RUMI 16 - PIPÏLIA

Ketötö Paulö takwes

¹ Omökan oporwokwa cheptönyo Poipe nyo pöghisyechini nyo pïchigh kanisa Kenkrea.

² Atak nyinte ompö kaynata Echotyon le wölo kömïchini pipö Tororöt kwigh. Otö nyinte kingarokut anka tïkwïl nyo mökenokwa, ompöwölo kikungarak nyinte pich cho chang nko ompö nyete le ani.

³ Otokweswante Priska nko Akwila cho kïpöghisïyecha tïkwïl ompö ighisyo Kristo* Yeso.

⁴ Kimewaghnye chane kepar akwompö parakunyan. Oyokyinan chane sörö, amaninye onkït nyo oyokyini chane sörö, wölo kanisen löwïr cho pö pipö Punton tïkwïl.

⁵ Otokweswo tïkwïl kanisa nyo tuyegho kongwa. Otokwesan kongenyan Epayneto nyo kipö tagh kughan Kristo ompö okumpö Esya.

⁶ Otokweswante Marya nyo sïngöy nyoman kïpöghisyewokwa.

⁷ Otokweswo werköcha cho le pipö Yaudi le ani Androniko nko Yuniya chay kikïmitecha chela tïkwïl, akunkïtote chane lasiny ompö kiyoytoghi Kristo. Chane ompö cho kinya kughan Kristo kïtomö aghanan.

⁸ Otokweswante Ampilyato, kongenyan nyo kikelinyech nko Echotyon.

⁹ Otokweswo Urpano nyo kikïpöghisyecha tïkwïl ompö ighisyo Kristo, atokweswante kongenyu Stakis.

¹⁰ Otokweswante Apele nyo kikuporï kegh lasiny lö rïpöy Kristo. Otokweswante pich löwïr cho mi kö pö Aristopulo.

¹¹ Otokweswo Erodion, nyo le chi pö Yaudi le ani nko pipö Kristo ompö ka Narkisi.

¹² Otokweswante Trupena nko Truposa cho pöghisyechini Echotyon atokweswo kongenyu Persi nyo kinoghyö nyoman ompö ighisyo Echotyon.

¹³ Otokweswante Rupo, chi nyo kikilkegh nyoman ompö ighisyo Echotyon nko kame nyo kingarakanïn kïtenö osis le montanyi.

¹⁴ Otokweswo ompö Asunkrito nko Plekon nko Ermes nko Patropa nko Ermas nko pipö Kristo lapay cho mi nko chane.

¹⁵ Otokweswante Piloloko nko Yuliya atokwesï Nereya nko cheptöngwa atokwesï Olumpa nko pipö Tororöt löwïr cho mi nko chane.

¹⁶ Atakwesa kegh ompö kikonköyöt nyo tïlil. Ataka takwes nyo ngwïno kaniseni Kristo lapay.

Kinetut pö söröm

¹⁷ Osomokwa nyoman, tupchenichu lö, oripö kegh pich cho ipu chuniogh akwigh pikö walaka kupïtyö ompö kighanatengwa, nyo kötörïpöy kighanat nyo kikinetakwa. Olowitenö kegh chane,

¹⁸ ompöwölo möpöghisyechinicha pich cho lata choni Kristo Echotyontenyo wölo pöghisyechini mutïnekwa. Lïsöy chane pich cho tomöcha kïnagh ortïn cho ghach ompö kïnkïno ngalekwa cho onyïn.

¹⁹ Kikïlïm pich lö kyotötekwa kegh arïp lenyini mwoghöy Lökoy cho Karamach akunka nyoni kïgh nyo keghanïn angarak ompö akwa. Omökwokwa olïkuna pich cho ngöghomöch ompö ngal cho karamach, alïkwï cho puryö lelut ompö ngal cho ghach.

²⁰ Nyoknyoköy atolekït Tororöt, nyo le towunöteto kalya, Onyöt akutö ngwïnyi kelyekwa. Nya kïtöpö pöropcho Echotyontenyo Yeso nko akwa.

²¹ Ketakwesakwa Timoteo nyo kïpöghisïyecha tïkwïl akutakwesakwa Lukio nko Yason nko Sosipata cho le pipö Yaudi le ani.

²² Katakwesakwa ompö kaynata Kristo, ani Tertiyo nyo kakir ngalechete kimwa Paulö ompö palalyantanete.

²³ Ketakwesakwa Kayo nyo tuyegho kanisa konyi achan tontenyi. Ketakwesakwa Erasto nyo ghyongchini ropïyeni kanasyantanete nko werïnyo Kwarto. [

²⁴ Nya kïtöpö pöropcho Echotyontenyo Yeso Kristo nko akwa löwïr. Amen.*]

Saghata söröm nyo kïsölo Tororöt

²⁵ Nya kesala ye nyu Tororöt. Muköy nyinte kuchïchim kighanatenkwa ompö Lökoy cho Karamach ngölono Yeso Kristo. Lökoy cho omtonan kïrïp kegh nko ngongut nyo pö man nyo kiwïngate ompö könyis cho chang cho kikuwer,

²⁶ wölo kikengongwï ye kuwerï Kikirut pö werkoy. Akwompö kuti Tororöt nyo satate kokay, keporchï pipö punton löwïr ngalechoni pö man atökumï chane tïkwïl kughan nyinte akïrïp ngalechi.

²⁷ Nya kïpöyit ororyö Tororöt kokay nko kokay, nyinte onkït nyo pköchini kïgh anka tïkwïl, ompö Yeso Kristo. Amen.