WUWÖT 37 - PIPÏLIA

¹ Kwigha Pesalel Santuku Muma ket pö tilak, kitenö koghïntanyi sentimiten 110, kïtenö töpesïntanyi sentimiten 66 akï sentimiten 66 kïwö parak.

² Kïmala koltin cho pïchighöch sany nko ori akutö koltin kuwitwit söröm.

³ Kwigh kaymoris angwan cho pö koltin akutö kelyechi kwangwan, kaymoris odeny onkuntö anka, odeny onkuntö anka.

⁴ Kwigh pölöwo tilok akïmala koltin

⁵ akulut pölöwe kaymorischay mi wop odeny atökesïtö Santukunay.

⁶ Akwigh köröwon nyo pö koltin cho pïchighöch nyo kiteno koghïntanyi sentimiten 110, kiteno töpesïntanyi sentimiten 66.

⁷ Kwigh kerupimtin* odeny cho pö koltin ompö woptin odeny nyo pö köröwontonay.

⁸ Kutö kerupim akonga wop akonga, kutö anka woptö anka akwigh kerupimtin odeny kïnam köröwonte.

⁹ Syolöy kerupimtine köpepokökwa parak atökïkarta köröwonte. Pörchini kegh mutïn kurosöy köröwonte.

Ighata mesa nyo pö makatyan nyo kitöni Tororöt

¹⁰ Kwigh mesa nyo pö tilak nyo tenö koghïntanyi sentimiten 88, töpesïntö kï sentimiten tömönut angwan nko angwan akï sentimiten 66 kïwö parak.

¹¹ Kïmala koltin cho pïchighöch akutö koltin kuwitwit.

¹² Kwigh korope nyo tenö töpesïntanyi milimiten 75 akutö koltin kuwitwit koropetö.

¹³ Kwigh kaymoris angwan cho pö mesanoni akutö luchtine kwangwan, wölo ghyongo kelye kwangwan.

¹⁴ Kïkany kïlekïtö kaymoriska koropetö tökïnam ketichay kïsïto mese.

¹⁵ Kwigh pölöwo tilok akïmïla koltin.

¹⁶ Kwigh karïn cho pö koltin cho pïchighöch cho pö mesa: tïwanay nko mpalaway nko alepïtis nko otupöy cho kïpöghisyegho ompö kitötogh.

Ighata ato kikönoghöy kitömöwo

¹⁷ Kwigh ket nyo kikönoghöy kitömöwo ompö koltin cho pïchighöch. Akwigh pchörin nko kelye ompö koltin cho kitongöy cho tïng tapïk akinam kegh.

¹⁸ Akïtïng morïn cho le mut nko akonga, sömök ompö woptine kwodeny.

¹⁹ Kitïng morïna anka tïkwïl kikompen sömök cho lata tapïko pö mlosi cho ketar.

²⁰ Kitïng pchörinoni kikompen angwan cho lata tapïko pö mlosi cho ketar.

²¹ Kimito tapïkyanta nyo tomönye kïnganya otini kasakegha morïna akong ompö chay le mut nko akonga.

²² Lïku akonga tapïkyan nyo tomönye kïnganya nko morikwa nko pchöri akikitanga koltin cho pïchighöch.

²³ Kwigh kitömöw cho le mut nko odeny nko kitampine nko otupeni koltin cho pïchighöch.

²⁴ Kwigha karichoni löwïr kilen 35 cho pö koltin cho pïchighöch.

Ighata ato kïpelo köröstin

²⁵ Kwigh ato kïpelo köröstin ompö ket pö tilak. Kïlïkwï sentimiten 45 koghïntanyi nko töpesïntanyi akïkarkegh wop tïkwïl, sentimiten 90 kutok akïnömöy kegh nko kuyechi tïkwïl.

²⁶ Kïmala koltin cho pïchighöch okumpö parak nko kamastö nko kuye akwighchï söremwokö koltin kuwitwit.

²⁷ Akwighchï kaymoris odeny cho pö koltin ngwïnyi söremwokachi okumpö ngwïny, ompö woptine kwodeny, atökïlïkwï ato kitöni ketichay kïsïto.

²⁸ Kwigha keti tilok akïmala koltin.

Ighata mwagh nyo kiyiltoy nko tïkwïn cho ngutoy cho onyïn

²⁹ Kwigh mwagh nyo tïlil nyo kiyiltoy nko tïkwïn cho ngutoy cho onyïn cho kenyornyoryö chi nyo nkït wölo kightoy tïkwïn cho ngutoy cho onyïn.