WUWÖT 27 - PIPÏLIA

¹ “Itekenyi ato kïpelo amöros ompö tilok, ikany kïngata miten odeny koghïntanyi nko töpesïntanyi akïngata mita akonga kutok.

² Itö kuy angwan luchtine kwangwan, cho nömöy kegh tïkwïl aimala taghoy.

³ Ighenyi tören cho toköy aren nko kichikeni ngayam nko tïwanay nko sartï nko nököghon. Ighonyi karichoni löwïr taghoy.

⁴ Ighchï wölo lïtöy arenï nyo pö kari taghoy. Aitö kaymoris angwan cho pö karïn, kuye kï angwan.

⁵ Itö wölay lïtöy arenï kaymoris okumpö ngwïny, atökwit kwenu ato kïpelo amöros.

⁶ Igh pölöwo tilok aimala taghoy,

⁷ kitöni pölöwechay kïsïtïtoy kïlït kaymoris cho mi woptin odeny nyo pö ato kïpelo amöros.

⁸ Igha ato kïpelo amöros santukï nyo pö ket, lenyini kikiporunyi ompö kutïng.

Kasar nyo pö Ema nyo mi ECHOTYON*

⁹ “Ikörenyi kasar nyo pö Emenyan, ompö okumpö tagh nyo pö kasaru kïmito sïra katani nyo karam nyo kikïpirir, lïku koghïntanyi miten 44,

¹⁰ pchörinekwa kï tömönut odeny nko pïrïmpotikwa cho le tömönut odeny cho pö taghoy, wölo akodetiskö nko lïkipkö kïpö silpa.

¹¹ Karkegh koghïntanyi ompö okumpö löt.

¹² Kimito ompö okumpö ta sïra nyo le miten 22 koghïntanyi nko pchörin taman nko pïrïmpotikwa.

¹³ Töpesïnto kasaru ompö okumpö kongasis kï miten 22.

¹⁴ Sïre nyo pö wop akonga ompö kuke kï kingata miten mut nko odeny nko pchörin sömök nko pïrïmpotikwa.

¹⁵ Ompö woptö anka nyo pö kukat kï kilata nyoni.

¹⁶ Mi sïra kuketo kasaru nyo le miten mut nko angwan koghïntanyi, ananka katani nyo kikïsïl nyo orus nko nyo lata akwa lamay nko nyo pïrir nyo pö puto kech. Kitïng pchörin angwan nko pïrïmpotikwa.

¹⁷ Kikïrata wayen nko akodetispa silpa pölöw löwïr cho pö kasar cho kiwit, kegha kötöngtinekwa taghoy.

¹⁸ Koghïnto kasaru kï miten 44, miten 22 töpesïntö, kïngata miten odeny kutoch. Kikïnapa ananka katani nko pïrïmpot cho pö taghoy.

¹⁹ Kigho taghoy karïn löwïr nko nömöwe cho kiwit kasaru Emanoni.

Kerip kitömöwon

²⁰ “Imwochinenyi pipö Israel kwipunyi mwagh pö orolwö nyo kipköngöy, atökïnagh kitömöwonte chik.

²¹ Töpo Aron nko werkachi ato kïnyoryegho ompö Ema nyo mi ECHOTYON ompö sanypa sïranay mi tawu Santuku Muma.* Nöghöy kitömöwo ntökïyech ompö tawu ECHOTYON. Lïku nyoni kirurut nyo pö kokay ompö pipö Israel nko monekwa löwïr.