SAKARIA 6 - PIPÏLIA

Sïwïyaghpa nkarino angoletin

¹ Atolapay osyolön ngat konyïn asïwan nkaritin angwan cho pö lïk cho chutöy angoletino. Kichumunoy kwenu kutïngkot odeny cho pö aykwanga.

² Kichutöy nkari nyo tagh angoletinö cho pïröch, kuchut cho tuwöch nkari nyo pö odeny.

³ Kichutöy cho relach nkari nyo pö sömök, kuchut cho tolelos nkari nyo pö angwan.

⁴ Atepan malaykayan nyo kingölonöy nko ani lö, “Pö ne nkarinechï nya we apoy?”

⁵ Kïlenchanïn, “Nkarinechoni kï yomötin angwan cho yöstochini woptino yïm löwïr. Pkono tawu ECHOTYON to ngwïny kïmïkul.”

⁶ Chutöy angoletinechinö tuwöch nkaringwa kughegh ewu tagh, kuchut chona relach nyingwa to, kuchut cho tolelos nkaringwa ewu löt.

⁷ Kutyorsyö ompö sirmoy angoletinechay ompöwölo kipïrchï kïpa kïmarar ngwïny. Kïlenyona kïlenchï malaykayan chane, “Ape ye amarara ngwïny,” akïpa lenyini.

⁸ Atolapay kïlenchanïn malaykayan ompö kut nyo wow, “Tere köny! Kikïnuk nörekyo ECHOTYON angoletinö cho kapa kuntoka, koro Papilon.”

Kakïmwa kelokyï Yoswö tenta

⁹ Kingwïnchanïn ngölyonto ECHOTYON nyo lentöy

¹⁰ “Wïyö asisete ka Yosia wero Sepania aitach ropöw cho ipu Elday nko Topicha nko Yedaya cho pkono pïnotön.

¹¹ Chengena chane koltin nko silpa aipöghisyeghö igh tenta, ailokyï möt pö Yoswö wero Yeosadak, Tïsin nyo Wow.*

¹² Atomuchö, imwochï lö lentöy ECHOTYON Kimuktoghin, arosa, pitunoy chi akong atoni mi nyo kïkuro Morïn!

¹³ Ngwïnöy akïtek Kö pö Tororöt* akekonyïtöy nyinte le pöytoghin. Töpo ngacharu paytagh akïpayta. Töpo tïsin kudopöy ngacharunyi nyo pö paytagh akwightoy chane kwodeny pöghisyö ompö kalya nko terchin.

¹⁴ Töpo nyu tentanoni Kö pö Tororöt kïpöyit kinonut nko konyït pö Elday nko Topicha nko Yedaya nko Yosia wero Sepania.”

¹⁵ Pkono pich koros cho lowöch cho pkonöy kungöroköy ompö teksyo Kö pö Tororöt. Atoteka kumuchö, onkïtukwa lö nyinte ECHOTYON Kimuktoghin nyo kiyokwanïn ompö akwa. Ighisyot choni löwïr ato arïpakwa lasiny lenyini mwowokwa ECHOTYON Tororötïnkwa.