TUMWÖY 118 - PIPÏLIA

¹ Oyokyinö sörö ECHOTYON ompöwölo karam, ay töpo chomnyenyi kokay.

² Nya kïmwa pipö Israel lö, “Töpo chomnyenyi kokay.”

³ Nya kïmwa yiyo Aron lö, “Töpo chomnyenyi kokay.”

⁴ Nya kïmwa chona wöghöy ECHOTYON lö, “Töpo chomnyenyi kokay!”

⁵ Kyokurön ECHOTYON ato kyomitan nyarïl, kïlïm saghatenyan akutyakanïn.

⁶ Ato mi ECHOTYON akuntönyan, kïmowöghisïyanye, idenanïn ne ptangengmöt?

⁷ Mi ECHOTYON akuntönyan kungörokanïn asïwïyan punkachu kerïntoy.

⁸ Kaykay kemanta kegh ECHOTYON, kïtïl kemanta kegh ptangengmöt.

⁹ Kaykay kemanta kegh ECHOTYON kïtïl kemanta kegh kintöghoghï.

¹⁰ Kiwitanïn puntonï löwïr, wölo owongan chane ompö kaynata ECHOTYON!

¹¹ Kiwitanïn chane wop tïkwïl, wölo owongan chane ompö kaynata ECHOTYON!

¹² Kimïghanïn le sakam, wölo kïnöghö chane le sïkwïr nyo kapel ma, owongan chane ompö kaynata ECHOTYON.

¹³ Kikïporyeghenanïn tya ntökïlekït kerïntanïn, wölo kungarakanïn ECHOTYON.

¹⁴ ECHOTYON nyo konanïn owesyö nko rïntagh, kakïlïkwï nyinte ghetintenyan.

¹⁵ Atera kilïliyöto ngörekyö nyo pö rïntagh ompö emeni pipö Tororöt kïlentöy, “Karïnta ECHOTYON ompö owesyenyi!

¹⁶ Kakïnyorucha rïntagh ompö ewunyi nyo awes. Karïnta ewu ECHOTYON ompö owesyenyi!”

¹⁷ Momeghanye, wölo osöpan atamwatïta ighisyewut pö ECHOTYON cho kigh.

¹⁸ Kimunganïn ECHOTYON nyoman, wölo möpïstanïnye amegh.

¹⁹ Yotwante kukoti Kö pö Tororöt,* atolïtön ori oyokyï sörö ECHOTYON.

²⁰ Anyï kuka Kö pö ECHOTYON nyo lïtöy pipö man.

²¹ Oyokunyi sörö, we ECHOTYON, ompöwölo keterwaninyi saghatenyu, akelïkunyi sörunintenyan.

²² Kiwaghaka köghay kitagh tekï, kïlïkwï kinyiwut nyo wow.

²³ ECHOTYON nyo kigh lenyoni akï pö töngönchin kïyoni kakïsïwecha!

²⁴ Asis nyete nyo kegh ECHOTYON, kengörökyinö aketuronchö.

²⁵ Sörwech, we ECHOTYON, sörwecha! Kïsominyi lö, konech rïntagh ECHOTYON!

²⁶ Nya kesoyön nyinte nyona ngwïnöy ompö kaynata ECHOTYON! Kisoyönenokwa Kö pö ECHOTYON.

²⁷ ECHOTYON kï Tororöt, akikonecha löpoyïn. Anama sökö arotyï ichon atenten, ntökurel söru ato kïpelo amöros.

²⁸ Ichinyi tororötïnyan, oyokunyi sörö. Ichinyi tororötïnyan, okusinyi.

²⁹ Oyokyinö sörö ECHOTYON ompöwölo karam, amöwöghökonye chomnyenyi.