MIKA 7 - PIPÏLIA

¹ Ochech nyo kangwïn lö sïpapa amonyorï akwa cho kingotyï ket anta sapipun cho ororotö. Kikuror köny chepökörot kikepït makany cho kotö omöy akwe cho pïrchini muyenyan.

² Möminye chi pö man ngwïny, möminye chi nyo pö man ompö pich, möro sera porsyö chane, mököy chi anka tïkwïl kïrïm werïngwa.

³ Nkït chane kwigh nyï le ghöyityö nyoman tepöy asoya pöytoghin nko kirwokin. Mwoghöy chi nyo wow pïrchin nyo gha ompö mïkulöwunyi.

⁴ Lenye nyo awes ompö chane samïyan, kïlenye nyo kötö soman ompö chane kato. Kikwitïta asispa ripikwa kikwitïta sitengwa ketomtö ato kömörisyö mötöwöy.

⁵ Metighenö chi möt pöroryengu meghana chi kongengu ikïr chi kutingu ompö nyini le kameto montöngu.

⁶ Ompöwölo sösöy atoni karachïna papotïnekwa kïnam tipïn kamatikwa kut, kïsyal koru wor nko potïchtinekwa, lïku pung pö chi piko katanyi.

⁷ Wölo okönyan nyo le ani ECHOTYON onkït okönyan Tororöt pö sörunötenyan, terwanïn akï sörwanïn Tororötïnyan.

Ipu ECHOTYON sörunöt

⁸ Mengörökyï nyarïltanyan we punyontonï, ato apïtan kïtö ongetan ngat akï kïrkegh omitan tuwïn, kïlïku ECHOTYON löpoyïntanyan.

⁹ Omïkukönan ompö nörekyo ECHOTYON ompöwölo kyoghchan nyinte ngokï ntökïtenö kïporyeghwanïn akïlöstoghwanïn. Ipkanïn sany wölo mi löpoyïn asöwintönchan sörunötenyi.

¹⁰ Sïwïyi nyu pungköchan, akïnam arasï chane cho mwowanïn lö, “Mi onö ECHOTYON Tororötïngu tagh nya?” Orosan ye nyu chane ketyökotyököy le norayonto ara kanasyan.

¹¹ Kikutomtö ato kïteköy nïyetwo akeporöy rotyotïnekwa.

¹² Pkonöy piköku kïmïlisyot wölo iminyi kïngeta Asirya ntökwit Misri akïngeta Misri ntökwit lalwa Yuparet kïngeta nanamtin cho lowöch ntökwit kutïngkot cho lowöch.

¹³ Lïku korö kïratyan ompö ngoki pich cho möngöy ori.

Kisyonchï ECHOTYON Israel

¹⁴ Lïkuna mösöwonto piköku, ECHOTYON nko lïkengu piköku kegh cho kikïlanyi cho möngöy opïn surkwen wölo kimi korö wölo akwagh. Nya kïpa chane kïpa chane achey wölino le Pasyan nko Kiliad le atanya le köny.

¹⁵ Oporchinan chane ngala töngönchin cho lenye chay kaghan atanya kyapkanekwa koro Misri.

¹⁶ Sïwïyi pipö punton töngönchin akuwöghisyö kïrkegh kö owesöch, mïghyot akïnam kïgh kutïw akïmingö.

¹⁷ Chuto kegh ngwïny le moroyut, puluno wölo kögheto kegh ompö potana nko mïghö. Yokyini kegh ECHOTYON Tororötïnyo ompö kiwaghat.

¹⁸ Möminye Tororöt anka nyo lata nyi nyo löstoghchini pich ngokï akïpïstö lelut pö pikachi cho pö man amelö roröy nörekyö kokay ompöwölo ichömechanyi nyo möminye söröm.

¹⁹ Tesyonchechanyi kokay, aityökchinyi ngwïny ngokicha aityarta kïröytö nanam to.

²⁰ Isyonchinenyi pipö Yakopo, aicham monïngo Apraam kokay, lenyini kiwolwolchinyi papotïnecha könyisyok.