WUWÖT 30 - PIPÏLIA

¹ “Itekenyi ato kïpelo amöros nyo kïpelo tïkwïn cho ngutoy cho onyïn ompö tilok.

² Lïku sentimiten 45 koghïntanyi nko töpesïntanyi, akïkarkegh wop tïkwïl, sentimiten 90 kutok akï nömöy kegh nko kuyechi tïkwïl.

³ Imala koltin cho pïchighöch okumpö parak nko kamastö nko kuye aighchï söremwokö koltin kuwitwit.

⁴ Atolapay ighchï kaymoris odeny cho pö koltin, ngwïnyi söremwokachi ompö woptine kwodeny akïlïku ato kitöni ketichay kïsïto.

⁵ Pata keti tilok aimala koltin.

⁶ Itö tawu anankanay mi ato lekïto Santuku Muma.* Wölay otuyeghonan nko akwa.

⁷ Pelöy Aron tïkwïn cho ngutoy cho onyïn ompö parakunyi, tökwoghö chik otini noghöy kitömöw.

⁸ Akïpelöy mönon tïkwïl otini noghöy kitömöw, atökïlïkwï ngutogh nyo karam ompö tawu ECHOTYON ompö pïnwöyikwa kokay.

⁹ Meroptegha atoni tïkwïn cho ngutoy cho onyïn melö tïlilöch anta ropöwon nyo kïpelöy anta nyo pö pagh amomïlchï dipay.*

¹⁰ Ighöy Aron kinyoryogh ompö kuyo ato kïpelo amöros kïnyïl akonga ompö köny ompö kisön pö kitötogh pö ngokï cho pö kinyoryogh kïnyïl akonga ompö köny ompö pïnwöyikwa kokay, nyoni kï tïlil tya ompö ani, ECHOTYON.”

Suru Ema nyo mi ECHOTYON*

¹¹ Kïlenchï ECHOTYON Musa,

¹² “Otini iyitenyi pipö Israel, ikany kutö chi anka tïkwïl kïgh ECHOTYON nyo tyoko kegh tömönyorï chane sömew otini iyitenyi.

¹³ Konu chi anka tïkwïl nyo kakiyit ropïyen cho mökino kïlïkwï ropöwo ECHOTYON.

¹⁴ Ropchini chi anka tïkwïl nyo kikeyit ECHOTYON ropïyenichoni nyo tïng könyis tömönut odeny kutoch.

¹⁵ Metötonye sïkönö cho tïlöy choni, ametötonye meywon cho ngörï kïtïl choni, otini töni ECHOTYON ropöwon nyo ripo söpontanyi.

¹⁶ Ichengonyi pipö Israel suru kinyoryogh, atökïpöyit ighisyo Ema nyo mi ECHOTYON, atökïlïkwï ropöwontenkwa ompö tawu ECHOTYON.”

Otupo tay

¹⁷ Kïlenchï ECHOTYON Musa,

¹⁸ “Igha otupo tay nko kelyechi cho pö taghoy. Aitö kwenu Ema nyo mi ECHOTYON nko ato kïpelo amöros aiyin pögh ori.

¹⁹ Mwöto Aron nko werkachi morikwa nko kelyekwa

²⁰ otini petöy Ema nyo mi ECHOTYON anta otini karik ato kïpelo amöros atökïpöghisyö kïpel kitötogh ompö ma nyo pö ECHOTYON.

²¹ Wunöy morikwa nko kelyekwa atömömeghö, lïku nyï kirurut nyo pö kokay ompö chane nko monekwa löwïr.”

Mwagh nyo kiyiltoy

²² Kïlenchï ECHOTYON Musa,

²³ “Chenga tïkwïn cho ngutoy cho onyïn: kilen mut nko akonga cho pö mwaghpa manemane nko kilen sömök cho pö sinamon cho ngutoy cho onyïn nko kilen sömök cho pö tïkwïn cho lata miwen cho ngutoy cho onyïn

²⁴ nko kilen mut nko akonga cho pö kasya nko liten angwan cho pö mwaghpa arol.

²⁵ Ighonyi choni löwïr mwagh nyo tïlil nyo kiyiltoy nyo kenyornyoryö chi nyo nkït wölo kightoy tïkwïn cho ngutoy cho onyïn.

²⁶ Iyilonyi mwaghoni Ema nyo mi ECHOTYON nko Santuku Muma*

²⁷ nko mese nko karichi nko ketay ghyongo kitömöwo nko karichi nko ato kïpelo körösyon

²⁸ nko ato kïpelo amöros nyo kïpelöy nko karichi nko otupö nko kelyechi.

²⁹ Itïlilenyi karichoni, atökïtïlilitu tya. Melö swongöy chi anta kïgh anka tïkwïl nyo melö tïlil.

³⁰ Iyilenyi Aron nko werkachi aitïlil chane, atökïpöghisyeghwanïn le tïsï.

³¹ Ailenchï pipö Israel, ‘Lïku nyï mwagh nyo tïlil nyo kiyiltoy ompö pïnwöyikwa kokay.

³² Melö kïmïlchini por pö chi kïtïkon ameghönye chi mwagh anka nyo karkegh nko nyoni, tïlil mwaghoni ompö akwa.

³³ Ato nyornyoryö chi mwagh anka nyo karkegh nko nyoni anta yila chi anka tïkwïl, kepesyegho piköchan.’ ”

Tïkwïn cho ngutoy cho onyïn

³⁴ Kïlenchï ECHOTYON Musa, “Chenga tïkwïn cho ngutoy cho onyïn aikany kïkarkegh nïkisyengwa, choni kï: natap nko syekelet nko kelpen nko upani.

³⁵ Aigh tïkwïn cho ngutoy cho onyïn. Aitö partin atökwigh kitïlilitu.

³⁶ Itïghotïghenyi walaka kïmïnkechitu aitö walaka Santuku Muma ompö ori Ema nyo mi ECHOTYON, wölo onyoryeghonan nko akwa, lïku nyo tïlil tya ompö akwa.

³⁷ Amoghchï kegh tïkwïn cho ngutoy cho karkegh nko chay kakitïlil, ompöwölo lïku cho tïlilöch ompö akwa ompö ECHOTYON.

³⁸ Chi anka tïkwïl nyo ighöy tïkwïn cho ngutoy cho le choni, kepesyegho piköchan.”