MARKO 12 - PIPÏLIA

¹ Kutor Yeso kïngölonchineghö chane körkeyïntin lö, “Kikatkat chi para sapipun, akuwach kuwit akïpal pïrïm nyo kïpïro sapipun kïlïkwï dipay* akïtek kïtar, atolapay kumönokyï ngori paren akïrutö kïwö kor nyo low.

² Otini kitïta osiswo pö ilö, kïyonta sekeyontenyi wölo mi pïchay kimönokyï par kïchengunö chane kareranto akwa cho kel.

³ Kïnam chane mötworintonay akïmuny akïyon kïwö kïtuw.

⁴ Kïyonta chichay pö par ngat mötworintenyi anka. Kïmuny pïchay mötworintonay möt akutö nyinte arasï.

⁵ Kïyonta ngat mötworinte anka, kïpar chane nyona akwighchï walaka cho chang lenyoni kimuny walaka, kïpar walaka.

⁶ Kitökïtïng chichay pö par chi akonga, weri nyo kichömöy nyoman. Ato mi löt, kiyonta weroni kïwö wölo mi chane, ompöwölo kilö, ‘Konyïtöy chane werïnyan nyo mötïny!’

⁷ Wölo kïmwochï kegh ngorichay pö paren lö, ‘Anyï wero chi pö par, apkana kepara atökemïla pare.’

⁸ Kïlenyona kïnam akïpar akïwirchï paranay pö sapipun sany.”

⁹ “Ayo Ighöy ne chichoni pö para sapipun? Ngwïnöy kïpöröy pïchoni akumönokyï paren pikö walaka.

¹⁰ Ayo tomönye osomönökwa Kikirutchï lentöy, ‘Kiwaghaka köghay kitagh tekï kïlïkwï kögh nyo pö kinyiwut.

¹¹ Echotyon nyo kigh ngölyontonete, pö töngönchin kïtya kïyoni kakïsïwïyecha!’ ”

¹² Kimököy kintöghoghi pipö Yaudi kïnömöy, ompöwölo kinkïtï lö kiparta körkeyïnoni chane, wölo kïpïstö akïpechï kegh, ompöwölo kiwagh tuyot.

Ngala kwaghata suru

¹³ Keyonta Parisaytin* walaka nko rïpanpa Erode walaka kïpa kïter wölo ngölontoy Yeso atökïnam.

¹⁴ Kïpa wölo mi Yeso akïlenchï, “Konetin, kinkïtöcha lö, ichinyi chi pö man ametiminyinye wowïn pö chi, wölo inetenyi wölo lata machata Tororöt. Ayo wey chömunote kekwöghchï surï Kaisari anta ewo?”

¹⁵ Kïkwöghchï nya anta ewo? Chepölkösnönengwa, kïlenchï chane, “Ompö ne tomökekwa oghotanïn? Ale köny nusïyon arosan.”

¹⁶ Kutö nyinte nusïyon, kïlö, “Pö ngo mötï nko kaynatanï?” Kïlenchï, “Pö pöytoghini.”

¹⁷ Kïlenchï Yeso, “Kïlenyona, otönö Kaisari tïkuchi, otö Tororöt chechi.” Kïtöngönchï chane nyoman nyinte.

Kingalana Yeso paraku kitutunöt

¹⁸ Kïpkonchï nyinte Sadukaytin* cho kinetöy lö möminye kitutunötö ompö pich cho kimeghö, kïtep lö,

¹⁹ “Konetin, kikirwecha Musa lö, ‘Ato rapas chi akïpïstö korketö kïpuryö monïng, kïmïchini kïmïlöy werto ompö chichoni kokononi atökïyichï monïng chichay karapas.’

²⁰ Kimito werpö chi cho le mut nko odeny. Kïkensyö poretye, kïrapas möyïnye monïng.

²¹ Kïmïl kokonay weri nyo kirïpöy kïrapas möyïnye monïng, kïlïkwï nyoni ngat ompö weri nyo pö sömök,

²² kïmeghö werchay löwïr, le mut nko odeny kïpuryö monïng. Ato mi lötï kïrapas kokonay.

²³ Pöyitu ngo kokononi ompö asispa kitutunöt? Akwanyï kip mïrön cho le mut nko odeny nyinte.”

²⁴ Kïlenchï Yeso, “Nka nyete wölini kyopotyekwa kïlïkwï tömonkïtö ompö Kikirut anta owesyo Tororöt?

