MARKO 15 - PIPÏLIA

¹ Nyini kiwas kuryam Tïsï cho echön nko poy nko koneti kirurut nko Kokwö* kïmïkul, kïrat Yeso akumïtyï Pilato.

² Kïtep Pilato Yeso lö, “Ichinyi pöytoghinto pipö Yaudi?” Kuyokyï Yeso lö, “Kemwaghanyi!”

³ Kïmwaytegha Tïsï echön Yeso ngal cho chang cho ghach,

⁴ kïtep ngat Pilato Yeso lö, “Ayo, meyokunenyinye ngölyontonï? Rose köny lö, chang ngala cho gheghchinyi pïchï!”

⁵ Wölo meyokwïnye Yeso ngölyon, kïtangany Pilato nyoman.

Kakirwokyï Yeso kepar

⁶ Kitïng Pilato apite nyo kityoktoy chi akonga nyo ratate nyo kösom pich ompö asispa Pasaka.*

⁷ Kïlenyona kimito chi nyo kikuro Parapas nyo kiratate nko rïmi walaka cho kigh kiwulyogh nko pörsyö.

⁸ Kïpa pich cho chang wölo mi Pilato kïlenchï, “Kwighchï chane le wölo keghtoy könyis löwïr.”

⁹ Kïtep Pilato chane lö, “Omökekwa otyokwokwa pöytoghinto pipö Yaudi?”

¹⁰ Ompöwölo kinkït Pilato lö, kitötö tïsï cho echön Yeso ompö sastagh.

¹¹ Wölo kikïnkïn tïsï cho echön söpïchay kïsom Pilato kutyokyï chane Parapas.

¹² Kïtep Pilato ngat lö, “Omökekwa adonan ne chichï okuronekwa pöytoghinto pipö Yaudi?”

¹³ Kuteghyö ngat lö, “Wudochinö kimurtöwon!”

¹⁴ Kïtep Pilato lö, “Ompö ne tomwoghekwa lenyoni? Kegh ne nyo gha?” Kuteghyö ngat tya lö, “Wudochinö kimurtöwon!”

¹⁵ Kimach Pilato kupïghyony söpïch, kïlenyona kutyokyï chane Parapas, atolapay kïmuny Yeso akutötö kewudochï kimurtöwon.

Köpirönö askarin Yeso

¹⁶ Kumït asikarin Yeso kutang kö pö soch akïkur askarine walaka kïpka

¹⁷ kulokyï sïra nyo lata akwa lamay akïnanagh ayikït pö kato akutö mötïnyi.

¹⁸ Akutor kutakwes lö, “Isöp nyo kogh, we pöytoghinto pipö Yaudi!”

¹⁹ Atolapay kukoskosö mötïnyi awawatyan kïngwïtyï akïkïtïngchï le ato konyïtöy.

²⁰ Akwotini kiwany kïpirönö nyinte, kïngwïsa sïranay lata akwa lamay akulokyï sïrokachi. Atolapay kumït kïwudochï kimurtöwon.

Kakïwudochï Yeso kimurtöwon

²¹ Kuryam ompö araor nko chi nyo kikuro Simon, nyo kingwïno koro Kurene, kuchikyï nyinte kïkasan kimurtöwonto Yeso (chichoni kï ki papoto Aleksanda nko Rupo).

²² Kumït Yeso ntökwitï ato kïkuro Kolkota, nyo ato kïwaghach kelentöy, “Kowo Möt.”

²³ Kutö nyinte dipay* cho kikïtasta pögho tolkos wölo melö kigha.

²⁴ Kïwudochï kimurtöwon akupar sïrokachi, kilasta chane kwegh kïtomö kupar sïrochoni atökïcheng chi nyo köchïnchï nyinte.

²⁵ Kikïwudochï Yeso kimurtöwon satïn sömök cho pö tökwoghö.

²⁶ Kikikirchï ngal cho kïlentöy kigh parakuto mötïnyi cho kimwoghöy lö, “Pöytoghinto pipö Yaudi.”

