KINONO KIRURUT 28 - PIPÏLIA

¹ “Ato aterakwa ngala ECHOTYON Tororötïngwo arip kiyomisutkachi löwïr cho omwowokwa asisete, kutotewunokwa nyinte ompö pipö ngwïny kïmïkul.

² Pkonchinokwa nyu kisoyönutchoni löwïr ato alïmakwa ngalechï.

³ “Soyönöy ECHOTYON kanastinekwa nko parenikwa.

⁴ “Soyönöy ECHOTYON yiyenkwa nko parenikwa nko kyakikwa.

⁵ “Soyönöy ECHOTYON mïlotwekwa nko koghpa pagh.

⁶ “Soyönöy ECHOTYON kïgh anka tïkwïl nyo oghekwa.

⁷ “Rïntowekwa ECHOTYON punkökwo ato ka kïporyeghenokwa. Pokyinokwa ompö wop akonga, wölo ghyögho wölo omikwa ompö woptin löwïr.

⁸ “Soyönöy ECHOTYON töpotonikwa nko kïgh anka tïkwïl nyo oghekwa ompö kor nyo konokwa nyinte.

⁹ “Ato oripökwa kirurut pö ECHOTYON Tororötïnkwa, kwighwekwa nyinte alïkuna pikachi cho ngotot ompö nyinte lenyini kiyomis.

¹⁰ Sïwïyi nyu pipö ngwïny kïmïkul lö kikïngotokwa ECHOTYON, kuwaghakwa chane nyu.

¹¹ Konokwa ECHOTYON monïng cho chang nko kyak nko omisyö nyo wow ompö koronini kiyomisyï papotïneku lö okonokwa.

¹² Yotwokwa ECHOTYON yïm atökïropchï korenkwa akusoyön ighisyewut löwïr cho oghekwa. Opösönchinekwa ropïyen pipö punton cho chang, wölo melö opösönokwa chane.

¹³ Ighokwa ECHOTYON alïkuna kintöghoghi punton, wölo melö kintöghoghwokwa. Onyorunekwa perur osis löwïr amöminye kïgh nyo rörchinokwa ngwïny ato oripökwa kirurut pö ECHOTYON Tororötïnkwa cho omwowokwa asisete.

¹⁴ Wölo mapeny ngalechï omwowokwa asisete ompö or anka tïkwïl, anta asagh tororötin walaka.

Sito penyat

¹⁵ “Wölo ato apenyakwa kirurut pö ECHOTYON Tororötïnkwa amoripökwanye ngalechï omwowokwa asete, kïpkonchinokwa akïrïpakwa chïputchï,

¹⁶ “Chïpöy ECHOTYON kanastinekwa nko parenikwa.

¹⁷ “Chïpöy ECHOTYON mïlotwekwa nko koghpa pagh.

¹⁸ “Chïpöy ECHOTYON yiyenkwa nko parenikwa nkok yakikwa.

¹⁹ “Chïpöy ECHOTYON kïgh anka tïkwïl nyo oghekwa.

²⁰ “Ato aghakwa ngokï apïstö ECHOTYON, kwipkokwa nyinte chïpö nko nyarïl nko kichopat ompö kïgh anka tïkwï nyo oghekwa ntökïtenö owonyenökwa lawel lömïs.

²¹ Konokwa ECHOTYON sömewut kïnomnyö ntökuwanyakwa löwïr ompö korononi karich apekwa achenga.

²² Konokwa ECHOTYON sömewut cho kwöghokwa ptömölöy nko tïnyon nko kïpöy nko yomo kömöy nyo layate nyo nyoröy paghekwa. Tïpisot tïkuchoni pö kinyarilat nko akwa ntökïtenö kuwanyekwa lömïs.

²³ Möminye rop nyo tökïropönöy, yomöy korononi, le ghat.

²⁴ Ighöy ECHOTYON rop ompö korononi kïlïku terïtyon. Ropönchinokwa terïtyontononi ntökïtenö kuwanyokwa lömïs.

²⁵ “Töni ECHOTYON pungkökwa owesyö nyo rïntonokwa. Opokyinekwa chane ompö söpïch, wölo otoytoyonekwa ompö anka tïkwïl. Otyot nyu ngwïnya kïmïkul ompö kïgh nyo kegha ompö akwa.

