TUMWÖY 97 - PIPÏLIA

¹ Pöytoghin ECHOTYON! Ngaraka, ngwïnya! Oturonchenö koroswo nanam!

² Kiwitwit poltoy nyinte nko tuwïn, chïchïmo paytaghtanyi kitenat nko man.

³ Ntöghoghchini ma tawunyi akïpel pungkachi ompö wop löwïr.

⁴ Kipkany ngwïny kiryaltanyi, kïsïwa ngwïnya akïpotan.

⁵ Kinyit kutïngkotï ompö tawu ECHOTYON le tömönchö, kinyita chane tawu Echotyonto ngwïny kïmïkul.

⁶ Mwotïtoy yïmwöy mantanyi akïsïwïyi pipö punton löwïr ororyenyi.

⁷ Nyoru arasï pich löwïr cho soghöy körkeyïntin, chane cho wulo kegh tïkwïn cho puryö kinyiwut. Nya kïsagh tororötinö tïkwïl ECHOTYON.

⁸ Akanya kïngörekyö pipö Sayon,* we ECHOTYON, akïturonchö kanastina Yuda ompö kirwokutköku.

⁹ Ichinyi wow nyoman, we ECHOTYON ompö ngwïny kïmïkul, kitörorinyi wow kïtïl tororötin walaka löwïr.

¹⁰ Chömöy ECHOTYON pich cho reyöy ngokï, ripöy nyinte söponwo pikachi akïsörunö chane ewuno pich cho ghach.

¹¹ Lïwchini löpoyïn pipö man ngörechot pich cho tenote.

¹² Ongörekyenö pipö man ompö ECHOTYON! Asala kaynatenyi nyo tïlil!