TUMWÖY 99 - PIPÏLIA

¹ Pöytoghin ECHOTYON nya kïpotonchö pich! Töpo nyinte ngacharu paytagh ompö kerupimtin* nya kïpotan ngwïnya!

² Awes ECHOTYON ompö Sayon* akïtöror kïtïl pich lapay.

³ Nya kïsal pich löwïr kaynenyi nyo pö otyogh. Tïlil nyinte!

⁴ Ichömenyi man, we Pöytoghin nyo wow, kekïninienyi man ompö koro Israel. Kekonunyi kirwok nyo tenate nko man.

⁵ Asala ECHOTYON Tororötïncha, asagha ompö tawu ngacharenyi! Tïlil nyinte!

⁶ Ki Musa nko Aron ompö kwenu tïsichi, ki Samwel ompö kwenu pich cho kisoghöy kaynenyi. Kirirchï chane ECHOTYON, kïlïm saghatengwa.

⁷ Kingölonchï chane ompö pchöri polta, kïrïp chane kirurutkachi nko kiyomisut cho kimwochï chane.

⁸ Kilïmanyi sowut pö piköku, we ECHOTYON Tororötïnyo, kichinyi Tororöt nyo ilöstoghchini pich lelut, kïrkegh kichopanyi kong chane ompö ngokikwa.

⁹ Asala ECHOTYON Tororötïncha asagha nyinte ompö kutïngtanyi nyo tïlil. Tïlil ECHOTYON Tororötïncha. Tum nyo kiyokyino Tororöt sörö.