TUMWÖY 119 - PIPÏLIA

¹ Soyönote pich cho mötïngnye otöptinekwa lelut, cho komönöy kinetut pö ECHOTYON.

² Soyönote pich cho ripöy kirurutkachi, akïkonyïtöy nyinte ompö mïkulöwekwa kïmïkul.

³ Pich cho meghöcha ghöyityö nyonikïny, wölo cho rïpöy ortïna ECHOTYON.

⁴ Kikonechanyi kinetutköku, we ECHOTYON, atökekamanacha ompö kighanat.

⁵ Olentan, opï köghïteghote ortïnechan lachïs, ompö otini orïpan kikirutköku!

⁶ Ato akamanan kirurutköku löwïr kïmelö osïkan arasï.

⁷ Osölinyi ompö mïkulögh nyo tenate otini omitan onetöy kegh kirwokutköku cho pö man.

⁸ Oripan kikirutköku, mepïstante kokay wey!

Konyït ompö kirurut pö ECHOTYON

⁹ Muköy chumwaka kïrip söpenyi kïtïlilit lö ne? Muköy ato rip ngölyontengu.

¹⁰ Oyörinyi ompö mïkulöwunyu kïmïkul, mekany opotan kirurutköku.

¹¹ Kororchan ngölyontengu mïkulöwunyan, tömawunyi ngokï.

¹² Osölinyi, we ECHOTYON, netante kikirutköku.

¹³ Omwotïteghonan kutinyu kirurutköku löwïr cho kikonunyi.

¹⁴ Ongörökyinan orïpe kirwokutköku kïtïl mökosyö nyo wow.

¹⁵ Ononchinan kinetutköku, amilan ortïneku.

¹⁶ Ongörökyinan kirurutköku, amowutyeghonanye kikirutköku.

Ngörekyö ompö kirurut pö ECHOTYON

¹⁷ Ighchinö mötworintengu nyo karam, tosöpön akaman ngölyontengu.

¹⁸ Yata konyichan asïwan tïkwïn cho kïtöngönchini cho mi kirurutköku.

¹⁹ Ochan rutoghin ompö ngwïny, mewïngenante kikirutköku.

²⁰ Soyöy söpontönyan kïpïrchin kunkïtï kirwokutköku osis tïkwïl.

²¹ Ipkongenyi pich cho le menot, ay chïpote pich cho penyöy kirurutköku.

²² Chengenenanïn kimwosyengwa nko kichïmpisatengwa, ompöwölo karïpan kirwokutköku.

²³ Kïrkegh kïtat pöytoghï kïwökanïn, kïtö omilan kikirutköku.

²⁴ Konanïn kirwokutköku ngörekyö, kirurichan choni.

Kerïp kirurut pö ECHOTYON

²⁵ Omitan ompïlo terïtyon, Yokwante osöp kïrïp kegh nko ngölyontengu.

²⁶ Kyanganyan kutinyu, amwowunyi ngal cho kyaghan, imölyöngwaninyi. Netante kirurutköku.

²⁷ Ighante onkïtï kirurutköku, atananan ighisyewutköku cho pö töngönchin.

²⁸ Osoyan ompö ngwonïn, kilante kïrïp kegh nko ngölyontengu.

²⁹ Ripante tömarïp or nyo gha, ainetante kirurutköku ompö köromnyengu.

³⁰ Kakïlan ara konyït akyotönön tawunyan kirurutköku.

³¹ Orïpan kirwokutköku we ECHOTYON, mekany onyorwan arasï.

³² Orïpan kirurutköku ompö machat, ompöwölo itöswaninyi pköchin.

Kesagh kenyorï pköchin

³³ Netante okonyït kikirutköku, we ECHOTYON, atakamanan osis löwïr.

³⁴ Konante pköchin atoripön kirurutköku, okomönan ompö mïkulöwunyu kïmïkul.

³⁵ Ntöghoghwante ompö ara kikirutköku, ompöwölo onyorunan ngörekyö ompö choni.

³⁶ Kono pïrchin pö kirwokutköku, melö sïkönöt nyo puryö kinyiwut.

³⁷ Malena konyichan tïkwïn cho puryö kinyiwut, aikomönwo söpontanyu ompö orengu.

³⁸ Punteghenö kiyomisötengu ani mötworintengu, le wölo kiyomisyinyi pich cho konyïtinyi.

