KINONO KIRURUT 1 - PIPÏLIA

Ngala tagh

¹ Achï ngal cho kimwochï Musa pipö Israel löwïr ompö surkwen Yordan antakwagh, atoni kï Arapa, nyo kïtopöno Sup, kwenu Paran nko Topel nko Lapan nko Aserot nko Disaapu.

² Pan nyo pö osis taman nko akonga kïngata kutïng pö Sinay ntöket Kades Parnea otini kiweröy komoswo pö Edom.

³ Kïmwochï Musa pipö Israel ompö könyi 40 arawa taman nko akonga ompö asispa tagh kïgh anka tïkwïl nyo kiyomis ECHOTYON nyinte kïmwochï chane.

⁴ Kimwochï ngalechoni otini kökikïrïnta Musa Sion pöytoghinto pipö Amori nyo kipöytoy Espon nko Ok pöytoghinto Pasyan nyo kipöytoy Astarot* nko Edrey.

⁵ Kitor Musa kunet pich kiyomisut pö Tororöt otini kitökïmi pich Yordan okumpö kongasis koro Moap. Kïlenchï,

⁶ “Kilenchecha ECHOTYON Tororötïncha atakinya kitökemitenöcha kutïng pö Sinay lö, ‘Kikoghit ato kyotïpikwa kutïngï.

⁷ Omïlisyenö anam pan apa koroninö pö kutïngkot pö pipö Amori nko koros löwïr cho lekïtöch ntat mpöghoghyo Arapa. Apusta komos nko wölo le tömköy atang okumpö tagh apa ntat atolekïtö nanampa Kwen, koro pipö Kanan nko Lepanon ntökwit lalwanay wow le Yuparet.

⁸ Ani ECHOTYON nyo kyoyomisyï papotïnekwa ompö Apraam nko Isak nko Yakopo lö, otönan chane kor kïcheng kïlïkwï nyingwa nko yiyengwa nko pich cho rïpu chane.’

Kakïl Musa kirwokï

⁹ “Kyomwowokwa asiswananye ompö kutïng pö Sinay lö, ‘Momukanye ontöghoghwokwa onkït.

¹⁰ Kikïtasekwa ECHOTYON Tororötïnkwa achangituna, akwanyï ye kyachangitukwa le kokelya yïm.

¹¹ Nya kitasakwa ECHOTYON Tororöt pö papotïnekwa achangituna kïnyïl elpun cho chang kïtïl kiyitötenkwa otï le ye, kïrïp kegh nko kiyomisötenyi.

¹² Momukanye nyu ante onkït okösönöy kömpölelyenkwa nko nïkisïntönkwa nko syölutkökwa?

¹³ Okïlchinö kegh pich cho ngöghomöch cho kinkït kïrïp kegh nko piko ortïnekwa, ataghan chane kurwokwokwa.’

¹⁴ “Omwowanïkwa lö, ‘Karam ngölyontononi kemwowechanyi kegha.’

¹⁵ Kïlenyona achengan kintöghoghi piko ortïnekwa cho ngöghomöch cho kinkït aghan chane kurwokwokwa, kïlïkwï kintöghoghi pich 1,000 nko walaka cho ntöghoghchini pich 100 nko walaka cho ntöghoghchini 50 nko cho ntöghoghchini taman nko cho pöytoy pich kïrïp kegh nko piko ortïnekwa.

¹⁶ “Kyoyomisön atoni pikökwa cho le kirwokï lö, ‘Oterchï ngale werkökwo arwokyï ompö man chi anka tïkwïl nko werïngwa nko chi nyo le ton nyo imitenyi tïkwïl.

¹⁷ Morïwochï wop anka otini omutöy ngalekwo. Oterchï pich cho mïnkech nko cho echön ompö man. Marey chi nyonikïny, ompöwölo pö Tororöt kirwokö. Kïkany ato mi kirwokö nyo kepölokwa opï wölo omitan, atateran.’

¹⁸ Kyomwowokwa asisoni tïkwïn löwïr cho kimïchini aghakwa.

Kakïyonta ghotï ompö Kades Parnea

¹⁹ “Keruteghecha wölini le Sinay lenyini kimwowecha ECHOTYON Tororötïncha akewerata surkwen nyo pö otyogh, akepa ketang komoswo pipö Amori ntöketacha Kades Parnea.

²⁰ Olenchokwa, ‘Katukwa komoswo pipö Amori nyo konecha ECHOTYON Tororötïnyo.

²¹ Rosa nyu lö kitönönyi ECHOTYON Tororötïngu koronï, pusa nyu aicheng. Lenyini kimwowunyi ECHOTYON Tororöt pö papotïneku. Mewöghisyö anta meghïn mu.’

²² “Omwowanïkwa chi anka tïkwïl ompö akwa lö, ‘Keyontena pich kuntaghogh atökïpa kïghotwecha kore, atökïpka kïmwowecha or nyo kïpustegho ntöketïta kanastinechoni.’

