TUMWÖY 10 - PIPÏLIA

¹ Ompö ne nya, we ECHOTYON, teghyongenönyi wölo low? Ompö ne tewïnyenyi kegh ompö osiswo kömpölelyö?

² Rïpöy mwokïyis mey ompö köromnyö. Namena chane ngöghöptinekwa cho katek.

³ Kwolo kegh mwokïyon pïrchinoghto mïkulöwunyi, chïpöy chi pö mu ECHOTYON akïtöghöy nyinte.

⁴ Kwolöy kegh mwokïyon amöyongönye ECHOTYON. Nonöy lö, “Möminye Tororöt.”

⁵ Tenöy kïgh anka tïkwïl nyo ighöy mwokïyon, mösïkunye kirwokut pö Tororöt. Sösöy nyinte pungkachi löwïr.

⁶ Lentöy ompö mïkulöwunyi, “Möminye kïgh nyo timtimanïn, möminye kïgh nyo omanïn kokay.”

⁷ Nyïghitat kutinyi chïpö nko putintön nko köromnyö, tïng ngalyapunyi kiwurat nko ghöyityö.

⁸ Syepisïyi ompö ortïna kanastin, pöröy pich cho puryö lelut ompö wölo wïngate, söpchini pich cho mi kalyana.

⁹ Syepöy nyinte pich le ngötïny. Syepöy nyinte atökïnam mey. Nömöy chane ngöghöpunyi akuchut.

¹⁰ Wuröy pich cho kolyönöy, pïtyini chane ngwïny ompö owesyenyi.

¹¹ Lentöy mwokïyon ompö mïkulöwunyi, “Kikïwutyeghö Tororöt, keyen nyinte tokochunyi amelö sïwïyanïn!”

¹² Ngeta, we ECHOTYON, ailïw nyinte, mewutyeghö pich cho kichopöy kong.

¹³ Ompö ne tökïsösöy mwokïyon Tororöt? Kïlentöy ompö mïkulöwunyi, “Melö konanïn nyinte sitöt.”

¹⁴ Wölo isïwïyenyi, we ECHOTYON, kömpölelyö nko nyarïl aipöghisyeghenyi ewungu tengaraka. Twoytoninyi kegh chi nyo nyarkalal. Ichinyi kingörokinto panan.

¹⁵ Riyö ewu mwokïyon nko ewu chi nyo gha, chopa kong chane ompö kïyoni kegh chane, ntökïtenö kïpïstö.

¹⁶ Pöytoghin ECHOTYON kokay nko kokay. Wonyot puntonï löwïr ompö ngwïny.

¹⁷ Ilïmenyi, we ECHOTYON, sowut pö pich cho tölose, aitö chane nyakanat, aiterchï lokekwa

¹⁸ Teghchinö man pönon nko chona kichopöy kong, atömökumï ngat ptangengmöt kwigh ghöyityö. Ompö kintöghoghinto tumï. Tum pö Daudi.