TUMWÖY 30 - PIPÏLIA

¹ Okusinyi, we ECHOTYON, ompöwölo kesörwaninyi amelö kepïsinyi pungköchan kïroröchanïn.

² Kyarirunyi, we ECHOTYON Tororötïnyu, isopaninyi.

³ Kisörwaninyi achïwïta ngwen, kyowetan otöngöy pïrïm, wölo kiyokunyi söpontönyan.

⁴ Otumchinö ECHOTYON tumwöyi sölut, akwa lapay cho kalïkwï pikachi! Oyokyinö sörö kaynenyi nyo tïlil.

⁵ Töpo nörekyenyi nyo tangogh, wölo pö kokay köromnyenyi. Muköy lok kïtörengu ato le oghö, wölo itu kuti ngörekyö ato le tökwoghö.

⁶ Kyononan lö ochan ripote olan, “Möminye kïgh nyo timtimanïn!”

⁷ Ompö chomnyengu, we ECHOTYON, kyoghyongön le kutïng. Wölo otini kiwïngenaninyi kegh, owöghisyan.

⁸ Kyarirunyi, we ECHOTYON, asaghinyi lö,

⁹ “Isïkonyi ne meghenyan? Isïkenyi ne ato owan ngwen? Muköy so nyïngwïtyanta kïsölinyi? Muköy so kïmwotïtoy ketwayta kegh nyi?

¹⁰ Iterwante, we ECHOTYON, aisyonchante! Ngarakante, we ECHOTYON?”

¹¹ Kewaghakanyi lokechan kïlïkwï ngörekyö. Kenateghenyi nyarïl ompö ani ainyïghitaninyi turönöt,

¹² atasalinyi amelö osisan, we ECHOTYON Tororötïnyan, oyokunyi sörö kokay. Ompö kintöghoghinto tumï. Tum pö Daudi.