TUMWÖY 98 - PIPÏLIA

¹ Otumchinö ECHOTYON tum nyo tökïrel, ompöwölo kegh nyinte ngala töngönchin! Karïnta nyinte ompö ewunyi tagh akïlotisyö ompö owesyenyi nyo wow.

² Keporï ECHOTYON rïntaghtanyi, keporchï punton owesyenyi nyo söru pikachi.

³ Kenan nyinte chomnyenyi nyo pö kokay ompö pipö Israel nko otöptanyi nyo ghanate. Kasïwa ngwïnya kïmïkul, rïntaghpa echotyon Tororötïncha.

⁴ Otumchinö ngwïnya kïmïkul ECHOTYON ompö ngörekyö, asalena nyinte tumwöy ateghyö ompö ngörekyö.

⁵ Otumchinö ECHOTYON ompö sölut! Otumchinö nyinte ompö pïkan!

⁶ Akuta kontï nko adadat ateghyö, otumchinö ECHOTYON, Pöytoghintenyo ompö ngörekyö.

⁷ Nya kughum nanam nko tyonkïn löwïr cho mi orinyi, nya kïtum ngwïnya tïkwïl nko cho möngöy orinyi.

⁸ Arapacha morikwo, akwa lalwatïn, nya kïtum kutïngkotï tïkwïl ompö ngörekyö.

⁹ Otumenö tawu ECHOTYON ompöwölo kengwïn kurwokyï ngwïny. Rwokyini nyinte ngwïny ompö man akïpayta pich ompö kitenat.