ISAYA 38 - PIPÏLIA

¹ Kïkasa pöytoghintö Esekia osiswechoni nyo kirich kïma. Kïwö werkoyon Isaya wero Amos kuros akïlenchï, “Kömwowunyi ECHOTYON lö sata katangu lasiny ompöwölo imeghenyi, mesöpenyinye. Töpenö kïpsach kanya meghengu.”

² Kïwaghaka Esekia akïtopön nayat akïsagh lö,

³ “Inan, we ECHOTYON lö kyopöghisyewunyi ompö kighanat nko ompö terchin, akyomukyan kïnomnyö agh kïgh anka tïkwïl nyo kimököy oghan.” Atolapay kïrir tya ompö ngwonïn.

⁴ Atolapay kïmwochï ECHOTYON Isaya,

⁵ kïmïla ngat wölo mi Esekia atökïlenchï, “Kalïman, saghatengu, asïwa lokeku ani, ECHOTYON, Tororöt pö kukötöngu Daudi, atösunyi könyiswe walaka cho le taman nko mut.

⁶ Osörunyi, asörï kanasyantanete pö Yerusalem kïngetunö pöytoghinto Asirya. Aletan tagh oghetöy kanasyantanete.

⁷ Anyï machey nyo lïku kiporunöt ompö nyi nyo ngwïno wölo mi ECHOTYON, nyo kïsïwïyi nyo puntegho ECHOTYON ngölyontenyi nyo kamwa.

⁸ Isïwïyenyi lö oyodonan kïwö löt kelyön taman nyo rötyini kiwitat nyo kitek Aas atökïsïwegha asis. Kïmïla asis kelyön taman kïrïp kegh nko ngölyonto ECHOTYON.”

⁹ Achï ngala Esekia pöytoghinto Yuda cho kikir ompö tum nyo pö salat otini kisöpö kösotyenyi:

¹⁰ Kyananan lö owetan olïtöy kuka ngwen otini kalïkwan mïrön. Kakïsarenanïn osiswechu cho kitökïngötunote.

¹¹ Kyolan melö tosïwïyan ECHOTYON ngat ompö koro pich cho tökïsötote anta chi anka tïkwïl nyo satate.

¹² Kangat söpontönyan le ema nyo kakïngwïs. Karkegh nko sïra nyo kakïmutïta. Kyananan lö mi Tororöt kuwongöy söpontönyan.

¹³ Kyariran kïyech ompö ngwonïn, kïkarkegh nko ato rïngöy ngötïny koyechan. Kyananan lö mi Tororöt kuwongöy söpontönyan.

¹⁴ Ki mïnïng kutinyan akïnyarkalal, kyateghan le cheptukwö. Kyoghochö konyichan otini kyotopönön yïm. Kïsörunenanïn Echotyon nyarïltanyu kïmïkul.

¹⁵ Omwoghan ne ye nya? Nyinte ECHOTYON nyo kegh kïyete kïpïntö. Mito ngwonïn söpontönyan, melö onyorunan rïwön.

¹⁶ Okoninyi söpontanyu, we Echotyon, kanya omöngisyan akwompö nyi onkït. Sopante aipïswante osöp.

¹⁷ Kawaghaka ngwonïntönyan kïlïkwï kalya. Kesörunenyi söpontönyan tapan anka tïkwïl ailöstewaninyi ngokichu löwïr.

¹⁸ Möminye chi nyo le ompö akonga nyo sölinyi ompö ngwen. Memuköcha pich cho kimeghö kughönöy kighanatengu.

¹⁹ Pich cho söpsot cho sölinyi kïle otini osölinyi ye. Mwochini papotïnö monekwa wölini ichinyi ghanate kïlïkwï.

²⁰ Kesopaninyi we ECHOTYON. Kïtumecha nyu tumwöy cho sölinyi cho kïtumo pïkantis. Kïsölecha nyi ompö Kongu nyo pö saghat ompö osiswecha löwïr cho tökesöpchonecha.

²¹ Ompöwölo kimwa Isaya lö, “Akanya kïcheng chane manka moköngwö, akany kïnyïra tasustö tökïsöp nyinte.”

²² Kökimwa Esekia tagh lö, “Ne nyo poru lö opusan, alït Kö pö Tororöt?”