TUMWÖY 62 - PIPÏLIA

¹ Oköngan Tororöt ompö sison, ngwïno sörunötenyan wölo mi nyinte.

² Nyinte onkït nyo le köpönenyan akï sörunötenyan teköwontenyan nyinte, möminye kïgh nyo rïntonanïn.

³ Opokyinekwa chi akonga nko oyï, chi nyo mökïtïngnye wölo lata?

⁴ Nonöy chane pat lö tökirultö nyinte ompö ngacharunyi. Ngörökyini chane putintön. Soyöno chane pich kutïwekwa, wölo chïpisïyi ompö mïkuliskökwa.

⁵ Oköngan Tororöt ompö sison, ngwïno kikönötenyan wölo mi nyinte.

⁶ Nyinte onkït nyo le köpönenyan akï sörunötenyan, teköwontenyan nyinte. Möminye kïgh nyo rïntonanïn.

⁷ Chïchïmo sörunötenyan nko konyïtïnyan Tororöt. Köpönenyan nyinte nyo awes akï ghöpöwontenyan nyinte.

⁸ Okönö Tororöt kïtenö osis, we pïchï! Omwochinö nyinte kömpölelutkökwo löwïr, nyinte nyo le ghïpöwontencha.

⁹ Karkegh pich löwïr nko saywan. Melö tïng kinyiwut chane löwïr, cho echön nko cho mïnkech. Ato kipim chane kïmelö tungöy kïgh nyonikïny, kwïskwïse chane le saywan.

¹⁰ Mokön tïkwïn cho kïmoso pich amokwolö kegh mökosyö nyo kïsïko masat. Kïrkegh katasa mökosyö, motighö kegh.

¹¹ Kimwa Tororöt nyo mötïny alïman nyoman lö, pö owesyö Tororöt

¹² akï pö chomnyenyi kokay. Nyi, we Echotyon nyo iropchini chi anka tïkwïl, kïrïp kegh nko ighisyewutkachi. Tum pö Daudi, otini kimi surkwen pö Yuda.