³⁹ Maltegheno roröchin nyo owöghan, ompöwölo karamach kirurutköku.

⁴⁰ Rose lö omchinanïn emö kinetutköku, konante söpon ompöwölo iponyi man.

Kaghan kirurut pö ECHOTYON

⁴¹ Nya kungwïnchanïn chomnyengu nyo möwöghökonye, we ECHOTYON, aisörwante kïrïp kegh nko kiyomisötengu.

⁴² Atamukan nyu owöghökyï pich cho roröchinanïn, ompöwölo otwoytonan kegh ngölyontengu.

⁴³ Ighante amwa ngölyonto man kïtenö osis, ompöwölo mi kikönötenyan kirurutköku.

⁴⁴ Okïran kirurutköku kïtenö osis, kokay nko kokay,

⁴⁵ owesteghan wölo puryö tapan nyonikïny, ompöwölo kyanaman kinetutköku.

⁴⁶ Omwotïteghonan kirwokutköku tawu pöytoghï amosïkanye arasï.

⁴⁷ Ongörökyinan kirurutköku, ompöwölo ochöman.

⁴⁸ Okonyïtan achöman kirurutköku, anonan kinetutköku.

Ketwayta kegh kirurut pö ECHOTYON

⁴⁹ Inan ngölyon nyo kiyomisyinyi mötworintengu, ay nyoni nyo keghaninyi okön.

⁵⁰ Kïgh nyo soghsoghanïn omitan nyarïltanyu, kwompöwölo konanïn söpon kiyomisötengu.

⁵¹ Sösanïn pich cho meghönöcha Tororöt, wölo mopïstanye kirurutköku.

⁵² Ato ananan kinetutköku cho pö könyisyok, we ECHOTYON, onyorwan saghsaghat.

⁵³ Lilanïn kïgh mwokïyis cho pïstoy kirurutköku.

⁵⁴ Kilïkwï kikirutköku tumwöyichan ompö konyan nyï pö osis cho ngörï.

⁵⁵ Ononinyi oghö, we ECHOTYON, arïpan kirurutköku.

⁵⁶ Kisoyönötononi nyo kalïkwï nyinyan, ompöwölo karïpan kinetutköku.

Kerïp kirurut pö ECHOTYON

⁵⁷ Ichinyi kïgh anka tïkwïl nyo komökan, we ECHOTYON, oyomisan lö oripan ngaleku.

⁵⁸ Osoghinyi ompö mïkulöwunyan kïmïkul lö, syonchante kïrïp kegh nko kiyomisötengu!

⁵⁹ Ato ananan otöptinechan, owöghökyan kegh kirwokutköku.

⁶⁰ Kyakuskusan kegh nyoman, arïp kirurutköku lasiny.

⁶¹ Kïrkegh kiwitanïn ngöghöptino mwokïyis, kïmowutyeghenanye kirurutköku.

⁶² Ongetan oghökwen osölinyi ompö kinetutköku cho pö man.

⁶³ Ochan kongot nko pich löwïr cho wöghinyi nko, chane cho rïpöy kinetutköku.

⁶⁴ Kinyighï ngwïny chomnyengu nyo möwöghökonye, we ECHOTYON, netante kirurutköku.

Tösunöt nyo pö kirurut pö ECHOTYON

⁶⁵ Keghchinyi mötworintengu nyo karam, we ECHOTYON, kïrïp kegh nko ngölyontengu.

⁶⁶ Netante ongöghomit achïreritï, ompöwölo oghönan kirurutköku.

⁶⁷ Kyochan low kïtomö onyorwan sitöt, wölo orïpan ye nyu ngölyontengu.

⁶⁸ Ichinyi karam aighenyi nyo karam! Netante kikirutköku.

⁶⁹ Kömïrchanïn put pich cho meghönöcha Tororöt, wölo oripan kinetutköku ompö mïkulöwunyu kïmïkul.

⁷⁰ Möpköchininye kïgh chane nyonikïny, wölo ongörökyinan kirurutköku.

⁷¹ Karam kyonyorwan sitöt, atö anetan kegh kikirutköku.

⁷² Karamach kirurutköku ompö ani, kïtïl sïkönöt cho pö tïkwïn cho chang.

Manpa kirurut pö ECHOTYON

⁷³ Kighaninyi ewuneku kuten, konante chïreryö atanetan kegh kirurutköku.