²³ “Kwighanïn ngölyontononi angarak nyoman, achengan pich taman nko odeny. Kingwïna chi orengwa anka tïkwïl.

²⁴ Kïnget pïchoni akïpusta koronay pö komos akïpa kïrokyï mpöghoghyo Eskol akïghot korononi.

²⁵ Kwipunö korononi akwa cho kipunö ewunekwa akïpka kïrökï wölini kikïmitecha akwomwecha lökoyo wölini. Kïmwowecha lö, ‘Karam koronini konecha ECHOTYON Tororötïnyo.’

²⁶ “Wölo ataghakwa apustena wölini, apenyakwa ngölyonto ECHOTYON Tororötïngwo.

²⁷ Ongwïrngwïronchekwa ompö emenikwo alekwa, ‘Kimïtunenecha ECHOTYON koro Misri ompöwölo kïghöchecha nyinte tökutönecha mori pipö Amori atökuwanyecha.

²⁸ Kïpustocha kepetöy onö? Kimeghecha mutïnö atanye kipka werköcha akïlenchecha, “Owesöch tya piko koronini, akï koghöch kïtïlecha, echön kanastinekwa akikïtek nïyetwekwa kïnam yïm. Akï möchonicha opïn. Kakïsöchicha wölini pïchay tïrusöch akï koghöch.” ’

²⁹ “Atolapay olenchokwa, ‘Momïghyö anta awagh chane.

³⁰ Ntöghoghwokwa ECHOTYON Tororötïnkwa akï poryewokwa, kïle wölanye kighwekwa ompö Misri,

³¹ nko ompö surkwen. Kyasïwekwa wölanye kikasantekwa ECHOTYON Tororötïnkwa kïle wölini kösöntoy chi werïnyi ompö arananye kyapekwa ntökïtenö atunakwa koronï.’

³² Wölo kimaghanakwanye ECHOTYON Tororötïngwo ompö ngölyontononi

³³ nyo kiporwokwa wölo otekyini emenikwo. Kintöghoghikwa oghö ompö ma atasïwena wölo le ore, akuntöghoghwokwa ompö polta.

Ketö ECHOTYON pipö Israel sitöt

³⁴ “Kïkany otini kilïm ECHOTYON ngalekwa, kïnarek, akuwalwal kegh lö,

³⁵ ‘Möminye chi nyo le ompö akonga ompö kwenu pïnete gha nyo sïwïyi koronay karam kyomchan muma lö, otöni papotïnekwa,

³⁶ kïpoto Kalep wero Yepune nyo sïwïyi. Otöninan nyinte nko monechi koronini tïko nyinte kelyechi, ompöwölo kirïpanïn nyinte ompö mïkulöwunyi kïmïkul.’

³⁷ Kïnörekyanïn tïkwïl ECHOTYON ompö akwa akïlö, ‘Melö ilïtenyi wöloni tïkwïl.

³⁸ Wölo lïtöy kingörokintengu Yoswö wero Nun, ikïl nyinte, ompöwölo nyinte nyo ighöy pipö Israel kïcheng koronini.

³⁹ Akïlïtöy koronini monekwa cho mïnkech chanya kyolentekwa petöy kïlïku pöröwo pikö walaka. Cho melö nkït ye tagh nko löt chane nyu cho otöninan kïcheng koronini.

⁴⁰ Wölo opetekwa omïlisyot otöngöy wölnö le surkwen orïpöy aranay töngöy Nanam nyo Pïrir.’

⁴¹ “Atolapay olenchanïkwa, ‘Kakeghchicha ECHOTYON ngokï, kïpustocha yenyu wölini atökeporyenö kïrïp kegh nko ngal tïkwïl cho kimwowecha ECHOTYON Tororötïnyo.’ Kïlenyona kïnap kegh chi anka tïkwïl ompö akwa akïcheng karichi pö lïk, akyolentekwa kwïskwïs kepusta koronini pö komos.

⁴² “Wölo kïlenchanïn ECHOTYON, ‘Lenchinö chane, mapusta oporyö, ompöwölo mowetanye nko akwa, tömö parak punkökwo.’

⁴³ Kyomwowokwa ngalechoni, wölo melö kyalïmakwa. Apenyakwa kirurut pö ECHOTYON akwolökwa kegh apekwa apusta koronini pö komos.

⁴⁴ Kïlïkwï nyo kipokyokwa pipö Amori cho kimöngöy komoswechoni. Kïyonekwa le pich cho kayon sakam akïparekwa kïngeta Edom ntökwit Orma.

⁴⁵ Omïlsyekwa alokyï ECHOTYON, wölo melö kitökïlïm nyite lokekwa amelö kitökïterwokwa kïgh.

Kewitwit pipö Israel surkwen

⁴⁶ “Kïlenyona otïpikwa nyu Kades osis cho chang tya.