KALATIA 1 - PIPÏLIA

^1-2 Kakirwakwa ante Paulö nyo le kiyoktoghin,* akiran nko werköcho löwïr cho omitan tïkwïl wölete. Kikirchinecha palalyantanï pö kitakwesat kanisen cho mi Kalatia. Kighanïn Yeso Kristo* alïkwï kiyoktoghin, amelö ompö machata chi anta ompö owesyo ptangengmöt, wölo ompö owesyenyi nko nyo pö Tororöt Papo nyo kitutunö nyinte ngwen.

³ Nya kïkonok Paponyo Tororöt nko Echotyon Yeso Kristo pöropchö nko kalya.

⁴ Kikonï kegh Kristo nyinte ompö ngokicha kïrïp kegh nko machata Paponyo Tororöt, atökutyakenech ngwïnyinï gha pö ye.

⁵ Nya kïsïch Tororöt ororyö kokay nko kokay! Amen.*

Lökoy cho Karamach

⁶ Kotöngönchokwa otï kapenyakwa lawel nyinte nyini kikurchokwa pöropcho Kristo, arïp lökoye walaka cho sis.

⁷ Wölo mömicha “Lökoy cho Karamach walaka.” Kamwaghan nyoman lenyoni, ompöwölo mi pikö walaka cho susokwa pich cho mököy kïwöghököy Lökoyechoni Karamach pö Kristo.

⁸ Wölo kïrkegh kö acha anta kö malaykayan nyo kengwïna yïm akwomwokwa lökoye walaka cho sis nko chanya kyalïmakwa kyomunecha, akany kïchïpö nyinte.

⁹ Kökikenyaghacha kemwagh tagh, amwoghan ye ngat lö, ato töp chi anka tïkwïl ntökïmwowokwa lökoye walaka cho sis nko chanya kyaghanakwa akany kïchïpö nyinte.

¹⁰ Omökan chömchin pö pich ye nya anta nyo pö Tororöt? Anta omukyinan oghöy pich kïngörekyö nya? Ntökaghan lenyoni kömelö kötolïkunan mötworinto Kristo.

Wölo kikïkurtö Paulö kïlïkwï Kiyoktoghin

¹¹ Omwowokwa werköcho lö, melö kipkana Lökoyechay Karamach kyomwokwa wölo mi pich.

¹² Amelö kyatachan ptangengmöt anta mi chi nyo kinetanïn. Wölo Yeso Kristo nyinte nyo kingongwanïn.

¹³ Kyalïmakwa wölo kyalatan otini kitomitan orïpöy kighanata pipö Yaudi wölo kyachoptan kong tya kanisa Tororöt, amach anyar.

¹⁴ Kyarïntan nyu piko korenyu cho kile pïntanyan cho chang otini kyomitan orïpöy kighanata pipö Yaudi, akilön kegh lasiny arïp otöptineko poyicho.

¹⁵ Wölo kinya Tororöt kïkïlanïn ompö pöropchenyi akulowitanïn kïrkegh otini kitomönye keyïyanïn

¹⁶ akiporwanïn Werïnyi atömanyïl omchï pipö punton Lökoy cho Karamach, melö kyowan ayara chi kiruröt nyonikïny

¹⁷ akimowanye ompö wölini le Yerusalem atotuyö nko kiyoktoghï kïtomö kuyoktanïn nyinte, wölo kyowan panini atany Arapia atolapay amïlan ngat otöngwï Damaska.

¹⁸ Otöpan wöloni ntökuwonyö könyiswö sömökwï owan nyu atang Yerusalem atotuyö nko Petro, atöpan nko nyinte osis taman nko mut.

¹⁹ Amelö kyotuyan nko kiyoktoghin anka, kïpoto Yakopo werto ompö Echotyon.

²⁰ Pö man ngalechete kakirwakwa akunkït Tororöt lö, momïranye putintön.

²¹ Ato mi löt owan atany okumpö Sirya nko Kilikia.

²² Melö kinkïtanïn pipö kaniseni koro Yudea osiswechoni.

²³ Kinkït chane pat ngal cho kilïma pikö walaka cho kimwochï lö, “Mi otï le ye chichanya kichopech kong ompö kighanatenyo osiswe walaka kwomtoy kighanatananye kimukyini nyinte kuwuröy!”

²⁴ Kïsal nyu pïchoni Tororöt ompö ani.