LAWIN 20 - PIPÏLIA1 Kïlenchï ECHOTYON Musa, 2 “Mwochinö pipö Israel, kïtïgh chi nyo pö Israel anta ton nyo töni montanyi Molek. Wiro pich nyinte koghïn. 3 Otöghan nyinte akepesyot nko pikachi, ompöwölo ketö montanyi Molek. Kesïmnyon Konyan akurat kaynenyan nyo tïlil. 4 Ato igh kegh piko kore lö, masïwacha kïgh nyo kegh chichoni, 5 otöghan nyu chichoni nko katanyi nko chane löwïr cho karïp ngalechi kutö monekwa Molek. Akepesyot chane nko pikökwa. 6 “Ato wö chi wölo mi chemöwostin nko ponï, otöghan nyinte akepesyot nko pikachi, 7 Otïlilitö kegh nyu, ompöwölo ochan ECHOTYON Tororötïnkwa. 8 Orip kirurutköchan, ompöwölo ochan ECHOTYON nyo otïlilokwa. 9 “Chi anka tïkwïl nyo chïpöy paponyi anta yonyi ketïghöy akwomöy nyinte kisönkachi. 10 “Ato rï chi nko korketo pöröryenyi, ketïghöy chane kwodeny. 11 Ato rï chi nko rïwöy nko korketo kwanta, kï kerat kwanta. Kïtïghöy chane kwodeny akwomöy chane kisönkökwa. 12 Ato rï chi nko korketo werïnyi, ketïghöy chane kwodeny ompöwölo katakalan chane akwomöy chane kisönkökwa. 13 Ato rï chi nko mïrön anka le ato korka, kegh chane kwodeny takalnan. Kïtïghöy chane kwodeny akwomöy chane kisönkökwa. 14 Ato ip chi työ nko yonyi tïkwïl kepelöy chane löwïr, ompöwölo kegh takalnan, atömökïmi chi su nyo ighöy kïgh nyo lata nyoni ompö akwa. 15 Ato rï chi nko tyony ketïghöy nko tyontö. 16 Ato mukyï korka kïrï nko tyony, ketïghöy korketö nko tyontö akwomöy chane kisönkökwa. 17 “Ato ip chi cheptöngwa anta cheptöngwa nyo pö kot anka kï takalnan nyoni akepesyot chane ompö tawu pikökwa, ompöwölo korï nko cheptongwa, omöy nyinte ngokichi. 18 Ato rï chi nko korka nyo töpo yona, kepesyot chane kwodeny nko pikökwa ompöwölo melö karïp kirurut pö tïlilïn. 19 “Merï nko chepto ompö yongu anta sankengu, ompöwölo takalnan nyoni, Omöy chane ngokikwa. 20 Ato rï chi nko korketo mamatanyi kikurat mamatanyi, Omöy chane ngokikwa akïmeghot mösïch monïng. 21 Ato ip chi korketo werïngwa, kï sïmnyon nyoni, ompöwölo kerat werïngwa. Meghot mösïch monïng. 22 “Kïlenyona orip kirurutköchan nko ngalechan löwïr atömötaghak koronï omïtyinokwa. 23 Metöp nterïp otöptino puntonichï oyonan ye ompö tawunkwa, ompöwölo kigh chane tïkuchï löwïr nkanyï ye nyu köghöchanïn chane. 24 Wölo komwowokwa lö, ‘Omïtekwa kor nyo okonokwa kïlïkwï nyinkwa, kor nyo chang chö akï wow kumata,’ ompöwölo ochan ECHOTYON Tororötïnkwa nyo kyaghakwa asisituna nko pich walaka. 25 Kïlenyona nyu opesyenö tyonkïn nko törit cho melö sïmnyon nko cho le sïmnyon. Okïr kegh mam tyonkïn anta törit cho kyoghitön ompö akwa lö sïmnyon. Ato amakwa olïkukwa sïmnyon. 26 Alïkuna cho tïlilöch ompö ani, ompöwölo ani ECHOTYON, ochan tïlil. Ani nyo kyangotokwa asisituna nko pich walaka atalïkuna chichan. 27 “Ato mïrön anta korka nyo le chemöwosyon anta ponin ketïghöy. Kïwiro koghïn chane akwomöy chane kisönkökwa.” |
©Bible Society of Kenya, 2019
Bible Society of Kenya