²⁶ Otini kalïkukwa mïntïruch, kïpka töritwö nko tyonkïn kïpagha kegh panyekwa akï möminye chi nyo tulöy chane.

²⁷ Pörenokwa ECHOTYON tasusay cho kipara pipö Misri. Töni nyinte porwöyikwa moyoy nko nkwich akutökwa kegh, amörökönye sakït.

²⁸ Ighokwa ECHOTYON olïkune chepoyin, aköryö akwongkwongisyö.

²⁹ Otoktokekwa pöghet kwen, le chi nyo karote amelö soyöno kïgh anka tïkwïl nyo oghekwa. Kinyörilokwa kïnomnyö akepïrokwa, amelö onyorunekwa chi nyo ngörokokwa.

³⁰ “Olotokïnekwa kor wölo rïwotoy chane nko pikö walaka. Otekekwa korïn, wölo melö omöngekwa. Okötkötekwa sapipun, wölo melö omekwa akwe.

³¹ Kïyengöy eghinekwa osïwïyekwa wölo melö ochömchömekwa panye, kïsörenokwa sïkïröyikwo amelö tökeyokwokwa. Kitöni pungkökwa kechiryekwa amelö mi chi nyo ngörokokwa.

³² Kitöni monekwa cho le wor nko tipïn piko puntoni walaka osïwïyekwa, omchinokwa emö monekwo kïtenö osis wölo motïngetekwanye owesyö nyo oyokuno chane.

³³ Omöy piko punton walaka cho melö onkïtokwa paghekwa cho kyangorekwa kighotikwo, akuchopekwa kong kïtenö osis.

³⁴ Ighokwa kichopatanoni kwipokwa oy.

³⁵ Töni ECHOTYON tasusay cho ngwonöch kelyekwa cho melö kimuköy kesopöy. Omöy tasusayichoni kïngata kel ntökwit möt.

³⁶ “Mïtokwa ECHOTYON nko pöytoghintenkwa wölo mi puntonï cho melö onkïtökwa anta papotïnekwa, atopöghisyechinökwa tororötin cho kikigha ket nko koghïn.

³⁷ Otyot pipö koroswechoni yonchinokwa ECHOTYON ompö kïyoni kegha ompö akwa. Pechini chane kukorenokwa akïroröchokwa.

³⁸ “Oletokwa kösïgh cho chang, wölo okösekwa cho ngörï, ompöwölo omöy talam.

³⁹ Okötkötekwa sapipun apïtyï rötökwö, wölo melö opïtekwa akwechi anta aghegh dipayka,* ompöwölo omöy nkut sapipunechoni.

⁴⁰ Pitöy keti arol kïghömï korenkwa kïmïkul, wölo melö onyorunekwa mwada, ompöwölo rörököy akwe kïtomö kïrïr.

⁴¹ Oyiyekwa monïng cho le wor nko tipïn, wölo melö lïku chikwa, ompöwölo petöy kïlïku naman.

⁴² Omöy talam ketikwa löwïr nko paghe tïkwïl.

⁴³ “Owesöchitu tya pich cho le pïnot cho möngöy korenkwa, opechikwa onyörkölölitu tya.

⁴⁴ Pösönwokwa chane ropïyen, wölo melö onyorunekwa cho opösönchini chane. Ato mi löt kuntöghoghwokwa chane.

⁴⁵ “Pkonchinokwa chïputchoni löwïr akïnamakwa ntökïtenö kuwanyakwa lömïs, ompöwölo melö kyaterakwa ngala ECHOTYON Tororötïngwo amoripökwanye kirurutkachi löwïr cho kimwowokwa.

⁴⁶ Lïku chïputchoni macheypa kirwoko Tororöt ompö parakunkwa nko monekwa kokay.

⁴⁷ Kisoyönokwa ECHOTYON ompö or anka tïkwïl, wölo melö kyopöghisyechikwa nyinte ompö ngörekyö nko mïkulögh nyo turönote.

⁴⁸ Kïlenyona ye nyu opöghisyechinekwa punkökwo cho yoku ECHOTYON kïporyeghö ompö kömöy nko maral. Opetekwa kïchïrutöch akïrörchinokwa kïgh anka tïkwïl. Chopokwa kong ECHOTYON akuwangekwa lömïs.

