TUMWÖY 148 - PIPÏLIA

¹ Asala ECHOTYON! Asala ECHOTYON ompö yïmwöy asala nyinte chona omöngöy parak.

² Asala nyinte, akwa malaykenichi löwïr, asala nyinte, akwa söpïch pö yïm löwïr.

³ Asala nyinte, akwa asis nko arawa, asala nyinte, akwa kokel cho olïwu

⁴ Asala nyinte, akwa yïmwöy cho omitö parak nko pögh cho omitö paraku yïmwöy.

⁵ Nya kïsal chane kaynata ECHOTYON! Ompöwölo kingalan nyinte, kwighisyö lenyoni,

⁶ akutö kïtïpï woptinekwa kokay akïmwa ngölyon nyo mewerönye kokay.

⁷ Asala ECHOTYON ompö ngwïny, akwa tyonkïn cho mi nanam nko ngwïnyi nanam.

⁸ Asala nyinte kiryaltina nko takarïs nko röyön nko chepkïrïri, akwa cho orïpöy kirurutkachi.

⁹ Asala kutïngkotï nko komos, nko ket cho oyinu akwa nko tarakit,

¹⁰ nko tïpö wudïn nko kyak tïkwïl, nko moroyut nko törit.

¹¹ Asala pöytoghï nko pipö punton löwïr, kintöghoghï nko kirwokot tïkwïl.

¹² Asala nyinte akwa mïrön nko kor, asala poyï nko monïng.

¹³ Nya kïsal chane kayna ECHOTYON, ompöwölo kaynatenyi onkït nyo töror, tïlöy töroryenyi ngwïny nko yïm.

¹⁴ Kegh pikachi kïsïch owesyö, atökïnyorï chane salat tïkwïl, lekïtöch pipö Israel ompö nyinte! Asala ECHOTYON!