²⁷ Akikïwudochï nyinte kimurtöwon nko pich odeny cho kile rïmï, kiwudochï akonga ewunyi okumpö tagh, kewudochï anka okumpö löt. [

²⁸ Ompö atoni kï kipïntö ngala cho mwoghöy Kikirut lö, “Kikïtasta nyinte pich cho ghach.”]

²⁹ Kumwa pich cho kiweröy otini akupirpiröy mötöwekwa kïlentöy, “Nyi nyay kilentöy onyoröy Kö pö Tororöt* aitek ompö osis sömök!

³⁰ Sörunö kegh airökunö kimurtöwon!”

³¹ Kïngem tïkwïl tïsï cho echön nko koneti kirurut akïmwochï kegh ayo lö, “Kisörï pikö walaka akwanyï memukönye kïsöru keghï!

³² Nya kïrökunö kimurtöwon Kristo,* pöytoghinto Israel nyete le ye kesïwenacha akeghan.” Kimwa tïkwïl Yeso pïchay kikïwudochï kimurtöwon nko nyinte.

Megha Yeso

³³ Otini kighyö asis kulum tuwïn kore kïmïkul, kïtuwit satïn sömök.

³⁴ Nyini kitïta satïn mut nko angwan, kuta Yeso lö, “Eloy, Eloy, lama sapaktani?” Nyo ato kïwaghach kïlentöy, “Tororötïnyu, Tororötïnyu, ompö ne tepïstaninyi?”

³⁵ Kïlïm pich walaka cho kighyongo atoni, kïlö, “Atere mi kïkuröy Eliya!”

³⁶ Kurïp chi akong ompö pïchay kïwö kïcheng kïgh nyo chimöy tïkwïn cho lenye pögh, akulut dipay cho ngwonöch akïsakana soghywon, atolapay kwonkoghchï Yeso lö kïgha akïlö, “Kekanya tö kesïwena lö, ekungwïnöy Eliya kïngwïso nyinte kimurtöwon!”

³⁷ Kuta Yeso tya atolapay kïma.

³⁸ Kïkarera ananka nyo kiporöy Kö pö Tororöt lö tya kïlïkwï odeny, kïngeta möt ntökwit kel.

³⁹ Nyini kïsïwa wowïn pö asikarin nyo kighyongo tawu kimurtöwontonay wölo kiteghta Yeso atolapay kïma, kïlö, “Nyoman, Wero Tororöt chichï!”

⁴⁰ Kimito korï atoni cho kirosunoy wölo low. Koruchoni kï kyompö Marya Makdalena nko Marya yoto Yakopo nyo mïnïng nko Yose nko Salome.

⁴¹ Kirïp koruchoni Yeso ato kimi Kalilaya akungarak. Kimito ngat koru walaka cho chang, cho kipka nko nyinte kïpkana Yerusalem.

Kakïtïp Yeso

⁴² Kïkany kwimön ompö asisoni pö tata, asis nyo kinyoghöy asispa Sapato,*

⁴³ kungwïn Yosep nyo pö Arimatea, nyo konyïtote ompö Kokwö akikönöy nyinte kingwïnata Pöyunöto Tororöt. Akïwö wölo mi Pilato ompö nyakanat kïsom por pö Yeso.

⁴⁴ Kïtangany Pilato otini kilïm lö, kima Yeso. Kïkur wowïn pö asikarin nyo kighyongchini askarin akïtep tökunkïtï lö, tenö oyï otini kima Yeso.

⁴⁵ Kïkany kïlïma wowïnay pö askarin ngalechoni, kïchömchï Yosep kwip por pö Yeso.

⁴⁶ Kwal nyu Yosep ananka katani akurekunö poray kimurtöwon, akïnanagha anankanay akutö pïrïm nyo kikiped ghat, atolapay kïmïlmïlï kogh nyo wow kïkara pïrïmponay.

⁴⁷ Kïsïwa Marya Makdalena nko Marya yoto Yose, wölini kikïrorchï pör pö Yeso.