²⁵ Ompöwölo ato tutunö pich ngwen, kïwöghökisyot kïkörkeyitu malaykeni yïm, mökensïyicha chane amelö kipöy.

²⁶ Kïkany ompö ngala kitutunöto pich cho kimeghö, tomönye so osomönökwa kitapu Musa atay ngölono wuw nyo kinöghöy? Kïlenchï Tororöt Musa, ‘Ochan Tororöt pö Apraam, achï Tororöt pö Isak, achï Tororöt pö Yakopo.’

²⁷ Tororöt kïmelö pö pich cho kimeghö. Ochikwa potyote nyoman!”

Kirurut nyo wow

²⁸ Kungwïn konetinto kirurut akong, kïlïm kumölöy kegh chane nyini kisïwa lö kiyokyï Yeso Sadukaytin ngölyon nyo kirï chane, akïtep Yeso lö, “Kirurut ne wow tya?”

²⁹ Kuyokyï Yeso lö, “Nyo wow tya kï nyo lentöy, ‘Tera we Israel, Echotyon Tororötïncha kï nyinte onkït nyo le Echotyon.

³⁰ Chama Echotyon Tororötïngu ompö mïkulöwungu kïmïkul nko ompö söpengu löwïr nko ompö ngöghomnyengu kïmïkul nko ompö owesyengu kïmïkul.’

³¹ Nyo pö odeny kï nyi, ‘Chama pöröryengu le wölo ichömtonyi kegh.’ Möminye kirurutye anka nyo wow kïsir chete.”

³² Kïlenchï konetintonay pö kirurut, “Nyoman we konetin, kemwaghanyi nyo karam lö, akonga Tororöt, möminye anka kïpoto nyinte.

³³ Kecham nyinte ompö mïkulögh kïmïkul ompö kinonutköku nko ompö owesyengu löwïr akïcham chi pöröryenyi chömtoy chi kegh. Pö kinyiwut ngölyontoni kïtïl köröstin nko amörostin walaka.”

³⁴ Nyini kïsïwa Yeso lö, kiwöghökwï ompö ngöghomnyö, kïlenchï, “Melö ichinyi low ompö Pöyunöto Tororöt.” Amelö kitökïtep chi Yeso ngölyon kïngeta atoni.

Kangalana Yeso paraku Kristo*

³⁵ Otini kinetisïyi Yeso ompö Kö pö Tororöt* kïtep lö, “Muko lö ne kïmwa koneti kirurut lö, Kristo kï wero Daudi?

³⁶ Akwanyï kïmwa Daudi ompö owesyo Mïkulögh nyo Tïlil lö, ‘Kimwochï Echotyon, Echotyontenyan lö, Töpenö ewunyan okumpö tagh Ntökïtenö rïntenanyi punköku.’

³⁷ Kuro Daudi nyinte Kristo ‘Echotyon,’ kï kalïkwï Kristo werïnyi lö ne?” Kimi pich cho chang kïteröy ngala Yeso ompö ngörekyö.

Körirchï Yeso pich kïripö kegh koneti kirurut

³⁸ Kunet chane ompö kinetutkachi lö, “Orip kegh koneti kirurut cho, chömöy kunisonchegho sïro cho koghöch, atökutakwesata pich chane, ompö donyö,

³⁹ akïtïpïyö ngöcher cho pö tagh ompö kori sowut, möro kong ngöcher cho mi tagh ompö wölo kyomo ichon.

⁴⁰ Chengo chane mïsïktin tïkukwa kudong kïtïryal akïsagh sowut cho koghöch lö tökelö soghöy akwanyï kïchï lïsisïyi, nyoru chane kirwok nyo wow.”

Konut pö mïsïk

⁴¹ Kimi Yeso kïtöpö ato lekïto wölo kïrorchini ropïyen, kurosöy wölo kitöntoy pich ropïyenikwa. Kutötö monkor cho chang ropïyen.

⁴² Ompö atoni, kungwïn korka nyo le mïsïk nyo kile meywon akuchunchï senten odeny.

⁴³ Kïkur kinetankachi akïlenchï, “Omwowokwa nyoman lö, ketö kokonï le mïsïk cho chang kïtïl pïchï lapay ketö kerpes santuku ropïyen,

⁴⁴ ketö chane ompöwölo tïng cho chang, wölo kökonï nyinte cho kotïng löwïr, chini könömtoy kegh.”