⁷⁴ Pïchona konyïtinyi kïngörekyot nyini kasïwanïn, ompöwölo kyamantan kegh ngölyontengu.

⁷⁵ Onkïtön lö, pö man kirwokutköku, we ECHOTYON nka nyoni ketönaninyi sitöt ompöwölo ichinyi ghanate.

⁷⁶ Nya kïsaghsaghanïn chomnyengu nyo möwöghökonye, kïrïp kegh nko kiyomisötengu, nyo kiyomisyinyi mötworintengu.

⁷⁷ Nya kungwïnchanïn kisyonötengu atosöpön, ompöwölo ongörökyinan kirurutköku.

⁷⁸ Nya kïnam arasï pich cho le menot, ompöwölo keghanïn nyo gha, wölo ononan kinetutköku.

⁷⁹ Nya kïpkonchanïn pich cho konyïtinyi, atökunkïtï kirwokutköku.

⁸⁰ Nya kuten mïkulöwunyan ompö kikirutköku atömosïkön arasï!

Saghata sörunöt

⁸¹ Komchanïn emö sörunötengu ntaryaltan, ompöwölo oköngan ngölyontengu.

⁸² Koghochö konyichan kïköngöy kiyomisötengu, katepan lö, “Oyï ato isoghsoghaninyi?”

⁸³ Kyaran le takol nyo mi kompa ma, wölo melö kyowutyeghan kikirutköku.

⁸⁴ Köngisïyi mötworintengu nko oyï? Irwokyinenyi oyï pich cho chopanïn kong?

⁸⁵ Köpölchanïn pïrïmpot pich cho menkïtcha Tororöt, pich cho mörïpöcha kirurutköku akïlentöy lö tochïnchan.

⁸⁶ Pö man kirurutköku löwïr, kechopanïn pich kong kwïle ngarakante!

⁸⁷ Kikït kumï chane kïparanïn, wölo tomönye apenyan kinetutköku.

⁸⁸ Sopante ompö chomnyengu nyo möwöghökonye, atamaman kirwokutköku cho kimwowunyi.

Ketwaytakegh kirurut pö ECHOTYON

⁸⁹ Töpo ngölyontengu kokay, we ECHOTYON, pö könyisyok kokay ompö yïm.

⁹⁰ Ghömu otöptöngu nyo ghanate pïnwöy löwïr, kipintitanyi ngwïnyinï akughyongöy lenyoni kokay.

⁹¹ Mi tïkwïn lenyini kighanyi nko ye, ompöwölo mötworiku tïkwïn löwïr.

⁹² Ontökimalïkwï kirurutköku ngörekyenyan, kötökyowonyan ompö nyörilwok.

⁹³ Mowutyeghonanye kinetutköku kokay, ompöwölo kekonaninyi söpon ompö choni.

⁹⁴ Ochan nyengu, sörwante! Ompöwölo kyayaran kinetutköku.

⁹⁵ Syepanïn mwokïyis lö tökïparanïn, wölo ononan kirwokutköku.

⁹⁶ Kosöwan lö tïng kïgh anka tïkwïl rotyenyi, poto kinetutköku cho puryö rotyot.

Kecham kirurut pö ECHOTYON

⁹⁷ Ochöman kirurutköku nyoman! Ononan chane kwimön.

⁹⁸ Mi kirurutköku nko ani kïnomnyö, akwighanïn ongöghomit kïtïl pungköchan.

⁹⁹ Ochan chïrer kïtïl konetichan löwïr, ompöwölo ononan kirwokutköku.

¹⁰⁰ Otïngetan ngöghomnyö kïtïl poy, ompöwölo oripan kinetutköku.

¹⁰¹ Kataghan ortïn löwïr cho ghach, atamukan orip ngölyontengu.

¹⁰² Momosteghonanye möchutköku, ompöwölo ichinyi konetintenyan.

¹⁰³ Ochï onyïnchinanïn ngaleku, onyïne kïtïl kumat!

¹⁰⁴ Onyorunan ngöghomnyö onyorchini kinetutköku, kïlenyona otöghan otöp anka löwïr nyo pö putintön.

Löpoyïn kirurut pö ECHOTYON

¹⁰⁵ Kitömöwonto keltönyan ngölyontengu akï löpoyïnto arenyan.

¹⁰⁶ Oripan ayomistanyu lasiny mapeny, arip möchutköku cho pö man.

