KIYITUT 4 - PIPÏLIA

¹ Kïlenchï ECHOTYON Musa nko Aron,

² “Yitö pipö Koat kipegha korin nko papotïn,

³ aikir pich cho tïng könyis tömönut sömök ntökwit tömönut mut cho muköy kïpöghisyö ompö Ema nyo mi ECHOTYON.*

⁴ Ighisyö werpö Koat ompö Ema kï: Tïkwïn cho tïlilöch tya.

⁵ Otini köwu, möngot, kï Aron nko werkachi cho lïtöy Ema akutyak anankanay körtoy Santuku Muma* akuyenö santuku.

⁶ Kuyenö parak sïra aran akuluma sïra nyo orus, atolapay kulut ketichay kïsïtö.

⁷ Töni chane sïra nyo orus mesa makatyan nyo kipöy tawu Echotyon akutö parak tïwanay cho pö tïkwïn cho ngutoy cho onyïn nko tïwanay cho pö ropöw nko alepïtis cho pö ropöwo dipay.* Akï mi tïkwïl makatyanta mesanoni.

⁸ Yeno chane sïra nyo pïrir akuluma sïra aran nyo karam, atolapay kulut ketichay kïsïtöy.

⁹ Chengöy chane nyu sïra nyo orus akuluma ket nyo kikönoghöy ta nko kitampin nko saninay nko karïn lapay cho pö mwowöy,

¹⁰ akutuyö nko karichi lapay, akuyenö sïra aran atolapay kulut ketichay kïsïtoy.

¹¹ Yeno chane sïra nyo orus ato kïpelo amöros nyo pö koltin akuluma sïra aran atolapay kulut ketichay kïsïtoy.

¹² Chengöy chane kari lapay cho kikïpöghisyegho ompö Wölay Tïlil akïrotyï sïra nyo orus akuluma sïra aran atolapay kulut ketichay kïsïto.

¹³ Römtoy chane aren cho mi ato kïpelo amöros akuyenö sïra nyo sïmarmar,

¹⁴ akutö ori karïn lapay cho kikïpöghisyegho ompö ato kïpelo amöros: Tören nko umen nko kichiken nko otupöy. Yeno chane sïra aran akulut ketichay kïsïto.

¹⁵ Otini kewang Aron nko werkachi kuyentö Wölay Tïlil nko karichi lapay, otini ketor möngot kïwï, kïpka nyu werpö Koat kïsït tïkuchï, wölo mömïchininye kïswany tïkwïn cho tïlilöch tömömeghö. “Ighisyo werpö Koat nyete chik otini kakiwï Ema.

¹⁶ “Eleasar wero Aron nyo ripöy Ema kïmïkul nko mwowöyi kitömöwon nko tïkwïn cho ngutoy cho onyïn nko ropöwo pagh nko mwagh nyo kiyiltoy nko kïgh anka tïkwïl ompö Ema nyo mi ECHOTYON ori.”

¹⁷ Kïlenchï ECHOTYON Musa nko Aron,

¹⁸ “Mekany kepar pipö ara Koat ompö orïpo Lawi,

¹⁹ wölo ingarak chane atömömeghö atorik tïkuchay tïlilöch tya. Wölo tömegha lenyoni, wetöy Aron nko werkachi ori akïkïlchï chi anka tïkwïl ompö chane ighisyenyi akïmwochï chane kïgh nyo ighöy.

²⁰ Wölo ikïr mekany kïlït chane ori kuros tïkuchay tïlilöch atömömeghö.”

Ighisyo pipö Lawi cho pö ara Kersyon

²¹ Kïlenchï ECHOTYON Musa,

²² “Yitö werpö Kersyon tïkwïl ompö ortïnekwa nko korikwa,

²³ aikir pich cho tïng könyis tömönut sömök ntökwit tömönut mut cho muköy kwigh ighisyö ompö Ema nyo mi ECHOTYON.

²⁴ Chane cho sïtöy tïkuchï:

²⁵ Ema nko ananke nyo kïkörtegho okumpö ori nko nyo pö okumpö sany nko sïra aran kiyeno parak nko ananka nyo pö kuka Ema,

²⁶ nko anankis nko pörköy cho pö kuka kasar nyo kiwit Ema nko ato kïpelo amöros nko anankis cho pö kuka Ema nko tïku walaka cho pö ighisyengwa. Ighöy kïgh anka tïkwïl nyo kakïmwochï chane.

²⁷ Rosöy Musa nko Aron lö kegh pipö Kersyon kïgh anka tïkwïl nyo kömwochï Aron nko werkachi.

²⁸ Ighisyo pipö Kersyon nyï ompö Ema nyo mi ECHOTYON, akï Itamar wero Aron tïsin nyo ghyongchini chane.”

Ighisyo pipö Lawi cho pö ara Merari

²⁹ Kïlenchï ECHOTYON Musa, “Iyit werpö Merari ompö ortïnekwa nko korikwa,

³⁰ aikir pich cho tïng könyis tömönut sömök ntökwit tömönut mut cho muköy kwigh ighisyö ompö Ema nyo mi ECHOTYON.

³¹ Tïkuchï cho sïtöy chane le ighisyengwa kïmïkul ompö Ema: pölöwo cho pö Ema pïrompurkö nko pchörine nko tiwöw nko

³² pchörineko Ema nko tiwowekwa nko nömöwe nko pörköyi nko tïku walaka cho pö ighisyengwa. Tïngeti chi anka tïkwïl tïkwïn cho mïchini kïsïtöy.

³³ Ighisyo pipö Merari nyï ompö Ema nyo mi ECHOTYON, akï Itamar wero Aron tïsin nyo ghyongchini chane.”

Kiyitöto pipö Lawi

^34-48 Kïle ato kimwa ECHOTYON, kuyit Musa nko Aron nko kintöghoghi pipö Israel ortïn sömök cho pö pipö Lawi, Koat nko Kersyon nko Merari. Kiyit chane ompö ortïnekwa nko ompö korikwa akukir pich lapay cho kitïng könyis tömönut sömök ntökwit könyis tömönut mut cho kimuköy kwigh ighisyö ompö Ema nyo mi ECHOTYON. Ki lata nyï kiyitötengwa: Or Kiyitöte Koat 2,750 Kersyon 2,630 Merari 3,200 Löwïr: 8,580.

Or Kiyitöte Löwïr:

⁴⁹ Kikikir chi anka tïkwïl le ato kimwochï ECHOTYON Musa, aketö chi anka tïkwïl ighisyenyi le ato kimwochï ECHOTYON Musa.