TUMWÖY 104 - PIPÏLIA

¹ Sala ECHOTYON, we söpontanyu! Ichinyi wow tya, we ECHOTYON Tororötïnyu! Ilokyinenyi kegh konyït nko ororyö,

² ilokyinenyi kegh löpoyïn le sïra, aighïtenyi yïm le sïra nyo wow

³ aitek möngengu paraku pögho yïm. Kepöghisyeghenyi poltoy kïlïkwï nkaringu, aiweghö köpepoy pö yomat.

⁴ Kepöghisyeghenyi yomat kïlïkwï piköku cho kiyoktoy aigh kiryalata ilat kïlïkwï mötworiku.

⁵ Kitekanyi ngwïny kughyongö pchörinechi, kïchïchïm kokay metimtimö.

⁶ Kiyenenyi ngwïnyinoni nanam le sïra atolapay kulum pögh kutïngkot.

⁷ Otini kiteghchinyi pögho nanamtin kupertoy, kipertoy chane otini kilïm kiteghatengu.

⁸ Kipusta kamas akïröytö ntökwit mpöghoghöy akïpa ntökwitïta wölini kighchinyi.

⁹ Kighchinyi pöghechoni rotyengwa nyo miröy chane tömötöp ntökulum ngwïny ngat.

¹⁰ Kighanyi kori pögh kuyinta kughegh mpöghoghöy aigh lalwatïn kuyintegha kwenu kutïngkot,

¹¹ wölo nyoruno tïpö wudïn pögh. Wöloni wölo nuko sïkïröyi wuw maralungwa.

¹² Teköy töritwö korikwa ket cho pö atoni, akupilchini morikwa akïtum.

¹³ Iropönchinenyi kutïngkot pögh cho pkono mïröt, atökïnyorï ngwïnya perur.

¹⁴ Ighenyi sus cho omöy kyakï kïpit nko onkïy cho pöghisyegho ptangengmöt, atökumï nyinte kïnyorï omisyö,

¹⁵ nko dipay* cho töni nyinte ngörekyö nko mwagh nyo yilo kegh nko omisyö nyo sïko owesyö.

¹⁶ Nyoru keti ECHOTYON pögh cho mïchini, tarakitpa Lepanon cho kikatkat nyinte.

¹⁷ Kitek töritwö korikwa wöloni akwigh kachïlïkoköchtin korikwa ket cho tïng sowow.

¹⁸ Möngöy nepö wudïn kutïngkot cho koghöch akïnyoru köneroyï wölo wïnyo kegh ompö köpönot.

¹⁹ Kighanyi arawa atökuporwecha osis nkït asis otini röytoy.

²⁰ Kighanyi oghö nko tuwïn, pkonöy nyu sany tïpö wudïn löwïr atoni.

²¹ Tïlyot wara ngötuny atoni atökïnyorï pany. Mi chane kïköngöy omisyö nyo konu Tororöt.

²² Nyini kapusï asis, kïmïlonchö akïpa kïruyö köpönotikwa.

²³ Atolapay kïnget nyu pich akïpa kwigh ighisyewutkökwa ntökwimön.

²⁴ Kighanyi tïkwïn cho chang, we ECHOTYON! Pö töngönchin lö ne wölo kidenyi chane löwïr. Kinyïghï ngwïny tïkwïn cho kighanyi!

²⁵ Anyinö nanam nyo wow akï tapes, möngo tyonkïn cho meyitisyotcha, cho echön nko cho mïnkech.

²⁶ Pestegho melinö parakunyi akïpiröno orinyi tyompö nanam nyo wow.

²⁷ Köninyi tïkuchoni löwïr atetönönyi chane omisyewutkökwa otini ketïta sayengwa.

²⁸ Kwöghöy chane kïgh anka tïkwïl nyo itöninenyi. Pïghyongi chane omisyö ato inganganyi ewungu.

²⁹ Ato ipesyenyi nko chane, kïmïghyö, ato ingwïsenyi chane kimïny kïmeghö akïmïlonchö wölini le terïtyon kipkana.

³⁰ Ato isikinyi yomat, kïsöpchö ngat, nyi nyo itöni ngwïny söpon.

³¹ Nya kïtöpö ororyo ECHOTYON kokay! Nya kïngarak ECHOTYON ompö tïkuchi löwïr cho kigh!

³² Rosöy nyinte ngwïny, kïpotan ngwïnya. Nyini kaswany kutïngkot, kïpusuna ighöt oringwa.

³³ Otumchinan ECHOTYON kïnomnyö otini tosöpan, otumchinan Tororötïnyu tumwöyi sölut otini kïnye tochan satate.

³⁴ Nya kïmïlïn tumtönyan, we ECHOTYON, ompöwölo ngwïno ngörekyenyan wölo imitenyi.

³⁵ Nya kewanga mwokïyis ngwïny, nya kupotyö pich cho ghach kokay. Sala ECHOTYON, we söpontanyu! Nya kïsala ECHOTYON!