MATAYO 7 - PIPÏLIA

¹ “Morwokyï pich, tömokirwokwok,

² ompöwölo kïle wolini orwokyintokwa pikö walaka, kïlenyoni wölo kirwokyintonokwa akepöghisyegho kipimöwontonini opöghisyeghokwa ompö pikö walaka.

³ Ompö ne terosenyi wïtanian nyo mi konto werïngwo mesïwïyenyinye nyu ket nyo mi kontangu?

⁴ Imukenyi lö ne mwochine werïngwo lö, ‘Pïswante asyar wïtanian nyo mi kontangu,’ akwanyï mi ket kontangu?

⁵ Ichinyi lïsïn! Nyagha chengunö ketoni mi kontangu temuka nyu syara wïtanian nyo mi konto werïngwo.

⁶ “Motö kukïdin kïgh nyo tïlil, ompöwölo ngetöy kïsïrokwa. Amowirchï sanayikwo cho pïchighöch tawu nkïruwen atömekurkurö ngwïny.

Osomö, ayar, akonykony

⁷ “Osomö tökekonok, ayara tonyorunö, okonykonyö, tökeyotwok kukat.

⁸ Ompöwölo chi anka tïkwïl nyo somöy, ketöni akwanka tïkwïl nyo yöröy kïnyoru, akeyotyini chi kukat nyo konykonyöy.

⁹ Anta ngo papo ompö akwa, nyo ato som werïnyi makatyan kutö kogh?

¹⁰ Anta ato som koghoghwö kutö moroy?

¹¹ Ato onkïtökwa nyu pich cho ghach otöni monekwo tïkwïn cho karamach, töni nyu Paponkwa nyo mi yïm pich cho somöy nyinte tïkwïn cho karamach kïtya?

¹² Oghchinö pich tïkwïn cho omökekwa kwighwekwa chane. Nka nyoni kïgh nyo netöy Kirurut pö Musa nko kinetut pö werkoy.

Kukat nyo marich

¹³ “Olïtö kukat nyo marich ompöwölo pöro kukat akï tapes or nyo itöy ngwen akï chang pich cho petöy aranoni.

¹⁴ Wölo marich kukat akwaghïgh or nyo ipöy pich wölo mi söpon akï pich cho ngörï cho nyoru.

Ket nko akwechi

¹⁵ “Orip kegh werkoy pö putintön cho lata kechir otini pkonchinokwa, wölo suyï ompö ori cho köromöch.

¹⁶ Onkïtukwa chane ompö ighisyewutkökwa. Melö kïpïto sapipun sankakay amelö kïpïto makany tökölten.

¹⁷ Yinöy ket nyo karam akwa cho onyïn, kuyinöy ket nyo gha akwa cho ngwonöch.

¹⁸ Memukönye ket nyo karam kuyin akwa cho ngwonöch amemukönye ket nyo gha kuyin akwa cho onyïn.

¹⁹ Kïtöröy ket anka tïkwïl nyo meyinönye akwa cho onyïn akewirchï ma.

²⁰ Kïlenyona, onkïtunekwa werkoy pö putintön ompö ighisyewutkökwa.

Melö kyonkïtokwa

²¹ “Molenchï kegh lïtöy Pöyunöto Yïm chi anka tïkwïl nyo mwoghöy lö, ‘Echotyon, Echotyon,’ kïpoto chi cho ighöy machata Paponyan nyo mi yïm.

²² Lenchinanïn pich ompö Asisoni, ‘Echotyon, Echotyon! Kikyamtecha ompö kaynengu akeyon oy cho ghach, akegh töngönchintin cho chang.’

²³ Wölo olenchinan chane, ‘Kimonkïtokwanye. Angetena tawunyan mwokïyischï!’

Teki korïn cho le odeny

²⁴ “Kïlenyona nyu, karkegh chi nyo lïmöy ngalechan akïrïp nko chi nyo ngöghom nyo kitek konyi paraku ghat.

²⁵ Nyo otini kiropan akungwïn puseryonta nyo wow akïkut chepkiriri, melö kirul ompöwölo kikïtek paraku ghat.

²⁶ “Wölo chi anka tïkwïl nyo lïmöy ngalechan chete, amarïpnye, kemustoy nyinte chi nyo le sölwö nyo kitek konyi ngoyomwö parak.

²⁷ Nyo otini kiropan akungwïn puseryonta nko chepkiriri kwarman koyay, kïrul aki wow rulötenyi!”

Tïngeto Yeso owesyö

²⁸ Otini kiwany Yeso kïmwa ngalechï, kïtangany söpïchoni kilïm wölo kinetïta nyinte,

²⁹ ompöwölo kinet le chi nyo kitïng owesyö amelö kilata konetikwa cho pö kirurut.