WUWÖT 31 - PIPÏLIA

Teki Ema nyo mi ECHOTYON

¹ Kïlenchï ECHOTYON Musa,

² “Kakïlan Pesalel wero Uri wero Ur nyo pö ara Yuda.

³ Akanyïghitan nyinte mïkulöwunyan nko kimukat nko ngöghomnyö nko chïreryo teksyö anka tïkwïl.

⁴ Atökïlïkwï ighinto koltin nko silpa nko taghoy ompö tïnganat.

⁵ Ipat koghïn cho pö olyot nyo wow nko ket nko kïgh anka tïkwïl nyo kigho morïn.

⁶ Akakïlan Olyap tïkwïl, wero Aisamak nyo pö ara Dan. Akotönön chane kimukat, atökwigh tïkwïn löwïr cho komwowunyi.

⁷ Tïkuchoni kï, Ema nyo mi ECHOTYON* nko Santuku Muma* nko köröwontenyi nko kariko Ema löwïr,

⁸ mese nko karichi nko ketay ghyongo kitömöwo nko karichi nko ato kïpelo amöros

⁹ nko ato kïpelo tïkwïn cho ngutoy cho onyïn nko karichi nko otupö nko kelyechi

¹⁰ nko sïro cho kakïnap nyo karam cho tïlilöch cho pö Aron nyo le tïsin nko sïroko werkachi, ompö ighisyengwa nyo pö tïsintön

¹¹ nko mwaghay kiyiltoy nko tïkuchay ngutoy cho onyïn ompö Atay Tïlil. Kïrïp kegh nko chini löwïr komwowunyi.”

Sapato, asispa kimïny

¹² Kïlenchï ECHOTYON Musa,

¹³ “Mwochinö pipö Israel lö, ‘Orip Sapato,* ompöwölo kiporunötenyan nyoni akwa nko pïnwöyikwa löwïr, tonkïtunö lö, ochan ECHOTYON nyo otïlilokwa.

¹⁴ Orip Sapato, ompöwölo tïlil ompö akwa, chi anka tïkwïl nyo sïmnyonöy anta pöghisyö asisoni ketïghöy kïma.

¹⁵ Kïpöghisïyi osis mut nko akonga, wölo asispa mut nko odeny kï Sapato nyo tïlil ompö ECHOTYON. Kïtïghöy chi kïma nyo pöghisïyi asisoni.

¹⁶ Kïlenyona ripöy pipö Israel Sapato akï kïr ompö pïnwöyikwa löwïr, le muma* nyo pö kokay.

¹⁷ Lïku kiporunöt nyo pö kokay nyo mi kwenunyan nko pipö Israel lö, kigh ECHOTYON yïm nko ngwïny ompö osis mut nko akonga, wölo kumuny asispa mut nko odeny.’ ”

¹⁸ Otini kiwany ECHOTYON kïngalan nko Musa ompö kutïng pö Sinay, kutö nyinte koghïn odeny cho töpölöl cho pö söwintön cho kikira Tororöt ewunyi.