NGONGUT 5 - PIPÏLIA

¹ Atolapay asïwan ompö ewu tagh nyo pö nyinte nyini kitöpo ngacharu paytagh kitapï nyo kikikir ori nko sany akekara möchey mut nko odeny.

² Asïwan malaykayan nyo awes nyo kingalan ompö kut nyo wow lö, “Ngo nyo mïchini kïngötïy möcheywechï akïyat kitapunï?”

³ Wölo kimöminye chi ompö akong wölini le yïm anta ngwïny anta ngwen nyo kimuch ntökïyat kitapunay anta ros orinyi.

⁴ Alokan nyoman osyonchï kegh ompöwölo ki puryö chi nyo kirumï nyo kimïchini kïyat kitapunay anta ros orinyi.

⁵ Atolapay kïlenchanïn akong ompö poyichay, “Meloköy. Rosa! Kikïrïnta Ngötïny pö ara Yuda, kuköto Daudi, nyinte nyo muköy kïngötïyöy möcheywechay le mut nko odeny akïngany kitapunoni.”

⁶ Atolapay asïwan Wawa Kech kughyongo kwenu ngacharu paytagh nko tyonchay sötote le angwan nko poyichay. Kilata Wawa Kech nyo kikepar. Kitïng kuy mut nko odeny nko konyïn mut nko odeny, aki mïkulis pö Tororöt cho le mut nko odeny, cho kikïyonta kïpa ngwïny kïmïkul.

⁷ Kïwö Wawa Kech kïchenga kitapunay ewu tagh nyo pö nyinte nyini kitöpo ngacharu paytagh.

⁸ Akwotini kimi kwighöy lenyoni, kupïtyï ngwïny tawu Wawa Kech tyonchay sötote le angwan nko poyichay le 24, akïtïng chi anka tïkwïl ompö chane pïkan nko pakuli koltin nyo kikinyïghit tïkwïn cho ngutoy nyo karam akï choni kï sowut pö pipö Tororöt.

⁹ Kïtum chane tum nyo rel kïlentöy, “Mïchininyi chenge kitapï atemuta, apït möcheywechoni kikïngostö. Ompöwölo kikïparinyi, aipchinyi Tororöt pich ompö meghengu, pich cho kipkana punton kïmïkul, nko kutïw löwïr nko pich löwïr nko cho pö koros tïkwïl.

¹⁰ Keghanyi chane kilïkwï pipö pöyunöt nko tïsï cho pöghisyechini Tororötïncha, akïpayta ngwïny.”

¹¹ Atolapay asïwan, alïm kutïwa malayken cho makïrar! Cho kïtïpisot kuwit ngacharu paytagh nko tyonchini sötote le angwan nko poyi,

¹² kïtum ompö kut nyo wow lö “Mïchini Wawa Kech nyo kikïpar kïsïch owesyö nko sïkönöt nko ngöghomnyö nko kimukat nko konyït nko ororyö nko salat!”

¹³ Alïman kïgh anka tïkwïl nyo kikigh nyo mi yïm nko ngwïny nko nyo mi ngwïnyi ngwïny nko nyo mi nanam nko tïkwïn löwïr cho mi oringwa kïtumöy lö, “Nya kïsïch nyinte nyo töpo ngacharu paytagh nko Wawa Kech kisoyönöt nko konyït nko ororyö nko owesyö kokay nko kokay!”

¹⁴ Kuyokyï tyonchoni le angwan sötote lö, “Amen!” Kupïtyï ngwïny poyichay akïsagh.