⁴⁹ Yoku ECHOTYON pipö punton cho pkono wölo low, cho molïmekwanye ngalekwa kïporyö nko akwa. Sirirchinokwa chane le sich.

⁵⁰ Mesyonchinicha pïchoni le pkatis chi kïrkegh kö poy anta monïng.

⁵¹ Omöy chane kyakikwa nko paghekwa ntökïtenö owonyenökwa lömïs. Möpïswokwanye pagh anta dipay anta mwaghpa arol anta tïch anta kechir ntökïtenö kïparakwa kömöy.

⁵² Rikyinokwa chane kanastinekwa löwïr ompö korononi konokwa ECHOTYON Tororötïnkwa, kïrkegh kotighokwa kegh nïyet cho koghöch cho kikïtek lö ne? Choni kirulyot löwïr.

⁵³ “Rikokwa pungkökwa ompö kanasyan anka tïkwïl, ntökïchïnchokwa nyarïl nyo wow nyo pö kömöy akwighakwa ama monekwo chini kökonokwa ECHOTYON Tororötïngwo.

^54-55 Ghöyitu chi ompö nyo kökonyïtote ompö osiswechoni pö kirikat ntökïmul pento montanyi ompö nyini le werïngwa nko korkenyi nyo le chamanenyi nko monechi cho köngötï, akï melö töni akonga ompö chane kïnyorï penyoni pö monechi, nyoni omöy nyinte.

^56-57 Ghöyitu korka ompö santenyi nyo kökonyïtote akunisönöy, ntökïmul omisyö werïnyi nko cheptanyi. Wowitu kömöy tya, ntökwam kokononi ompö wïnyat montanyi nyini kötökïyiyöy nko ompö nyini le parwe tïkwïl, ompöwölo kirik pung kanasyante ntökuwonyö omisyö löwïr.

⁵⁸ “Ato moripökwanye lasiny ngala kirurutchï löwïr kakikir kitapunï, atamuka okonyïtö kayneto ECHOTYON Tororötïngwo,

⁵⁹ kiyonwokwa nyu ECHOTYON nko monekwa sömewut cho ghach cho echön, cho melö wonyot amösöpchotcha.

⁶⁰ Ipu wölo omitekwa sömewutchanya kyasïwekwa ompö koro Misri atökïnamakwa kïnomnyö.

⁶¹ Akwipu ngat ECHOTYON wölo omitekwa kichirut nko sömewutkö walaka cho tomönye kekir kitapunï pö kirurut cho nömokwa ntökuwanyakwa.

⁶² Kïrkegh kökyachangitukwa akarkegh nko kokelya yïm, ongötukwa pich cho ngörï, ompöwölo kapenyakwa ngala ECHOTYON Tororötïngwo.

⁶³ Lïku le atanye kingarak ECHOTYON ompö akwa atanye kighwokwa nyinte nyo karam akïtasakwa achangituna, kïngörököy lenyoni tïkwïl otini wonyokwa akwighakwa opotyenö. Atolapay kengetenakwa koronini opetekwa ochengöy.

⁶⁴ “Atolapay kutoyokwa ECHOTYON oghömunö punton löwïr cho mi ngwïny atopöghisyechinökwa tororötin walaka cho kikigha ket nko koghïn, cho tomönye asaghakwa anta papotïnekwa.

⁶⁵ Amelö onyorukwa kalya nyonikïny ompö wop anka tïkwïl, amelö onyorukwa kor nyo lïku nyinkwa kegh. Wironekwa ECHOTYON mïghöt ompö koroswechoni akïmeghyokwa mutïnö.

⁶⁶ Lata ato mi söponwekwa ket. Omïghyokwa nangat nko pöghet akïlïku nyu tapan ompö akwa osis löwïr.

⁶⁷ Nyini kayech amachakwa lö opï katuwit. Nyini katuwit olekwa opï kayech.

⁶⁸ Yodonokwa ECHOTYON koro Misri ngat ompö melin, kïrkegh kimwowokwa lö, ‘Melö topetekwa wölini ngat.’ Opetekwa olchini kegh punkökwo ompö wöloni atalïkuna sekeyikwa, wölo puryö chi nyo mököy kwolokwa.”