¹⁰⁷ Kowongwan nyona, we ECHOTYON, konante söpon kïrïp kegh nko ngölyontengu.

¹⁰⁸ Taka saghatenyan le ropöwon, we ECHOTYON, ainetante möchutköku.

¹⁰⁹ Mi söpenyan tapan kïnomnyö, wölo mowutyeghonanye kirurutköku.

¹¹⁰ Kikutö mwokïyis tawunyan ngöghöp, wölo momosteghonanye kinetutköku.

¹¹¹ Ngwïsyenyan nyo pö kokay kirwokutköku, ay ngörekyeto mïkulöwunyan.

¹¹² Kanïkan akonga arïp kikirutköku, kokay tökureltö söröm.

Kalya nyo mi kirurut pö ECHOTYON

¹¹³ Otöghan pich cho kisach kinonut, wölo ochöman kirurutköku.

¹¹⁴ Ichinyi ghïpöwontenyan aichï teköwontenyan, omontonan kegh ngölyontengu.

¹¹⁵ Apeghena wölo omitan, akwa mwokïyis, atamukan arïp kirurutko Tororötïnyu.

¹¹⁶ Tighante kïrïp kegh nko kiyomisötenyu atosöpön, mekany osïkön arasï ompö kikönötenyan!

¹¹⁷ Tighante atonyorï kalya, ononan nyu kirurutköku kïnomnyö.

¹¹⁸ Itöghenyi pich löwïr cho mostoy ompö kikirutköku, ompöwölo mïröy put akïtïng chïreryo putintön.

¹¹⁹ Ilöstonenyi mwokïyis pö ngwïnyinï löwïr le samï, nka nyoni ochöman kirwokutköku.

¹²⁰ Opotönan ompöwölo owöghinyi, awöghan kirurutköku.

Kekonyït kirurut pö ECHOTYON

¹²¹ Kaghan kïgh nyo karam akï mïchinote, mepïsyanïn pich cho ighwanïn ghöyityö!

¹²² Ghyongteghwante mötworintengu onyorï pöghisyö, mepïsyï menot kïpïranïn!

¹²³ Koghochö konyichan kusyepöy sörunötengu, nko kipuntogh nyo pö kiyomisötengu nyo pö man.

¹²⁴ Ighwante mötworintengu kïrïp kegh nko chomnyengu nyo pö kokay, ainetante kirurutköku.

¹²⁵ Ochan mötworintengu, konante pköchin, atamukan onkïtï kirwokutköku.

¹²⁶ Asete kwasis nyo ighenyi kïgh, we ECHOTYON ompöwölo kenyar pich kirurutköku.

¹²⁷ Ochöman kirurutköku kïtïl koltin, kïsir koltin cho pïchighöch.

¹²⁸ Ghïtoy kinetutköku söpenyan, otïghan ortïn löwïr cho pö putintön.

Machat nyo kïkonyïto kirurut pö ECHOTYON

¹²⁹ Pö töngönchin kirwokutköku, okonyïtan ompö mïkulöwunyan kïmïkul.

¹³⁰ Ingongunenyi ngaleku kïkonï löpoyïn akuporchini sölwöy ngöghomnyö.

¹³¹ Kyalasan angany kut, ompöwölo opïrchinan kirurutköku.

¹³² Pörunö wölo omitan aisyonchante, lenyini ighchinenyi pich cho chöminyi.

¹³³ Namante tömapït, kïrïp kegh nko kiyomisötengu amepïsyï ghöyityö kïpaytanïn.

¹³⁴ Söruneno pïröto ptangengmöt, atamuk orip kinetutköku.

¹³⁵ Soyönante olïmchï kegh lö imitenyi nko mötworïntengu ainetante kirurutköku.

¹³⁶ Yinu lok konyichan le konyi pöghon, ompöwölo katagh pich kïrip kirurutköku.

Manpa kirurut pö ECHOTYON

¹³⁷ Iponyi man, we ECHOTYON, akutenote kirwokutköku.

¹³⁸ Kekonunyi kirwokutköku, ompö man akï pö könyisyok kokay.

¹³⁹ Kila nörekyenyan le ma, ompöwölo köwutyeghö pungköchan ngaleku.

¹⁴⁰ Pö man kiyomisötengu, akï chömöy mötworintengu.

¹⁴¹ Ochan mïnïng akesösanïn, wölo mowutyeghonanye kinetutköku.

