LOK 2 - PIPÏLIA

¹ Keluma Echotyon Sayon* tuwïn pö nörekyenyi. Kewur nyinte tïkwïn cho kikuso kegh pipö Israel kïlïkwï kwïle. Amelö kitökunan ompö nyini le Konyi nyo pö saghat, ompö asisoni pö nörekyenyi.

² Kinyar Echotyon kestoni pipö Yuda lömïs, amelö kisyonchï ompö nyo le akonga, kirultö nïyeti kanasyantengwa cho kigheto kegh pung. Kipchï korononi nko pöytoghichi arasï.

³ Kiwurwur Echotyon owesyo Israel ompö nörekyenyi. Kitagh kungarakecha otini kitwecha pung akiporyeghenecha le lyopöt pö ma, nyo pelöy kïgh anka tïkwïl lömïs.

⁴ Kiwutö pikachi kotï le punyontengwa, kipar pich löwïr cho kikïchömonecha kegh akuluma Yerusalem nörekyenyi nyo nöghöy le ma.

⁵ Kenyar ECHOTYON Israel le punyon kenyar kori pöytoghikwa tïkwïl Akïtösyï pipö Yuda lok nko meghat.

⁶ Kiraprap ECHOTYON konyi nyo pö saghat le söpoto par. Kitagha ECHOTYON Sayon kïkonyït ichontin nko Sapato.* Katagh tïkwïl pöytoghin nko tïsin anka tïkwïl ompö nörekyenyi nyo ngwan.

⁷ Kichal Echotyon wölo kïpelo amörostinechi akuchal tïkwïl konyi nyo tïlil Köpïsï pung kurultö nïyet cho pö kanastinechi atolapay kuteghyeghö chane wölo kikïsoghocha ECHOTYON ompöwölo kirïntecha Kiteghyö ompö ngörekyö le nyo pö asispa ichon.

⁸ Kikïmwa ECHOTYON lö kirulöy nïyetwo Sayon kikumil nyinte nïyetwe akïsïwa lö möminye ompö kite nyo ngötu akurulto nyo mesyonchïnye kiruyö ye nyu ngwïny koghi nïyetichi kutïkumö.

⁹ Kirulyö söpöghtino kukoti kanasyan kulum pakostina akerïngarïng keti kuköt kïlïkwï mïnchïran. Kakïrang pöytoghintenyi nko yetïntine kïpa pïnotön kapa koro punton wölo melö mi chi nyo netöy kirurut pö Tororöt wölo melö tökïnyoru werkoyikwa sïwïyagh nyo ngwïno wölo mi ECHOTYON.

¹⁰ Tïpisot ngwïny poyi Sayon akïsisyö lasay. Purpuro chane terït mötöwekwa akulak sarankwachtin cho pö sönönöt. Kengïrukisyö tipi Yerusalem kïrich tökechwö ngwïny.

¹¹ Kalokan kuchiryanïn konyïn mi söpontönyan nyarïl nyo wow nyoman kowongwan nyoman ompö kinyarata piköchan nko kinkïyuyata monïng nko mnyarkiltin ompö ortïna kanasyan.

¹² Rirchini monechoni kamati otini onkïyuyöy kïlentöy, “Okonech wey kïgh nyo kyomöy!” Riryot le pich cho kakikotön ompö ortïna kanasyan akuwonyechï kïpesöyi kamati.

¹³ Heywey we Yerusalem, amwagh ne parakungu nya wey? Akarkeghïn nko ne tasaghsaghïn nya we Sayon nyo kïltït? Möminye anka nyo kikuwongwï le nyete, wow kinyaratengu le nanam. Ekï ngo nyo muköy kusopinyi?

¹⁴ Kimwowokwa werkoyikwa sïwïyaghtin cho pö putintön melö kingarakakwa amtaghpa werkoyichoni asïwena ngokikwo nyo kitökyalastekwa achïwïtyö mapa pïnotön. Kighakwa chane olïmchinö kegh lö kimöminye machata okötenö ngokikwo.

¹⁵ Ngeminyi akuwiswis mötöw pich cho petöy arengwa roröchini wïrata Yerusalem kïlentöy, “Akunka nyete Yerusalem nyay mwoghöy pich lö pïchigh kïmolï walaka, akï kanasyan nyo kingörökyini ngwïnya nya?”

¹⁶ Kangeminyi punköku löwïr akurosinyi ompö kong nyo pö kililat Roröchininyi chane kïlentöy “Kakinyaracha kïtuwit! Nka nyete asis nyo kikïköngecha kwitï!”

¹⁷ Kegh ECHOTYON kïgh nyo ngwan nyo kikakïmwa lö oghöy kepunto ngölyon nyo kimwa könyisyok kimwa lö onyoröy Yerusalem nyo puryö kisyonchin kïgh nyoni nyo kigh pungköcha kïngörekyö otini kirïntecha akïsïch owesyö.

¹⁸ Nya kïrirchï Echotyon nïyetweku we Sayon. Nya kïtörengwï lokeku le lalwa nyo yintoy pöghet nko nangat amekany kïtos loke!

¹⁹ Ngeta airir ainget airir kïyech mwochinö Echotyon kisusut löwïr cho mi mïkulöwungu mwochinö kusyonchï moneku cho kenkïyuy ompö kömöy ompö ortïna kanasyan löwïr.

²⁰ Topöne köny, we ECHOTYON, pköchininyi lö ngo nyoni keghchinyi lenyoni nya? Ngo anka nyo keghchinyi le nyï keghwechanyi? Ayo, mïchinote nyoman kelö kam yotïnö monekwa? Anta kelö kökïpörchï tïsin anta werkoyon Kongu ori?

²¹ Kimeghyechï poyï nko chumwak ortïna kanasyan kewany chokoni pung tipïn nko karachina, kiparanyi chane ompö asisto nörekyengu, akiparanyi nyo puryö kisyonchin.

²² Kikurönyi pungköchan kïpka kïporyeghenanïn kipka le pich cho tuyechini omisyo akor Puryö chi nyo le ompö akonga nyo chïwïtöy ompö asisoni pö nörekyengu. Kipar pungköchan monechan, monïng cho kyanaman kïmïnkech.