WUWÖT 26 - PIPÏLIA

¹ “Igh Ema nyo mi ECHOTYON* aingotyeghö anankis taman, cho kikïnap nyo karam ompö puto kech cho orusöch nko cho lata akwa lamay nko cho pïröch. Atolapay imina kerupimtin.*

² Lïku koghïnto ananke miten taman nko odeny, kïlïkwï töpesïntanyi miten odeny. Karkegh anankiska löwïr.

³ Inap anankiska cho le mut kïlïkwï akonga. Inap chona walaka lenyoni.

⁴ Ighchï yitïn cho orusöch sörömuto anankiska aigh chinö walaka lenyoni.

⁵ Ighchinenyi yitïn tömönut mut ananka akonga aigh chinö walaka lenyoni. Topönöy kegh möcheywe.

⁶ Igh akodetis cho le 50 cho pö koltin ainyoryö anankiska ompö akodetischoni, atökïlïkwï kïgh akonga.

⁷ “Inap anankis taman nko akonga ompö puto ngaror, atökïlïkwï pörköyeto Emanoni.

⁸ Igh cho karkegh, lïku koghïntö miten taman nko sömök, kïlïkwï töpesïntö miten odeny.

⁹ Inap anankiska mut kïtuyö, kïtuyö tïkwïl chinö le mut nko akonga ainyakïm nyo pö mut nko akonga ompö tawu Ema.

¹⁰ Ighchï yitïn 50 sörömu chay kikïnapta akonga aighchï chinö walaka lenyoni.

¹¹ Igh akodetispa taghoy cho le tömönut mut aitö yitichay tökunyoryö Eme kïlïkwï akonga.

¹² Kareranta nyo köngötï nyo pö anka, ikany kïyïsö lötu Ema.

¹³ Nyinö köngötï le sentimiten 50 ompö woptine odeny, ikany kïyïsyeghö Emanoni onkunï nko onkuntö nyinö anka atökïkarta Eme.

¹⁴ “Inap sïro pö mökol cho kikïsïl kïpïröchitu nko cho pö ngaror cho kilumo Eme.

¹⁵ “Itekta tilok kïlïkwï pölöweko Emanoni.

¹⁶ Lïku pölöwonte akong miten angwan koghïntanyi, kïlïkwï töpesïntanyi sentimiten 66.

¹⁷ Tïngeto pölöwonta anka tïkwïl wölo lïtate, wölo kinyoryegho, igh lenyoni pölöwe löwïr cho pö Emanoni.

¹⁸ Ighenyi pölöweko Ema cho le tömönut odeny ompö okumpö tagh.

¹⁹ Igh pïrïmpoti silpa cho le 40 cho kilutöy pölöwe, pïrïmpot odeny ompö ngwïnyi pölöwon akonga atökïnam pölöwe wölay lïtote.

²⁰ Ighenyi pölöweko Ema cho le tömönut odeny ompö okumpö löt

²¹ aigh pïrïmpotichoni le 40, pïrïmpot odeny ompö ngwïnyi pölöwon akonga.

²² Igh pölöw cho le mut nko akonga ompö Ema wölo le löt okumpö ta.

²³ Itö pölöw odeny luchtine okumpö löt.

²⁴ Chöghote ompö okumpö ngwïny, wölo nömote ompö parak ompö kiwitate nyo pö tagh. Lata choni kwodeny, choni cho nyoryot luchtine kwodeny.

²⁵ Pölöw cho le mut nko sömök nko pïrïmpotikwa cho pö silpa cho le 16 pïrïmpot odeny ompö ngwïnyi pölöwon akonga.

²⁶ “Igh pïrompur cho pö tilok, mut ompö wop akonga nyo pö Emanoni

²⁷ nko pïrompur mut ompö woptö anka nko pïrompur ompö wölnö le löt okumpö ta.

²⁸ Wölo weröy pïrompuryonta nyo mi kwenu pölöw kïngata söröm ntökwit söröm.

²⁹ Imolonyi pölöwe koltin aighonyi koropetine koltin cho nömöy pïrompurkö cho kïmolo tïkwïl.

³⁰ Itek Eme le ato kyoporunyi ompö kutïng.

³¹ “Inapa ananka katani puto kech cho kikïsïl cho orusöch nko cho lata akwa lamay nko cho pïröch ainöpchï kerupimtin.

³² Aitö kïyïsyeghö pchörin angwan cho pö tilok akikïmala koltin nko akodetis pö koltin ompö pïrïmpot angwan cho pö silpa.

³³ Iwusyï ananke akodetischay, atökungotyö Wölo Tïlil nko Wölo Tïlil Tya.* Aichengwï Santukunay pö Muma* aitö lötu ananka.

³⁴ Itöninyi köröwon paraku Santuku Muma ompö Wölo Tïlil Tya.

³⁵ Itö mese ananka okumpö sany aitö ket pö kitömöwon okumpö tagh ompö Ema, tawu mesa. Itö mese okumpö löt.

³⁶ “Inöpchï ananka katani kuketo ema nyo kikïsïl nyo orus nko nyo lata akwa lamay nko nyo pïrir nyo pö puto kech.

³⁷ Ighchï anankanay pchörin mut cho pö tilok aimala koltin. Lïku akodetiskökwa cho pö koltin. Aighchï pïrïmpot cho le mut cho pö taghoy.