¹⁴² Pö kokay mantangu, akï pö kirurutköku man.

¹⁴³ Konyorwan nyarïl nko woyogh wölo konanïn ngörekyö kirurutköku.

¹⁴⁴ Pö man kirwokutköku kokay, konante pköchin atosöp.

Saghata sörunöt

¹⁴⁵ Okursïyan ompö mïkulöwunyu kïmïkul we ECHOTYON, imölyongwante, oripan kikirutköku!

¹⁴⁶ Okurinyi lö, sörwante, atakamanan kirwokutköku.

¹⁴⁷ Ongetan kïtomö kuwas asominyi kingörokut, omontonan kegh ngaleku kokay.

¹⁴⁸ Ochïkönan kïyech, ononöy kiyomisötengu.

¹⁴⁹ Tera kutinyan ompö chomnyengu nyo möwöghökonye, we ECHOTYON, aikaman söpontönyan ompö mantangu.

¹⁵⁰ Kirikwï pich cho ghach cho nyörilanïn, pich cho lowöch ompö kirurutköku.

¹⁵¹ Wölo ichinyi lekït we ECHOTYON, akï pö man kirurutköku löwïr.

¹⁵² Kegh ato kyanetan kegh kirwokutköku, lö kighanyi kïtïpïyö kokay.

Saghata kingörokut

¹⁵³ Rosa nyarïltanyan aisörwo, ompöwölo mowutyeghanye kirurutköku.

¹⁵⁴ Ghetante ompö ngalechu aityakante, kamanante kïrïp kegh nko kiyomisötengu.

¹⁵⁵ Low sörunötö ompö mwokïyis, ompöwölo möyöröcha kikirutköku.

¹⁵⁶ Wow kisyonötengu, we ECHOTYON, konante söpon kïrïp kegh nko mantangu.

¹⁵⁷ Otïngetan pung nko wökï cho chang, wölo mamastanye ompö kirwokutköku.

¹⁵⁸ Ghöchinanïn pich cho meghönotcha, ompöwölo möripöcha kirurutköku.

¹⁵⁹ Rose wölo ochömtonan kinetutköku, kamanante kïrïp kegh nko chomnyengu nyo möwöghökonye.

¹⁶⁰ Sïrumpeto ngölyontengu kï man, pö man akï pö kokay kirwokötengu.

Kekonï kegh kerïp kirurut pö ECHOTYON

¹⁶¹ Kereyanïn pöytoghï kwïle, wölo konyïtöy mïkulöwunyan ngaleku.

¹⁶² Ongörökyinan ngölyontengu le chi nyo könyorï pöröw cho chang.

¹⁶³ Oreyan atöghan putintön nyoman, wölo ochöman kirurutköku.

¹⁶⁴ Osölinyi asakonga kïnyïl mut nko odeny ompö kirwokutköku cho pö man.

¹⁶⁵ Tïngeto kalya pich cho chömöy kirurutköku, möminye kïgh nyo ighöy chane kwotyö.

¹⁶⁶ Okönan sörunötengu, we ECHOTYON, arïpan kirurutkö.

¹⁶⁷ Oripan kirwokutköku, achöman nyoman.

¹⁶⁸ Orïpan kinetutköku nko kirwokutköku, isïwïyenyi kïgh anka tïkwïl nyo oghan.

Saghata kingörokut

¹⁶⁹ Nya kwitï lokechan wölo imitenyi, we ECHOTYON! Konante sïkunöt kïrïp kegh nko ngölyontengu.

¹⁷⁰ Nya kwitunyi lokechan, sörwante kïrïp kegh nko kiyomisötengu.

¹⁷¹ Sölinyi kutinyan kïtenö osis, ompöwölo inetaninyi kikirutköku.

¹⁷² Tumöy ngalyapunyan kiyomisötengu, ompöwölo pö man kinetutköku löwïr.

¹⁷³ Nya kïnamatenïn ewungu osis löwïr ompöwölo kyakïlan kinetutköku.

¹⁷⁴ Omchinanïn emö sörunötengu, we ECHOTYON, akï ngörekyenyan kirurutköku.

¹⁷⁵ Nya osöpön atasalinyi, aikany kungarakanïn kinetutköku.

¹⁷⁶ Kyatampararan le kech nyo kemperöl, yara mötworintengu, mowutyeghanye kirurutköku. Tum pö pusat.