TUMWÖY 108 - PIPÏLIA

¹ Metimtimonye mïkulöwunyan, we Tororöt, ay metimtimonye mïkulöwunyan! Otuman, aserönunyi! Ngeta, we mïkulöwunyu!

² Ngeta, we pïkan nko kureru! Ongetan kiwasan!

³ Oyokunyi sörö, we ECHOTYON ompö kwenu pich. Osöleninyi kwenu pipö punton.

⁴ Kilengö yïm chomnyengu nyo möwöghökonye, relöy poltoy otöptöngu nyo ghanate

⁵ Nya ketöror wowïntöngu, we Tororöt, ompö mïröt nya kïghömi ororyengu ngwïny kïmïkul.

⁶ Terchinö aisörï chamanköku, ngaraka chane ompö ewungu nyo tïng owesyö.

⁷ Köngölonunö Tororöt Konyi nyo tïlil lö, “Oporan Syekem ompö ngörekyö nyo wow ay ochöghochöghan mpöghoghyo Sukot.

⁸ Kiliad kï nyinyan akï nyinyan Manase. Longenyan Epraim nyo oteko mötïnyu, kï lïkïnyan Yuda nyo pö paytagh.

⁹ Otupenyan nyo mïnïng Moap nyo omwöto kelyechu, ongwïsinan kweghyontenyu Edom. Oteghan ompö ngörekyö ompöwölo kakïrïnta Pilistiya!”

¹⁰ Mïtanïn ngo kanasyan nyo kikiwak? Ngo nyo ntöghoghwanïn tatïtan Edom?

¹¹ Tomönye pïstechanyi so, we ECHOTYON? Tororöt komewïyönye nko lïkencha.

¹² Ngarakecha kerïntena pungköcho, ompöwölo kwïle kingörokutyo ptangengmöt.

¹³ Ato mi Tororöt nko acha kerïntonecha, nyinte nyo tïkyini pungköcha ngwïny. Kurinto tumï pö Daudi.