.