TUMWÖY 145 - PIPÏLIA

¹ Otörorinyi, we Tororöt Pöytoghintenyu oyokunyi sörö kokay nko kokay.

² Oyokunyi sörö kïtenö osis, osölan kaynatengu kokay nko kokay.

³ Wow ECHOTYON akïmïchini kesal nyinte tya, memukönye kenkïtu wowïntanyi.

⁴ Mwochini pïn pïnta anka ighisyewutköku, mwotïtoy chane ngaleku cho echön.

⁵ Ngölono chane ororyengu nko töroryengu, atananan nyu ighisyewutköku cho pö töngönchin.

⁶ Ngölono pich ngaleku cho pö otyogh, omwotïtenan wowïntöngu.

⁷ Mwotïtoy chane salat nyo pö köromnyengu nyo wow akïtumchï mantangu ompö ngörekyö.

⁸ Tïngeto ECHOTYON pöropchö akï kisyonin mönörekönye lawel akï tïng chomnyogh nyo pö kokay.

⁹ Karam ECHOTYON ompö pich löwïr akusyonchini nyinte tïkwïn cho kigh.

¹⁰ Yokunyi sörö tïkwïn löwïr cho kighanyi, we ECHOTYON, akuyokunyi piköku cho ghönote sörö.

¹¹ Ngölono chane ororyeto paytaghtangu akïmwatïta owesyengu nyo wow,

¹² atökunkïtï ptangengmöt, ighisyewutköku cho owesöch nko ororyeto paytaghtangu.

¹³ Pö kokay paytaghtangu aipöytonyi ompö pïnwöy löwïr. Kitwoytoy kegh ECHOTYON ompö ngalechi akï tïng pöropchö ompö ighisyewutkachi.

¹⁴ Tighöy ECHOTYON pich cho pïtyot, akunget chane cho kichopöy kong.

¹⁵ Sömökinyi kïgh anka tïkwïl, ipöghenyi chane otini ketïta ato mököy.

¹⁶ Ipöghenyi chane kïmïchï aigh kïgh anka tïkwïl nyo söpöy kïpïghyö.

¹⁷ Pö man ECHOTYON ompö ortïnechi, akï talase ompö ighisyewutkachi.

¹⁸ Lekït ECHOTYON ompö pich cho kuröy nyinte, chane cho kuröy nyinte ompö man.

¹⁹ Töni pich cho rïpöy ngalechi möchutkökwa kïmïchï, lïmchini lokekwa akïsörï chane.

²⁰ Ripöy ECHOTYON pich cho chömöy nyinte, wölo wongöy mwokïyis löwïr.

²¹ Sölöy ngalyapunyan ECHOTYON kïtenö osis, nya kuyokyï sörö kïgh anka tïkwïl nyo söpöy kaynatenyi nyo tïlil, kokay nko kokay.