KINONO KIRURUT 18 - PIPÏLIA

¹ “Melö mïlöy tïsï cho le pipö Lawi kareranpa koro Israel, nyinö kötösïköy ketö chane amörostin cho kïropchini ECHOTYON.

² Akï mönyorucha kor le werkökwa walaka, ECHOTYON nyo lïku kingarakatengwa kïrïp kegh nko ngölyontenyi nyo kimwochï chane.

³ “Kïkany otini tötoy pich amörostin cho pö tïch anta kechir, ketöni tïsin löyö nko karenyakay kwodeny nko mutïn

⁴ nko poretayi pagh nko dipay* nko mwaghpa arol nko puto kechir.

⁵ Ompöwölo kikïl ECHOTYON Tororötïnkwa pipö Lawi ompö ortïnekwa löwïr atökïpöghisyö ompö kaynata ECHOTYON kokay.

⁶ “Ato ngwïna chi pö Lawi wölo kömöngöy ompö kanasyan anka tïkwïl nyo le nyengu ompö koro Israel, akengwïn nyinte ompö chamatenyi akïwö wölini kakïl ECHOTYON kesagha nyinte,

⁷ akany kïpöghisyö ompö kaynata ECHOTYON Tororötïnyi le werkökwa cho le Lawi.

⁸ Otö nyinte omisyö nyo karkegh nko nyo pö tïsï walaka, kïsis cho nyoruno katangwa.

Taghata otöptino pipö punton

⁹ “Nyini katakwa koronini konokwa ECHOTYON Tororötïnkwa, motöp lö kïrïpöy otöptin cho ghach cho pö punton cho möngöy wöloni.

¹⁰ Motötö monekwo kïlïkwï amörostin, amopöghisyeghö ngorsyö anta chesoköynön anta ponintön,

¹¹ anta put anta ngala oy.

¹² Ompöwölo ghöchini ECHOTYON chi nyo ighöy tïkwïn cho lata choni. Ngalechoni chini kegh ECHOTYON Tororötïnkwa kïyona pïchoni tawunkwa.

¹³ Orip kegh tömonyorï kigheghchin ompö ECHOTYON.

Kiyomisöto kingwïnata werkoyon

¹⁴ “Terchini pïchoni opetekwa ochengöy korengwa pich cho le ngorï nko cho le chepsoköytin. Wölo melö chömwokwa ECHOTYON Tororötïnkwa agha ngal cho lata choni.

¹⁵ “Nyinö köteghöy lenyoni, kïyonwokwa nyinte werkoyon nyo karkegh nko ani, nyo ngwïno pikökwa kegh. Oterchï nyu ngalechi.

¹⁶ “Atanye kyotuyeghekwa kutïng pö Sinay, kyasaghakwa ECHOTYON Tororötïnkwa lö, ‘Mekany kelïmacha kuti ECHOTYON Tororötïncha ngat anta kïsïwa ngat mayï wow atökïmeghö.’

¹⁷ Kïlenchanïn ECHOTYON, ‘Katep chane kïgh ompö ngöghomnyö.

¹⁸ Oyonchinan chane werkoyon nyo karkegh nko nyi nyo ngwïno pikökwa kegh, onetan nyinte ngal cho mwoghöy akïmwochini nyinte chane kïgh anka tïkwïl nyo omwochinan.

¹⁹ Akwanka tïkwïl nyo mölïmönye ngalechan cho mwowu nyinte ompö kaynenyan, otepan chichoni.

²⁰ Wölo ato töp werkoyon anka tïkwïl ntökïlö ongölonöy ompö kaynenyan amelö komwochan nyinte kïngalan anta ngalana kaynata tororötine walaka, kïmeghöy werkoyontononi.’

²¹ “Töptoy otepekwa kegh lö, kinkïtunecha lö ne ngölyon nyo melö kamwa ECHOTYON?

²² Onkïtukwa ato ngalana werkoyon kaynata ECHOTYON, ameghanye kïyoni anta lïkwï man, kïmelö kimwa ECHOTYON. Kangalan werkoyontononi ompö lïsat, moterchï nyinte.