MIKA 4 - PIPÏLIA

¹ Pkonöy ompö osis cho pkonöy ato kichïchimöy kutïng pö Kö pö Tororöt. Akekany kïkoghit kïtïl kutïngkot löwïr wuwöy chichöntö kïsoröy kutïngoni.

² Pkonöy pipö punton cho möngörï akïlö “Apkana kepe kutïng pö ECHOTYON, ketanga Kö pö Tororöt* pö Yakopo. Atökunetech ortïnechi akerïp ngalechi.” Ompöwölo pkono Sayon* kirurut, akungwïna ngölyonto ECHOTYON Yerusalem.

³ Rwokyini nyinte pipö punton akïsat ngala punton cho owesöch cho lowöch. Tongöy chane chokonikwa kïlïku chempen kukud ngötwekwa kïlïkwï rotwoy cho kïköso pagh. Melö tökïpöröy kegh puntonï ngat amökunetöcha kegh poryot kokay.

⁴ Töpo chi anka tïkwïl ketïnyi pö sapipun nko moköngwenyi ghït ompö kalya möminye chi nyo otyegho chane. Mwoghöy ECHOTYON Kimuktoghin.

⁵ Soghöy puntonï löwïr akïterchï tororötinekwa, wölo kïsoghecha ECHOTYON Tororötïncha kokay nko kokay.

Kömïlisyeghö pipö Israel pïnotön

⁶ Lentöy ECHOTYON, Oghömïtan asisoni chona ngwolsot aghamïtï pïnotön nko chona kyomungön.

⁷ Oghan chona ngwolsot kïpöyit man aghan cho kikïrang kïlowöchitu kïlïkwï pich cho owesöch kïpayta ECHOTYON chane ompö kutïng pö Sayon kïngeta atoni nko kokay.

⁸ Ngwïnchininyi we mösöwonto pipö Sayon paytagh nyay kipö tagh nko pöyunöto pipö Yerusalem.

⁹ Ompö ne toriryenö ompö kiteghat le nyï? Motïngetekwanye so pöytoghin? Kikïma so kirurintenkwa, ntökunka nyï koriryekwa le korka nyo kïghöy?

¹⁰ Ochïtö ompö ngwonïn akwa pipö Sayon, le korka nyo kïghöy. Ompöwölo opeghenekwa kanasyantanï apa amang wuw. Opetekwa Papilon alïkwï pïnot. Kisörwokwa nyu ompö wölini, sörwokwa ECHOTYON, ompö mori pungkökwa.

¹¹ Pkonöy pung kupokyinokwa kïlentöy nyarïl nyu olenchinö asïwena Sayon wölo kikida.

¹² Wölo melö nkït chane tötut pö ECHOTYON, amelö pköchini chane tötutkachi lö kaghamïtï ECHOTYON chane le pagh ompö rökor.

¹³ Lentöy ECHOTYON, “Akwa pipö Sayon ongetyenö omungö punkökwo. Oghokwa le kir cho tïng kuyo karïn akï taghoy putïlöy. Itïghenyi pipö koros cho möngörï. Opunekwa pöröw löwïr cho kipörunö chane pikö walak. Atolapay opukwa sïkönötengwa, wölo omitan, nyo ochï Echotyonto ngwïny kïmïkul.”