NGONGUT 9 - PIPÏLIA

¹ Atolapay kïkut malaykayan nyo pö mut kontinyi. Asïwan kokelyan nyo kichïnchï ngwïny, ketö nyinte yotöwonto ngwen.

² Kïyat kokelyantanoni pïrïm nyo pö ngwen, kïpusuna ighöt nyo wow nyo kilata ighöt nyo ngwïno köpöno ma nyo wow, kulum ighononi kingwïna pïrïmpononi löpoyïn pö asis nko nyo pö wölnö le mïröt.

³ Kïrökunö talam ighononi kïrökyï ngwïny, ketö chane owesyö nyo karkegh nko nyo pö tokolay.

⁴ Kemwochï chane lö manyar sus anta ket anta kïgh anka tïkwïl nyo nyaril. Kïpoto pich opïn cho melö tïng macheyu Tororöt ompö tökochekwa.

⁵ Kikïchömchï talamchoni kuchop pich kong aro mut. Kikarkegh ngwonïn kichopatengwa nko ngwonïn pö tokol ato sïr chi.

⁶ Möro nyu kong pich meghat ompö oroyechoni kï mut, wölo mönyorucha. Lentöy tïkïmeghö, wölo rïpo meghat chane.

⁷ Kilenye talamchoni angoletin cho kimi kïpsach kïpa lïk. Kitïng tïkwïn cho kimi mötöwekwa cho, kï kilata tenteni koltin, akikarkegh tokochwekwa nko tokochwo pich.

⁸ Kïkarkegh putekwa nko puto kor, akïkarkegh kelekwa nko kela ngötuny.

⁹ Kikarta töketwekwa tïkwïn cho kilata alechötino karïn ato kirosöy, kïkarkegh kighumöto köpepokökwa nko kighumöto angoletin cho chang cho kichutöy nkaritin cho ryöghöy kïpetöy lïk.

¹⁰ Kitïng töronkwöy cho kisïro pich le tokolay, ki töronkwöyikwa cho kitö chane owesyö nyo kichopa pich aro mut.

¹¹ Kitïng pöytoghintengwa nyo kipöytoy chane, nyinte kï malaykayan nyo kipöytoy ngwen. Kikïkuro kaynenyi Apadon ompö Eprania. Kekuro Apolyon ompö ngala Krik nyo ato kïwaghach kï, “Kinyorin.”

¹² Kakuwer nyarïlto tagh, wölo tökïmi kichoputkö walaka odeny cho tökïpkonöy.

¹³ Kïkut malaykayan nyo pö mut nko akonga kontinyi. Alïman kut nyo kingwïna kuyechay le angwan pö koltin pö watwa amöros ghyongo tawu Tororöt.

¹⁴ Kimwochï malaykayan nyo pö mut nko akonga nyo kitïng kontï lö, “Tyaka malaykenichona le angwan kikïrötyï lalwa Yuparet!”

¹⁵ Ketyak malaykenichay le angwan cho kikitö kïtïpï kïpsach sayanini ompö asisini arawanini nko könyinini atökïpar chane kareran akonga nyo pö sömök nyo pö pich.

¹⁶ Kemwowanïn lö kingata söpïchoni pö lïk kipegho angoletin pich cho le milion pokolay odeny.

¹⁷ Asïwan ompö sïwïyagh angoletinechoni nko pich cho kipegho akï cho kilok kïkarta töketwekwa körin cho töpölöl cho pïroch le ma akworusöch le koghïn cho pö olyot nyo wow akï nyörilöch le salpa. Kilata mötöweko angoletinechoni mötöwo ngötuny akï cho kipkono kutïwekwa ma nko ighöt nko salpa.

¹⁸ Kïpar nyörilwokchoni le sömök kareran akonga ompö sömök nyo pö pich cho mi ngwïny. Nyörilwokchoni kï mayoni nko ighe nko salpa cho kipkono kutïweko angoletinechoni,

¹⁹ ompöwölo mi owesyo angoletin kutïwekwa nko töronkwöyikwa tïkwïl. Lata töronkwöyikwa moroyut cho tïng mötöw cho pöghisyegho kïsïr pich.

²⁰ Kïkany pich cho kingötï cho kimaparcha nyörilwokchoni, kïmökïpïstöcha pöghisyewutkökwa cho kigh. Kimöpïstöcha kïsagh oy anta körkeyïntino koltin nko silpa nko taghoy koghïn nko ket cho merosïtoy anta lïm kïgh anta pesta.

²¹ Akimöpïstöcha pörchengwa nko ponintönengwa nko cheporesnanengwa anta chorsyengwa.