KIYITUT 3 - PIPÏLIA

¹ Chï kï monïngo Aron nko Musa otini kingölonchini ECHOTYON Musa ompö Sinay.

² Chï kï kaynötut pö werpö Aron: Nadap nyo kile poretye nko Apiu nko Eleasar nko Itamar.

³ Kikïkïl chane kïlïkwï Tïsï.

⁴ Wölo kikïpar Nadap nko Apiu otini kiropta ma nyo melö tïlil ompö tawu ECHOTYON ompö surkwen pö Sinay, akimötïngcha monïng. Kïlenyona kïpöghisyö Eleasar nko Itamar le tïsï ompö osiswo Aron papongwa.

Kakïkïl pipö Lawi kïpöghisyechï tïsï

⁵ Kïlenchï ECHOTYON Musa,

⁶ “Mïtuna pipö ara Lawi aikany kïpöghisyechï Aron tïsin.

⁷ Pöghisyechini chane nyinte nko pich löwïr otini pöghisïyi ompö Ema nyo mi ECHOTYON.*

⁸ Ripöy chane karïn lapay cho mi Ema akïpöghisyechï pipö Israel löwïr otini pöghisïyi ompö Ema nyo mi ECHOTYON.

⁹ Itö pipö Lawi kïpöghisyechï Aron nko werkachi, kikechengunö chane kwenu pipö Israel atö kïpöghisyechï chane lasiny.

¹⁰ Ikïlenyi Aron nko werkachi opïn kwigh ighisyo tïsintön, wölo atorikï chi anka kepöröy.”

¹¹ Kïlenchï ECHOTYON Musa,

^12-13 Rosa, kochengunan pipö Lawi kwenu pipö Israel kuker poretayi pipö Israel löwïr. Lïku pipö Lawi chichan, ompöwölo chichan poretay löwïr, kyongotyan kegh poretayi pipö Israel löwïr, cho pö pich nko cho pö kyak lïku nyu chichan otini kyaparan poretay löwïr ompö koro Misri. Ochan ECHOTYON.

Kiyitöto pipö Lawi

¹⁴ Kïlenchï ECHOTYON Musa ompö surkwen pö Sinay,

¹⁵ “Yitö pipö Lawi ompö koriko papotïnekwa nko ompö ortïnekwa, kïngeta worö nyo tïng köny akonga kutok.”

¹⁶ Kuyit nyu Musa le ato kimwochï ECHOTYON.

¹⁷ Chï kï werpö Lawi: Kersyon nko Koat nko Merari.

¹⁸ Chï kï monïngo Kersyon: Lipni nko Syimey.

¹⁹ Kï monïngo Koat chï: Amram nko Isar nko Epron nko Usiel.

²⁰ Monïngo Merari chï: Mali nko Musyi. Chï kï monïngo Lawi kïpeghategha koriko papotïnekwa.

²¹ Kipö ara Kersyon pipö Lipni nko Syimey.

²² Wor cho kikiyit löwïr cho kitïng arawa akonga kutok kï ki 7,500.

²³ Roko Kimang pipö Kersyon lötu Ema okumpö ta,

²⁴ aki Elyasap wero Lael nyo kile yetïntöngwa.

²⁵ Ighisyo werpö Kersyon ompö Ema kï kïrip Santuku Muma* nko köröwonte nko ananka nyo körtoy kuka Ema nyo mi ECHOTYON,

²⁶ nko anankis cho kikïtöt kiwit Ema nko ato kïpelo amöros nko ananka nyo yïso kukat nko pörköyichi nko pöghisyewut löwïr cho kiripöy kegh nko tïkuchoni. Chane cho kighyongchini pöghisyö anka tïkwïl nyo rïpöy kegh nko tïkuchoni.

²⁷ Ki pö ara Koat pipö Amram nko pipö Isar nko pipö Epron nko pipö Usiel.

²⁸ Wor cho kikiyit löwïr cho kitïng arawa akonga kutok kï ki 8,600 chane cho pöghisïyi ompö ema ori.

²⁹ Roko Kïmang pipö ara Koat okumpö tagh nyo pö Ema.

³⁰ Aki Elisapan wero Usiel nyo kile kintöghoghintengwa.

³¹ Kiripöy chane Santuku Muma nko mese nko ketïto kitömöwon nko ato kïpelo amöros nko karïn cho pöghisyegho tïsï ompö Wölo Tïlil Tya* nko ananka nko pöghisyewut löwïr kïrïp kegh nko tïkuchï.

³² Eleasar wero Aron nyo kile kintöghoghinto pipö Lawi. Akï nyinte nyo kiwowö pich cho kipöghisïyi ompö wölay Tïlil Tya.

³³ Ki pö pipö Mali nko pipö Musyi ara Merari.

³⁴ Wor löwïr cho kikiyit cho kitïng arawa akonga kutok kï 6,200.

³⁵ Roko kimang chane okumpö löt nyo pö Ema aki Suriel wero Apiail nyo kile kintöghoghintengwa.

³⁶ Ighisyö nyo kikitö chane kï pölöwo Ema nko pïrompurkö nko pchörine nko pïrïmpoti nko karichi lapay. Nko pöghisyewut löwïr kirip nko choni

³⁷ Ki chane tïkwïl cho kighöy pchörine nko pïrïmpoti nko nömöwe nko pörköyi.

³⁸ Roko kimang Musa nko Aron nko werpö Aron tawu Ema nyo mi ECHOTYON okumpö kongasis. Chane cho kipöghisyechini pipö Israel ompö wölay Tïlil Tya. Chi kïtïkon nyo riköy wöloni kepöröy.

³⁹ Pipö Lawi löwïr cho kitïng arawa akonga kutok cho kiyit Musa kïle ato kimwochï ECHOTYON nyinte kï 22,000.

Kacheng pipö Lawi pöroyïn pö poretay cho le wor

⁴⁰ Kïlenchï ECHOTYON Musa, “Yitö pipö Israel löwïr cho le worö cho tïng arawa akonga kutok, aikir kaynötutkökwa.

⁴¹ Wölo lïku chichan pipö Lawi ochan ECHOTYON, le ato kötö ochengan poretayi pipö Israel nko kyaki pipö Lawi, kuker poretayi kyaki pipö Israel löwïr.”

⁴² Kïlenyona kiyit Musa poretayi pipö Israel cho le wor le ato kimwochï ECHOTYON.

⁴³ Nko mïrön löwïr cho kiyit cho kitïng arawa akonga kutok kï 22,273.

⁴⁴ Kïlenchï ECHOTYON Musa,

⁴⁵ “Chenga pipö Lawi le ato kötechengenyi poretayi pipö Israel aicheng tukakwa tïkwïl le ato kötechengenyi cho pö pipö Israel, atökïlïkwï pipö Lawi chichan. Ochan ECHOTYON.

⁴⁶ Ompöwölo katïla poretayi pipö Israel cho pö pipö Lawi, pich cho le 273, mïchini alanyi yokunö werchoni.

⁴⁷ Iyolonenyi akonga ropïyeni silpa cho le mut,

⁴⁸ aitö ropïyeni Aron nko werkachi.”

⁴⁹ Kwigh Musa lenyoni.

⁵⁰ Kïcheng ropïyenichay le 1,365

⁵¹ akutö Aron nko werkachi.