NGÖTÏNYÖ 12 - PIPÏLIA

¹ Chi anka tïkwïl nyo chömöy kepïr, kïchömöy chïreryö, wölo sölwö chi nyo töghöy kechïl.

² Nyoru chi nyo karam chömchin ompö ECHOTYON, wölo rwokyini nyinte chi nyo tötut cho ghach.

³ Melö chïchimöy chi ngökï, wölo puryö kïgh nyo kölöngtoy chi pö man.

⁴ Korka nyo karam otöp kuwulo kegh pontenyi, wölo korka nyo ipu arasï kïlata sömew ompö koyechi.

⁵ Tenote kinonut pö chi pö man, wölo pö lïs kirurut pö mwokïyis.

⁶ Keröto ngala mwokïyon kï kïmïlta kisön, wölo söru pich kuti chi pö man.

⁷ Kiwoghöy mwokïyis ntökuwonyö lömïs, wölo ghyongtoy kö pö chi pö man.

⁸ Kikusöy chi kïrïp kegh nko chïreryenyi, wölo kïsösöy chi nyo kimostoy kinonutkachi.

⁹ Kaykay chi nyo kïsösöy akwighchini kegh kinyi, kïtïl chi nyo kwolöy kegh akï puryö omisyö.

¹⁰ Yongöy chi pö man kyakichi, wölo kisyonöto pkatyan kï ghöyityö.

¹¹ Nyoru chi omisyö nyo wow nyo ngoröy parenyi, wölo mötïnye pköchin chi nyo rïpotoy ngala tankasat.

¹² Pïrchini mwokïyis kwigh tïkwïn cho ghach osis, wölo ghyongöy lö kïng nyighïna chi pö man.

¹³ Kïnömo chi nyo gha lelutko kutinyi wölo chïwïto chi pö man nyarïl.

¹⁴ Pïghyongoy chi köromnyö ompö ngalechi nko ighisyenyi akeyokyini chi pöghisyewutko morichi.

¹⁵ Ghïteghote ara chi nyo le sölwö ompö nyinte, wölo teröy chi nyo ngöghom kiruröt.

¹⁶ Kïnyoghöy kenkïtu nörekyo sölwö lawel, wölo möyongöynye chi nyo ngöghom kimwagh.

¹⁷ Tötoy chi söwintöno man nyo mwoghöy ngala man, wölo mwoghöy lïs söwin nyo le putin.

¹⁸ Mi chi nyo sortegho cho toröy pich le chok wölo ipu kuti chi nyo ngöghom kisopöt.

¹⁹ Chïchimöy kut nyo pö man kokay, wölo wonyot lawel ngalyap nyo mïröy putintön.

²⁰ Mi lïsa mïkulis pö pich cho tongöy ghöyityö, wölo tïng ngörekyö pich cho tötöy tötut cho karamach.

²¹ Möminye kïgh nyo gha nyo nyoru chi pö man, wölo kinyïghityini mwokïyis kömpölelut.

²² Lilöy kigh ECHOTYON kut nyo mïröy putintön, wölo ngörökyini nyinte chi cho pöghisyegho man.

²³ Wïngöy chïreryenyi chi nyo ngöghom wölo portoy sölwöy sölwontönengwa.

²⁴ Sïköy chi owesyo paytagh nyo kilöy kegh, wölo lïku chepkowö sekeyon.

²⁵ Tungöy chi kisusut cho mi mïkulöwunyi, wölo ighöy ngölyon nyo karam nyinte kïngarak.

²⁶ Mörkölegho chi pö man ghöyityö, wölo ipöy mwokïyis arengwa kupotyö.

²⁷ Mönyorunye peny sökosin nyo le sosö, wölo nyoru kïgh chi nyo kilöy kegh.

²⁸ Mi söpon ara man, wölo ipöy pich ara kipotöt meghat.